ଟାଟାଙ୍କୁ ଅଳି କଲେ ଏୟାର ଇଂଣ୍ଡିଆ ପାଇଲଟ
ମୁମ୍ବାଇ: ଏୟାର ଇଣ୍ଡିଆ କର୍ତ୍ତୃପକ୍ଷ ବେତନ ସଂଶୋଧନ କରିବା ପରେ ଆରମ୍ଭ ହୋଇଥିବା ପାଇଲଟ୍ ବିଦ୍ରୋହ ଏବେ ଟାଟା ଗ୍ରୁପ୍ର ସେବା ଅଧ୍ୟକ୍ଷ ରତନ ଟାଟାଙ୍କ ପାଖରେ ପହଞ୍ଚିଛି। କଂପାନିର ୧୫୦୦ ପାଇଲଟ୍ ରତନ ଟାଟାଙ୍କୁ ଏକ ଭାବପୂର୍ଣ୍ଣ ଚିଠି ଲେଖି ନିଜ ମନର ଦୁଃଖ ପ୍ରକାଶ କରିଛନ୍ତି। ସେମାନେ ଜଣାଇଛନ୍ତି ଯେ ଆମକୁ ସମ୍ମାନ ମିଳୁନାହିଁ। ଆମ ମନୋବଳ ଦୁର୍ବଳ ରହିଛି। ଆମେ ଭାବୁଛୁ ଯେ ଯଦି ଏଭଳି ସ୍ଥିତି ଲାଗିରହିବ ତାହା ଆମ କାର୍ଯ୍ୟ ଦକ୍ଷତାକୁ ପ୍ରଭାବିତ କରିବ। ଏହି ମାମଲାରେ ତୁରନ୍ତ ହସ୍ତକ୍ଷେପ କରିବା ଲାଗି ପାଇଲଟ୍ମାନେ ରତନ ଟାଟାଙ୍କୁ ନିବେଦନ କରିଛନ୍ତି। ସେମାନେ ଚିଠିରେ ଲେଖିଛନ୍ତି ଯେ କଂପାନିର ମାନବ ସମ୍ବଳ ବିଭାଗ ସହ କାମ କରିବାରେ ଆମେ ବିଭିନ୍ନ ସମସ୍ୟାର ସମୁଖ୍ଖୀନ୍ନ କରୁଛୁ । ବିଭାଗ ଆମ କଥା ଶୁଣିବା ପାଇଁ ଅରାଜିଗତା ପ୍ରକାଶ କରୁଛି ।ଆମେ ଏହି ପ୍ରସଙ୍ଗରେ ଆପଣଙ୍କୁ ହଇରାଣ କରିବାକୁ ଚାହୁନଥିଲୁ। ମାତ୍ର ମାମଲା ଗୁରୁତ୍ବପୂର୍ଣ୍ଣ ଥିବାରୁ ଆପଣଙ୍କୁ ସେବିଷୟରେ ଜଣାଉଛୁ। ଆମର ବିଶ୍ବାସ ରହିଛି ଯେ ଆପଣଙ୍କ ବଳିଷ୍ଠ ନେତୃତ୍ବରେ ଏହି ସମସ୍ୟାର ଯୁକ୍ତିଯୁକ୍ତ ଓ ସମ୍ମାନଜନକ ସମାଧାନ ହୋଇପାରିବ। ଏୟାର ଇଣ୍ଡିଆର ସଂଶୋଧିତ କର୍ମଚାରୀ ଚୁକ୍ତିକୁ ପାଇଲଟ୍ ସଂଘ ଘୋର ବିରୋଧ କରୁଛି। ଚୁକ୍ତିରେ ସ୍ବାକ୍ଷର କରୁନଥିବା କୌଣସି କର୍ମଚାରୀଙ୍କୁ ଯଦି କଂପାନି ବିଦା କରିବ ତେବେ ଆମେ ଯେକୌଣସି ସ୍ତର ପର୍ଯ୍ୟନ୍ତ ଯିବାକୁ ପଛାଇବୁ ନାହିଁ ବୋଲି ସଂଘ ପକ୍ଷରୁ ଧମକ ଦିଆଯାଇଛି।
