ପାରିବାରିକ ବିବାଦ ଥିଲେ ଟିକେଟ୍ ନାହିଁ, ବିଜେଡି ନେଉଛି ଏପରି ନିଷ୍ପତ୍ତି ……

ଭୁବନେଶ୍ୱର : ପୂର୍ବତନ ମନ୍ତ୍ରୀ ରଘୁନାଥ ମହାନ୍ତିଙ୍କ କଥା ମନେ ପକାନ୍ତୁ। ବୋହୂର ସାମାନ୍ୟ ଅଭିଯୋଗ କେମିତି ତାଙ୍କ ରାଜନୈତିକ କ୍ୟାରିୟରକୁ ପ୍ରାୟତଃ ଶେଷ କରିଦେଲା। ଅନୁଭବ ମହାନ୍ତି-ବର୍ଷା ପ୍ରିୟଦର୍ଶିନୀ, ଅର୍କେଶ ସିଂଦେଓ ଓ ଅର୍ଜିତା ବିବାଦ, ପିପିଲିର ମହାରଥୀ ପରିବାରର ବିବାଦ ଆଦି ବିଜେଡି ମୁଣ୍ଡବିନ୍ଧାର କାରଣ ହୋଇସାରିଛି। ମାତ୍ର ଆଗାମୀ ନିର୍ବାଚନରେ ପାରିବାରିକ ବିବାଦ ଯେପରି ଅଡୁଆ ନ ହୁଏ, ସେ ନେଇ ବିଜେଡି ସତର୍କ ହେବାକୁ ଯାଉଛି। ଗୋଟିଏ ପରିବାର ଗୋଟିଏ ଟିକେଟ୍ ଫର୍ମୁଲା ଆପଣାଇବେ ନବୀନ। ପରିବାରରୁ କାହାକୁ ଟିକେଟ୍ ମିଳିବ, ସେ କଥା ସର୍ଭେକ୍ଷଣରୁ ଆସିଥିବା ରିପୋର୍ଟକୁ ଆଧାର କରି ଦିଆଯିବ ବୋଲି ଜଣାପଡିଛି।

ସେହିପରି ରାଜ୍ୟରେ ଥିବା ଦୁଇ ଜାତୀୟ ଦଳ ମଧ୍ୟରେ ମଧ୍ୟ ପାରିବାରିକ ବିବାଦ ରହିଛି। ଗୋଟିଏ ଜାତୀୟ ଦଳରୁ ଏକାଧିକ ଥର ଖୋର୍ଦ୍ଧା ଜିଲ୍ଲାର ଏକ ଗୁରୁତ୍ୱପୂର୍ଣ୍ଣ ଆସନରୁ ଜିତିଥିବା ବ୍ୟକ୍ତି ନିଜ ପୁଅକୁ ବିଜେଡିରୁ ପ୍ରାର୍ଥୀ କରାଇବାକୁ ଚାହାଁନ୍ତି । ଏକଥା ନେଇ ପ୍ରାଥମିକ ଭାବେ ମଧ୍ୟଗ୍ରୀନ୍ ସିଗନାଲ ରହିଥିଲା। ହେଲେ ପ୍ରାର୍ଥୀ ହେବାକୁ ଚାହୁଁଥିବା ଏହି ଆଶାୟୀଙ୍କ ମଧ୍ୟ ନିଜ ପାରିବାରିକ ବିବାଦ ରହିଛି। ଏକଥା ବିଜେଡି ଜାଣିବା ପରେ ନିଜ ପୂର୍ବ ନିଷ୍ପତ୍ତିକୁ ବଦଳାଇବା ପାଇଁ ମନ ସ୍ଥିର କରୁଛି। ଆଶ୍ଚର୍ଯ୍ୟର କଥା ଏହି କି ଯେ, ବିବାଦିତ ଆଶାୟୀଙ୍କ ବାପା ତଥା ବରିଷ୍ଠ ବିଧାୟକ ଅନ୍ୟମାନଙ୍କୁ ଉପଦେଶ ଦେଉଛନ୍ତି, ହେଲେ ନିଜ ବେଳକୁ ଭୁଲି ଯାଉଛନ୍ତି। ତେଣୁ ସେହି ନେତା ଜଣଙ୍କ ଏବେ ଦୋଛକିରେ ରହୁଛନ୍ତି।