ପୀତବାସଙ୍କୁ ସ୍ୱାବଲମ୍ବୀ କରାଇଛି ଥାଇଲାଣ୍ଡ କୋଳି ଚାଷ…

ରାୟଗଡ଼ା ; ବର୍ତ୍ତମାନ ସମୟରେ ଯୁବପିଢିମାନେ ଚାଷରୁ ମୁଁହ ଫେରେଇ ନେଉଥିବା ବେଳେ ପୀତବାସ ଚାଷ କ୍ଷେତ୍ରରେ ସୃଷ୍ଟି କରିଛନ୍ତି ଏକ ଅନନ୍ୟ ଉଦାହରଣ । ସେ ପନିପରିବା ଚାଷ ହେଉ ଅବା ଫଳ, ଫୁଲ ଚାଷ, ସବୁଥିରେ ଦେଖାଇଛନ୍ତି ନିଜର ପାରଦର୍ଶିତା । ଜୀବନର ଅନେକ ସମସ୍ୟା ପ୍ରତିବନ୍ଧକ ସାଜିଥିଲେ ସୁଦ୍ଧା ସମସ୍ତ ବାଧା ପ୍ରତିବନ୍ଧକକୁ ଏଡାଇ ସଫଳତା ପଛରେ ଆଗେଇ ଚାଲିଛନ୍ତି ପୀତବାସ ।

ଏପରି ଜଣେ ଯୁବ ଚାଷୀ ହେଉଛନ୍ତି ରାୟଗଡ଼ା ଜିଲ୍ଲା ଗୁଣପୁର ବ୍ଲକ୍ ସ୍ଥିତ ଭାଲେରିକୁଡ଼ିଆ ଗ୍ରାମର ପୀତବାସ ଶବର । ଯିଏ ଚାଷ କାର୍ଯ୍ୟକୁ ନିଜ ସାଥୀ ଭାବେ ଆପଣେଇ ନେଇଛନ୍ତି । ଖୁବ୍ କମ୍ ବୟସରେ ସେ ଚାଷ କାର୍ଯ୍ୟକୁ ଆପଣେଇ ନେଇଥିଲେ । ଅନ୍ୟମାନଙ୍କ ପରି ପାଠ ପଢ଼ି ଚାକିରୀ କରିବା ପାଇଁ ଇଚ୍ଛା ଥାଇ ମଧ୍ୟ ଅର୍ଥାଭାବ ସାଜିତିଲା ବାଧକ । ପରେ ସେ ଚାଷକୁ ନିଜର ଖୁବ୍ ପ୍ରିୟ ବନ୍ଧୁ ଭାବେ ନିଜର କରିନେଇଥିଲେ ।

ପରେ ଧୀରେ ଧୀରେ ଫଳ, ଫୁଲ ଏବଂ ପନିପରିବା ଚାଷ କରିବା ଆରମ୍ଭ କରିଥିଲେ । ବର୍ତ୍ତମାନ ପୀତବାସ ନୂତନ ବୈଜ୍ଞାନିକ ପଦ୍ଧତିକୁ ଆପଣେଇ ଗେଣ୍ଡୁ ଫୁଲ, ସେବତୀ, ଆମ୍ୱ, ମାଣ୍ଡିଆ, ଜାମୁ କୋଳି, ଆତ, କୋଳି ସହ ବିଭିନ୍ନ ପ୍ରକାର ପନିପରିବା ଚାଷ ମଧ୍ୟ କରୁଛନ୍ତି । ଚଳିତ ବର୍ଷ ସେ ଗେଣ୍ଡୁ ଫୁଲ ଚାଷ କରି ୧ ଲକ୍ଷରୁ ଉର୍ଦ୍ଧ୍ବ ଟଙ୍କା ରୋଜଗାର କରି ବେଶ୍ ଲାଭବାନ ହୋଇପାରିଛନ୍ତି । ସେହିପରି ପୀତବାସ ଗତବର୍ଷରୁ ୟୁଟ୍ୟୁବ ଦେଖି ଚାଷ କରିଥିବା ୪ ପ୍ରକାରର ଥାଇଲାଣ୍ଡ କୋଳି ସମସ୍ତଙ୍କ ଦୃଷ୍ଟି ଆକର୍ଷଣ କରିଛି । ପ୍ରଥମ ବର୍ଷର ଲାଭ କୁ ଅନୁଧ୍ୟାନ କରି ଚଳିତ ବର୍ଷ ମଧ୍ୟ ସେ ଏହି ୪ ପ୍ରକାରର ଯଥା, ଗ୍ରୀନ ଆପଲ୍ ବେରୀ, ବଲ୍ ସୁନ୍ଦରୀ, ସିଡ୍ ଲେସ୍ ବେରୀ ଏବଂ କାଶ୍ମୀରୀ ରେଡ୍ ଆପଲ୍ ବେରୀ ଚାଷ କରିଛନ୍ତି । ଯାହା ତାଙ୍କୁ ଏହି ବର୍ଷ ୫୦ ହଜାର ଟଙ୍କାର ଲାଭ ଦେବା ନେଇ ସେ ଅନୁମାନ କରିଛନ୍ତି ।

ପୀତବାସ ଚାଷ କ୍ଷେତ୍ରର ସଫଳତା ପାଇଁ କେବଳ ନିଜ ଅଞ୍ଚଳରେ ନୁହେଁ ବରଂ ଆଖ ପାଖ ଗ୍ରାମର ଚାଷୀମାନଙ୍କ ପାଇଁ ପ୍ରେରଣା ସାଜିଛନ୍ତି । ଏହାସହ ସେ ନିଜ ଅଞ୍ଚଳରେ ଏବଂ ଗୁଣପୁର ବ୍ଲକରେ ଜଣେ ଶ୍ରେଷ୍ଠ ସଫଳ ଯୁବ ଚାଷୀ ଭାବେ ପୁରସ୍କୃତ ହୋଇଛନ୍ତି ।

ଏନେଇ ପୀତବାସ କୁହନ୍ତି ଯେ, “ଆମ ଯୁବପିଢି ମଧ୍ୟ ଚାଷ କୁ ଗୁରୁତ୍ଵ ଦେବା ନିହାତି ଆବଶ୍ୟକ । ନୂତନ ବୈଜ୍ଞାନିକ ପଦ୍ଧତିକୁ ଆପଣାଇ ଆମେ ବିଭିନ୍ନ ପ୍ରକାର ଚାଷ କରିପାରିବା । ଯାହାଦ୍ଵାରା ଆମ ଯୁବପିଢି ର ଯୁବକ ଯୁବତୀମାନେ ସ୍ବାବଲମ୍ବୀ ହେବା ସହ ରୋଜଗାରକ୍ଷମ ହୋଇପାରିବେ ।