୩ ମାସ ବଢିପାରେ ବର୍ଦ୍ଧିତ ପେନସନ ପାଇଁ ଆବେଦନ

ନୂଆଦିଲ୍ଲୀ : ଇପିଏଫ୍ଓ ଯୋଗ୍ୟ ଇପିଏସ୍ ସଦସ୍ୟମାନଙ୍କୁ ଅବସର ପରେ ଅଧିକ ପେନସନ୍ ପାଇଁ ଆବେଦନ କରିବାର ସୁଯୋଗ ଦେଇଛି। ଫେବୃଆରୀ ୨୦୨୩ରେ ଇପିଏଫଓ ତାହାର ସଦସ୍ୟମାନଙ୍କୁ ନିଯୁକ୍ତିଦାତାଙ୍କ ସହ ମିଳିତ ଆବେଦନର ବିକଳ୍ପ ଦେଇଥିଲା । ଇପିଏସ୍ ସଦସ୍ୟଙ୍କ ପାଇଁ ଆବେଦନର ଆଜି ପାଇ ଧାର୍ଯ୍ୟ  କରାଯାଇଛି, କିନ୍ତୁ  କେତେକ ଗଣମାଧ୍ୟମ ରିପୋର୍ଟ ଅନୁସାରେ ଏହି ସ୍କିମର ଚାହିଦାକୁ ଦୃଷ୍ଟିରେ ରଖି ଶେଷତାରିଖକୁ ଆଉ ୩ ମାସ ବଢାଯିବାର ସମ୍ଭାବନା ରହିଛି । କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (ଇପିଏଫଓ)  ଇପିଏଫଓ ସଦସ୍ୟଙ୍କ ପାଇଁ ଏକ  ସ୍ବତନ୍ତ୍ର ପୋର୍ଟାଲ ଲିଙ୍କ ଜାରି କରିଛି, ଯାହା ସାହାଯ୍ୟରେ ଅନଲାଇନ ଆବେଦନ କରାଯାଇପାରିବ । ଇପିଏଫଓ କର୍ମଚାରୀ ପେନସନ ପାଣ୍ଠି (ଇପିଏସ୍) ସଦସ୍ୟମାନଙ୍କୁ ମାସିକ ୧୫ ହଜାର ଟଙ୍କା ପେନସନ୍ ଯୋଗ୍ୟ ମଜୁରି ସୀମା ଅତିକ୍ରମ କରିବାକୁ ଅନୁମତି ଦେଇଛି। ଏଥିପାଇଁ କର୍ମଚାରୀ ଓ ନିଯୁକ୍ତିଦାତା ଇପିଏଫଓ ୱେବସାଇଟରେ ମିଳିତ ଆବେଦନ କରି ଇପିଏଫଓଠାରୁ ମାସିକ ମୂଳ ଦରମାର ୮.୩୩ ପ୍ରତିଶତରୁ ଅଧିକ କାଟିବାକୁ ଅନୁରୋଧ କରିପାରିବେ ।