ବ୍ୟାଙ୍କ କର୍ମଚାରୀଙ୍କ ବଢିଲା ଦରମା , ପେନସନ ଓ ୫ଡେ ଉଇକ୍ ଉପରେ ଏପର୍ଯ୍ୟନ୍ତ କୌଣଷି ନିଷ୍ପତି ହୋଇ ନାହିଁ …

ଇଣ୍ଡିଆନ୍ ବ୍ୟାଙ୍କ ଆସୋସିଏସନ୍ (ଆଇବିଏ) ଏବଂ କର୍ମଚାରୀ ସଂଘ ୧୭ ପ୍ରତିଶତ ଦରମା ବୃଦ୍ଧି ପାଇଁ ଚୁକ୍ତି କରିଛନ୍ତି। ଏହି ଚୁକ୍ତି ୨୦୨୨ ନଭେମ୍ବର ପହିଲାରୁ କାର୍ଯ୍ୟକାରୀ ହେବ ଏବଂ ଏହା ୫ ବର୍ଷ ପାଇଁ ବଳବତ୍ତର ରହିବ। ଏହି ହିସାବରେ ଦରମା ବୃଦ୍ଧି ପାଇଁ ଏସବିଆଇ ସମେତ ସମସ୍ତ ରାଷ୍ଟ୍ରାୟତ୍ତ ବ୍ୟାଙ୍କ ଉପରେ ୧୨୪୪୯ କୋଟି ଟଙ୍କାର ବୋଝ ପଡ଼ିବ।

ବୁଝାମଣା ଅନୁଯାୟୀ ସମସ୍ତ ରାଷ୍ଟ୍ରାୟତ୍ତ ବ୍ୟାଙ୍କକୁ ୧୭ ପ୍ରତିଶତ ଦରମା ବୃଦ୍ଧି ମିଳିବ। ଏଥିପାଇଁ ୧୨୪୪୯ କୋଟି ଟଙ୍କା ଖର୍ଚ୍ଚ ହେବ। ନୂଆ ଚୁକ୍ତି ଦ୍ୱାରା ପ୍ରାୟ ୯ ଲକ୍ଷ କର୍ମଚାରୀ ଓ ୩.୮ ଲକ୍ଷ ଅଧିକାରୀ ଉପକୃତ ହେବେ। ଡିସେମ୍ବର ୭ ରେ ଆଇବିଏ ଏବଂ କର୍ମଚାରୀ ସଂଗଠନ ମଧ୍ୟରେ ଆଲୋଚନା ହୋଇଥିଲା । ଦରମା ବୃଦ୍ଧି ନେଇ ଏକ ବୁଝାମଣାପତ୍ର ମଧ୍ୟ ସ୍ୱାକ୍ଷରିତ ହୋଇଥିଲା । ୬ ମାସ ମଧ୍ୟରେ ନୂଆ ଦରମା ବୃଦ୍ଧି ପ୍ରକ୍ରିୟା ଶେଷ ହେବ

ବୁଝାମଣା ପତ୍ର ଅନୁଯାୟୀ, ନୂଆ ଦରମା ବୃଦ୍ଧି ୨୦୨୨ ନଭେମ୍ବର ପହିଲାରୁ ଲାଗୁ ହେବ। ଆସନ୍ତା ୫ ବର୍ଷ ପର୍ଯ୍ୟନ୍ତ ଏହା ବଳବତ୍ତର ରହିବ। ନୂଆ ବେତନ ସ୍କେଲ ପାଇଁ ଡିଏକୁ ମୂଳ ବେତନ ସହ ମିଶା ଯିବ । ଏହି ନିୟମ ୨୦୨୨ ଅକ୍ଟୋବର ୩୧ରୁ ଲାଗୁ ହେବ ବୋଲି କୁହାଯାଇଛି । ଏଥିସହ ୩ ପ୍ରତିଶତ ଲୋଡିଂ ମଧ୍ୟ ଲାଗୁ ହେବ, ଯେଉଁଥିପାଇଁ ୧୭୯୫ କୋଟି ଟଙ୍କା ଖର୍ଚ୍ଚ ହେବ । ଅଧିକାରୀ ଓ କର୍ମଚାରୀଙ୍କ ବାର୍ଷିକ ଦରମା ବୃଦ୍ଧି ପାଇଁ ଭିନ୍ନ ଭିନ୍ନ ନିୟମ ରହିବ। ତେବେ ପେନସନ ବୃଦ୍ଧି ପ୍ରସ୍ତାବ ଏପର୍ଯ୍ୟନ୍ତ ସ୍ଥିର ହୋଇନାହିଁ।  

 ସେହିପରି ପ୍ରତି ଶନିବାର ଛୁଟି ରଖିବାକୁ ଆଇବିଏ ସରକାରଙ୍କୁ ଦାବି କରିଛି। ବର୍ତମାନ ଦ୍ୱିତୀୟ ଓ ଚତୁର୍ଥ ଶନିବାର ବ୍ୟାଙ୍କଛୁଟି ରହିଛି। ଅର୍ଥ ରାଷ୍ଟ୍ରମନ୍ତ୍ରୀ ଭାଗବତ କରଡ଼ ସଂସଦରେ ଏହାର ପୃଷ୍ଟି କରିଥିଲେ । କିନ୍ତୁ ସରକାର ଏହାକୁ ବିଚାର କରୁଛନ୍ତି କି ନାହିଁ ସେ ନେଇ ସେ କିଛି କହିନାହାନ୍ତି। ବୁଝାମଣାପତ୍ରରେ ମଧ୍ୟ ଏହା ଉଲ୍ଲେଖ ନାହିଁ।‘ଫାଇବ ଡେ ପର୍ ଉଇକ୍ ‘ଉପରେ ଆଗକୁ ନିଷ୍ପତ୍ତି ନିଆଯାଇପାରେ। ଦୀପାବଳି ପୂର୍ବରୁ କେନ୍ଦ୍ର ସରକାର କେନ୍ଦ୍ର କର୍ମଚାରୀଙ୍କ ମହଙ୍ଗା ଭତ୍ତା ୪ ପ୍ରତିଶତ ବୃଦ୍ଧି କରିଥିବା ବେଳେ ବ୍ୟାଙ୍କ କର୍ମଚାରୀମାନେ ଗତବର୍ଷଠାରୁ ଦରମା ବୃଦ୍ଧି ଦାବି କରି ଆସୁଥିଲେ।