ମନ୍ତ୍ରୀମଣ୍ଡଳରେ ସାମିଲ ହେଲେ ଆରୁଖ, ସୁଦାମ ଓ ସାରଦା

ଭୁବନେଶ୍ୱର: ସାଧାରଣ ନିର୍ବାଚନ ପୂର୍ବରୁ ଦଳ ଏବଂ ସଂଗଠନ ମଧ୍ୟରେ ସମନ୍ୱୟକୁ ବିଜେଡ଼ି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗୁରୁତ୍ୱ ଦେଇଛନ୍ତି l ଏହି କ୍ରମରେ ସୋମବାର ରାଜ୍ୟ ମନ୍ତ୍ରିମଣ୍ଡଳରେ ୩ ବରିଷ୍ଠ ନେତାଙ୍କୁ ସାମିଲ କରାଯାଇଛି l ଏହି ନେତା ମାନେ ହେଉଛନ୍ତି – ବିକ୍ରମ କେଶରୀ ଆରୁଖ, ସୁଦାମ ମାର୍ଣ୍ଡି ଏବଂ ସାରଦା ପ୍ରସାଦ ନାୟକ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ସେମାନଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତିl । ଲୋକସଭା ଭବନର କନଭେନସନ୍ ହଲ୍ ରେ ଆଜି ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇଥିଲା । ଏହି ୩ ରାଜନେତା କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଛନ୍ତି l

ପୂର୍ବାହ୍ନ ୯.୫୦ ମିନିଟ୍ ରେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ମୁଖ୍ୟ ଶାସନ ସଚିବ ପ୍ରଦୀପ କୁମାର ଜେନା ପ୍ରଥମେ ତିନି ମନ୍ତ୍ରୀଙ୍କ ନିଯୁକ୍ତି ସଂକ୍ରାନ୍ତୀୟ ବିଜ୍ଞପ୍ତି ପାଠ କରିଥିଲେ । ଏହାପରେ ୯.୫୨ ମିନିଟ୍ ରେ ପ୍ରଥମେ ବିକ୍ରମ କେଶରୀ ଆରୁଖଙ୍କୁ ରାଜ୍ୟପାଳ ପଦ ଓ ଗୋପନୀୟତାର ଶପଥ ପାଠ କରାଇଥିଲେ । ତାଙ୍କ ପରେ ସୁଦାମ ମାର୍ଣ୍ଡି ୯.୫୪ ମିନିଟ୍ ରେ ଏବଂ ସାରଦା ପ୍ରସାଦ ନାୟକ ୯.୫୭ ମିନିଟ୍ ରେ ଶପଥ ପାଠ କରିଥିଲେ । ୯.୫୯ ମିନିଟ୍ ରେ ସମାରୋହ ସମାପ୍ତ ଘୋଷଣା ହୋଇଥିଲା ।
ଶପଥ ଗ୍ରହଣ ସମାରୋହର ୧୦ ମିନିଟ୍ ପୂର୍ବରୁ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କନଭେନସନ୍ ହଲ୍ ରେ ପହଞ୍ଚିଥିଲେ । ତାଙ୍କ ପରେ ପରେ ରାଜ୍ୟପାଳ ପ୍ରଫେସର ଲାଲ୍ ଆସିଥିଲେ ।