ଷ୍ଟକ୍ ବଜାରରେ ଆଦାନି ଗ୍ରୁପର ସାତୋଟି ସଂସ୍ଥାର ୫୫ ହଜାର କୋଟି ଟଙ୍କାର କ୍ଷତି
ନୂଆଦିଲ୍ଲୀ : ହିଣ୍ଡେନ୍ବର୍ଗ ରିପୋର୍ଟ ଆଦାନି ଗ୍ରୁପ୍ର ପିଛା ଛାଡିବା ନା ନଉନି। ଗତ ଜାନୁଆରି ୨୪ରେ ଏହି ବିସ୍ଫୋରକ ରିପୋର୍ଟ ପ୍ରକାଶ ପାଇବା ପରଠାରୁ ଶିଳ୍ପପତି ଗୌତମ ଆଦାନି ବ୍ୟକ୍ତିଗତ ଭାବେ କ୍ଷତିଗ୍ରସ୍ତ ହୋଇଥିବା ବେଳେ ତାଙ୍କ ସଂସ୍ଥା ଆଦାନି ଗ୍ରୁପ୍ ମଧ୍ୟ କ୍ଷତି ସହିଛି। ଏହି ରିପୋର୍ଟର ପ୍ରଭାବ ଧୀରେଧୀରେ ହ୍ରାସ ହେଉଥିବା ବେଳେ ପୁଣିଥରେ ଆଦାନିଙ୍କ ଅଡ଼ୁଆ ବଢ଼ିଛି। ହିଣ୍ଡେନ୍ବର୍ଗ ଯେଉଁସବୁ ଗମ୍ଭୀର ଅଭିଯୋଗ ଆଣିଥିଲା ତାହାର ତଦନ୍ତ ଆମେରିକାରେ ଆରମ୍ଭ ହୋଇଛି।ଆମେରିକାରେ ଆଦାନି ଗ୍ରୁପ୍ ବିରୋଧରେ ତଦନ୍ତ ଚାଲିଥିବା ଖବର ପ୍ରକାଶ ପାଇବା ପରେ ଷ୍ଟକ୍ ବଜାରରେ ତାଲିକାଭୁକ୍ତ ଥିବା ଆଦାନି ଗ୍ରୁପ୍ର ସାତଟି ସଂସ୍ଥାର ସେୟାର ମୂଲ୍ୟରେ ହ୍ରାସ ଘଟିଛି। ଫଳରେ, ଆଦାନି ଗ୍ରୁପ୍ର ବିଭିନ୍ନ ସଂସ୍ଥା ପ୍ରାୟ ୫୫ ହଜାର କୋଟି ଟଙ୍କା ହରାଇଛନ୍ତି। ଗ୍ରୁପ୍ର ମୋଟ ବଜାର ପୁଞ୍ଜି ପରିମାଣ ୧୦ ଲକ୍ଷ କୋଟି ଟଙ୍କା ତଳକୁ ହ୍ରାସ ପାଇଛି। ବ୍ୟକ୍ତିଗତ ଭାବେ ଆଦାନି ଆଜି ୩.୧ ବିଲିଅନ ଡଲାର (ପ୍ରାୟ ୨୬ ହଜାର କୋଟି ଟଙ୍କା) କ୍ଷତି ସହିଛନ୍ତି। ତାଙ୍କ ସମ୍ପତ୍ତି ୪୯୪୦ କୋଟି ଡଲାରକୁ ହ୍ରାସ ପାଇଛି। ଗତ ଜାନୁଆରି ୨୪ରେ ହିଣ୍ଡେନ୍ବର୍ଗ ରିପୋର୍ଟ ପ୍ରକାଶ ପାଇବା ଦିନ ତାଙ୍କ ସମ୍ପତ୍ତି ୧୧,୯୦୦ କୋଟି ଡଲାର ଥିଲେ। ସେ ପ୍ରାୟ ଦୁଇ ତୃତୀୟାଂଶ ସମ୍ପତ୍ତି ହରାଇସାରିଛନ୍ତି।
ଗତ ଜାନୁଆରି ୨୪ରେ ଆମେରିକାର ଏକ ସଂସ୍ଥା ହିଣ୍ଡେନ୍ବର୍ଗ ରିସର୍ଚ୍ଚ ପକ୍ଷରୁ ଆଦାନି ଗ୍ରୁପ୍ ବିରୋଧରେ ଜାଲ କଂପାନି ଗଠନ, ସେୟାର ମୂଲ୍ୟକୁ ବଢ଼ାଇଚଢ଼ାଇ ପ୍ରଦର୍ଶନ, ହିସାବରେ ବ୍ୟାପକ ଜାଲିଆତି, ପ୍ରମୁଖ ପଦରେ ପରିବାର ଲୋକଙ୍କୁ ନିଯୁକ୍ତି ଭଳି ଗମ୍ଭୀର ଅଭିଯୋଗ କରାଯାଇଥିଲା। ଏହି ରିପୋର୍ଟ ପ୍ରକାଶ ପାଇବାପରେ ନିବେଶକମାନେ ୧୧୦୦ କୋଟି ଡଲାର ହରାଇଥିଲେ। ଆଦାନିଙ୍କ ବ୍ୟକ୍ତିଗତ ସମ୍ପତ୍ତିରେ ମଧ୍ୟ ବଡ଼ଧରଣର ହ୍ରାସ ହୋଇଥିଲା।
ହିଣ୍ଡେନ୍ବର୍ଗ ରିପୋର୍ଟ ପୂର୍ବରୁ ବିଶ୍ବ ଧନୀ ତାଲିକାର ତୃତୀୟ ସ୍ଥାନରେ ଥିବା ଆଦାନି ଶ୍ରେଷ୍ଠ ୩୦ରୁ ବିଦା ହୋଇଯାଇଥିଲେ। ଅବଶ୍ୟ କିଛିମାସ ପରେ ସ୍ଥିତିରେ ସୁଧାର ହେବା ପରେ ଏବେ ସେ ତାଲିକାର ୨୪ତମ ସ୍ଥାନରେ ରହିଛନ୍ତି।
