ଦେଶରେ ୧.୮୭ ଲକ୍ଷ କୋଟି, ରାଜ୍ୟରେ ୫,୦୩୬ କୋଟି ଜିଏସ୍ଟି ସଂଗ୍ରହ
ନୂଆଦିଲ୍ଲୀ /ଭୁବନେଶ୍ବର : ଚଳିତ ବର୍ଷ ଏପ୍ରିଲ୍ରେ ଦେଶରେ ୧.୮୭ ଲକ୍ଷ କୋଟି ଟଙ୍କାର ଜିଏସ୍ଟି ସଂଗ୍ରହ ହୋଇଥିବା ବେଳେ ରାଜ୍ୟରେ ୫,୦୩୫.୭୪ କୋଟି ଟଙ୍କାର ଜିଏସଟି ସଂଗ୍ରହ ହୋଇଛି । ସେବା କ୍ଷେତ୍ରରେ ଅଭିବୃଦ୍ଧି ଓ ବିଭିନ୍ନ କାରବାରରେ ହୋଇଥିବା ବୃଦ୍ଧି ପ୍ରଭାବରେ ଜିଏସ୍ଟି ସଂଗ୍ରହ ବଢ଼ିଛି। ୨୦୨୨ ଏପ୍ରିଲ୍ରେ ଓଡ଼ିଶାର ଜିଏସ୍ଟି ସଂଗ୍ରହ ୪,୯୧୦ କୋଟି ଟଙ୍କା ଥିଲା। ସେହି ତୁଳନାରେ ଚଳିତ ବର୍ଷ ଏପ୍ରିଲ୍ରେ ଜିଏସ୍ଟି ସଂଗ୍ରହ ମାତ୍ର ୩ ପ୍ରତିଶତ ବଢ଼ିଛି ଯାହା ସାରା ଦେଶରେ ଅନ୍ୟତମ ସର୍ବନିମ୍ନ ବୃଦ୍ଧି। ଅନ୍ୟ କୌଣସି ବଡ଼ ରାଜ୍ୟର ଜିଏସ୍ଟି ସଂଗ୍ରହ ହାର ଏତେ କମ୍ ନାହିଁ।
ରାଜ୍ୟ ବାଣିଜ୍ୟ କର ଓ ଜିଏସ୍ଟି ବିଭାଗ ପକ୍ଷରୁ ଏପ୍ରିଲ୍ରେ ପେଟ୍ରୋଲ ଓ ମଦରୁ ୨୬୪.୪୨ କୋଟି ଟଙ୍କାର ମୂଲ୍ୟଯୁକ୍ତ ଟିକସ (ଭାଟ୍) ସଂଗ୍ରହ କରାଯାଇଛି ଯାହା ଗତବର୍ଷ ଏପ୍ରିଲ୍ରେ ୨୩୨.୯୨ କୋଟି ଟଙ୍କା ଥିଲା। ଏକ୍ଷେତ୍ରରେ ୧୩.୫୨ ପ୍ରତିଶତ ବୃଦ୍ଧି ହୋଇଛି। ବିଭିନ୍ନ ପ୍ରକାର ଟିକସର ବକେୟା ରାଶି ବାବଦରେ ୨୬୬୧.୯୨ କୋଟି ଟଙ୍କା ସଂଗ୍ରହ ହୋଇଛି ଯାହା ପୂର୍ବବର୍ଷର ଏପ୍ରିଲ୍ରେ ହୋଇଥିବା ୧୯୪୭.୨୧ କୋଟି ଟଙ୍କା ତୁଳନାରେ ୩୬.୭୦ ପ୍ରତିଶତ ଅଧିକ। ଚଳିତ ବର୍ଷ ରାଜ୍ୟରେ ୨୦.୨୧ ଲକ୍ଷ ଇ-ୱେ ବିଲ୍ ସୃଷ୍ଟି ହୋଇଛି ଯାହା ପୂର୍ବବର୍ଷ ଏପ୍ରିଲ୍ ତୁଳନାରେ ୧୫.୧୨ ପ୍ରତିଶତ ଅଧିକ।
