ବିଜେଡ଼ିକୁ ଭାଙ୍ଗି ଦେବାକୁ ଭୟଙ୍କର ଷଡ଼ଯନ୍ତ୍ର, ଅପରେସନ ଲୋଟସକୁ ରୂପ ଦେବେ ଏହି ୩ ନେତା

ବଡ଼ ଭୂମିକାରେ ବୈଜୟନ୍ତ
ଗୋଟିଏ ଗୁଳିରେ କରିବେ ଦୁଇ ଶିକାର
ନବୀନଙ୍କୁ ଧରାଶାୟୀ ସହ ବିଜେପିର ଏକ ନିର୍ଦ୍ଧିଷ୍ଟ ନେତାଙ୍କୁ ଏକ ଘରିକିଆ କରିବାକୁ ଉଦ୍ୟମ
ଭୁବନେଶ୍ୱର- ବିଜୁ ଜନତା ଦଳ (ବିଜେଡି)କୁ ଭାଙ୍ଗି ଦିଆଯିବ। ଏହି କାର୍ଯ୍ୟ କେନ୍ଦ୍ରୀୟ ବିଜେପି ନେତୃତ୍ୱର ତତ୍ତ୍ୱାବଧାନରେ ଅତ୍ୟନ୍ତ ସତର୍କତାର ସହ କରାଯିବ। ନୂଆଦିଲ୍ଲୀରୁ ଏହାକୁ ନିୟନ୍ତ୍ରଣ କରିବେ ଗୃହ ମନ୍ତ୍ରୀ ଅମିତ ଶାହା। ସହାୟତା କରିବ ରାଷ୍ଟ୍ରୀୟ ସ୍ୱୟଂ ସେବକ ସଂଘ(ଆରଏସଏସ)। ଓଡ଼ିଶାରେ ଏହି ଅପରେସନକୁ ଚୂଡାନ୍ତ ରୂପ ଦେବେ କେନ୍ଦ୍ରାପଡ଼ା ବିଜେପି ସାଂସଦ ବୈଜୟନ୍ତ ପଣ୍ଡା। ଦିଲ୍ଲୀ ନେତୃତ୍ୱର ହାତ ବାରିସି ହୋଇ କାମ କରିବେ ଦିଲ୍ଲୀପ ରାୟ ଏବଂ ବିଜୟ ମହାପାତ୍ର l ହେଲେ ଏତେ ବଡ଼ ଅପରେସନରେ ଧର୍ମେନ୍ଦ୍ର ପ୍ରଧାନଙ୍କ ଭୂମିକା ସ୍ପଷ୍ଟ ହୋଇନାହିଁ l ସେ ବିଦେଶ ଗସ୍ତ ପାଇଁ ପ୍ରସ୍ତୁତି ହେଉଥିବା ସମୟରେ ଏକ ବୈଠକ ଅନୁଷ୍ଠିତ ହୋଇ ଯାଇଛି l ନିକଟରେ ବିଜେଡି ଏବଂ ନବୀନ ପଟ୍ଟନାୟକଙ୍କ ହାତ ଛାଡିବାକୁ ପ୍ରସ୍ତୁତ ଥିବା କିଛି ନେତାଙ୍କ ସହ ବିଜୟ ଓ ଦିଲ୍ଲୀପଙ୍କ ବୈଠକ ହୋଇଥିବା ରାଜ୍ୟର ଏକ ଗଣମାଧ୍ୟମରେ ପ୍ରସାରିତ ହୋଇସାରିଛି। ଏହି ଖବର ପରିବେଷଣରର କିଛିଦିନ ପୂର୍ବରୁ ପୂର୍ବତନ ଶ୍ରମିକ ନେତା ବିଜୟ ସାହୁ ଏକ ଆକଳନ ପୂର୍ବକ ତଥ୍ୟ ମଧ୍ୟ ନିଜ ଫେସବୁକ୍ ମାଧ୍ୟମରେ ପୋଷ୍ଟ କରିଥିଲେ।
ସାରା ଭାରତରେ ବିଜେପିର ନିର୍ବାଚନୀ ଗ୍ରାଫ୍ ତଳକୁ ଯାଉଥିବା ବେଳେ ଓଡ଼ିଶାରେ ବିଜେପି ଭଲ ପ୍ରଦର୍ଶନ କରିଥିଲା। ତେଣୁ ଦୀର୍ଘମିଆଦୀ ଯୋଜନାରେ ଓଡ଼ିଶାକୁ ବିଜେପି ନିଜର ଗୁଜରାଟ୍ କମ୍ ମଧ୍ୟ ପ୍ରଦେଶ ମଡେଲ କରିବାକୁ ଚାହୁଁଛି। ଏହି କ୍ରମରେ ଗତ ଜୁନ୍ ମାସ ଠାରୁ ଗୁଜୁରାଟୀ ଏବଂ ଉତ୍ତର ଭାରତୀୟ ବ୍ୟବସାୟୀମାନଙ୍କ ଓଡ଼ିଶା ଆଗମନ ବୃଦ୍ଧି ପାଇଛି। ନୂଆଦିଲ୍ଲୀରୁ ଆସୁଥିବା ଫ୍ଲାଇଟ୍ ଗୁଡିକର ତଥ୍ୟ ସଂଗ୍ରହ କଲେ ଆପଣ ଏହା ଜାଣିପାରିବେ। ତେଣୁ ବିଜେଡିକୁ ଭାଙ୍ଗି ବିଜୁ ପଟ୍ଟନାୟକ ଏବଂ ନବୀନ ପଟ୍ଟନାୟକଙ୍କ ଲିଗାସିକୁ କବର ଦେବା ପାଇଁ ଏହି ଉଦ୍ୟମ ଆରମ୍ଭ ହୋଇଛି। ଏହି ତିନି ଜଣ ନେତା କେବଳ ନବୀନ ପଟ୍ଟନାୟକ ନୁହନ୍ତି, ବିଜେପିର ଅନ୍ୟତମ ଚେହେରା ଧର୍ମେନ୍ଦ୍ର ପ୍ରଧାନ ଗୋଷ୍ଠୀଙ୍କୁ ମଧ୍ୟ ପାନେ ଦେବାକୁ ଚାହୁଁଛନ୍ତି l ରାଜନୈତିକ ଭାବେ ଏହାକୁ ରୂପାୟନ କରିବେ ବିଜୟ ମହାପାତ୍ର। ତାଙ୍କ ଉପରେ ଭରସା କରିଛି କେନ୍ଦ୍ରୀୟ ବିଜେପି ଟିମ୍। କାରଣ ଅତୀତରେ 1995ରେ ଜନତା ଦଳକୁ ହରାଇ ବିଜୁ ବାବୁଙ୍କୁ ପାନେ ଦେବା ଘଟଣା ହେଉ କି 1998 ମସିହାରେ ବିଜେଡିର ରାଜ୍ୟସଭା ପ୍ରାର୍ଥୀ ଅନଙ୍ଗ ଉଦୟ ସିଂଦେଓଙ୍କୁ ପରାସ୍ତ କରି ନବୀନଙ୍କୁ ପ୍ରଥମ ରାଜନୈତିକ ଚାପୁଡା ମାରିବା। ଗୋଟିଏ ସମୟରେ ଯେତେବେଳେ ବିଜେପିକୁ ସାମ୍ପ୍ରଦାୟିକ କହି ନବୀନ ପଟ୍ଟନାୟକ ଦଳ ଛାଡିଥିଲେ। ସେ ସମୟରେ ବିଜୟ ଓ ଦିଲ୍ଲୀପ ବିଜେପିର ହାତ ଧରିଥିଲେ। ରାଜ୍ୟ ବିଜେପି ସଭାପତି ହେବା ପାଇଁ ବିଜେପି ଆରଏସଏସ୍ ଶରଣାପନ୍ନ ହୋଇଥିଲେ। ତେଣୁ ତାଙ୍କ ଭିତରେ ବିଜେପିକୁ ସୁହାଇବା ଭଳି ଗୁଣକୁ ବ୍ୟବହାର କରିବାକୁ ଚାହୁଁଛି ଅପରେସନ୍ ଲୋଟସ୍ ମାଷ୍ଟ୍ରରମାଇଣ୍ଡ ଅମିତ ଶାହା।
1990 ଏବଂ 1995 ମସିହାରେ ଆରଏସଏସ୍ ସହ ଜଡିତ ଥିବା କିଛି ହାତଗଣତି ସାଧାରଣ ବର୍ଗ ନେତାଙ୍କୁ ବିଜୁ ପଟ୍ଟନାୟକଙ୍କ ଇଚ୍ଛା ବିରୋଧରେ ବିଜୟ ଟିକେଟ୍ କରାଇଥିଲେ। ସେହିମାନେ ବର୍ତ୍ତମାନ ବିଜେପି ଭାଙ୍ଗିବାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇବେ। ସେହିପରି ରାଜ୍ୟରେ ପ୍ରମୁଖ ଗଣମାଧ୍ୟମ ଗୁଡିକ ଦୁଇଟି ଖଣି ମାଲିକଙ୍କ ହାତରେ ରହିଛି। ତେଣୁ ରାଜ୍ୟର ଦୁଇଟି ବଡ ଚ୍ୟାନେଲ ଓ ଖବର କାଗଜ ତାଙ୍କୁ ସହଯୋଗ କରିବେ। ଜଣେ ଅନାମଧ୍ୟେୟ ଲୋକ ବିଜେଡି ଛାଡିଲେ ଏହି ଗଣମାଧ୍ୟମ ଜୋରରେ ପ୍ରଚାର କରିବେ। ଯେପରି ଅମର ଶତପଥୀ, ପ୍ରସନ୍ନ ପାଟ୍ଟଶାଣୀ ଇତ୍ୟାଦିଙ୍କ କ୍ଷେତ୍ରରେ ଦେଖାଯାଉଛି। ଏହି ସବୁ ସ୍ଥିତିରେ ଡିଆର ପଟ୍ଟନାୟକଙ୍କ ବ୍ୟବସାୟିକ ସାମ୍ରାଜ୍ୟ ଓ ଭ୍ରାତା ସୌମ୍ୟ ରଞ୍ଜନ ପଟ୍ଟନାୟକ କାହା ସହିତ ରହିବ ସହଜରେ ଅନୁମେୟ। ନିକଟରେ ନବୀନ ପଟ୍ଟନାୟକଙ୍କ ଜନ୍ମଦିନରେ ସମ୍ବାଦ ଖବର କାଗଜର ଆଭିମୁଖ୍ୟରୁ ଏହା ସ୍ପଷ୍ଟ ହୋଇସାରିଛି।
ହରିୟାଣା ନିର୍ବାଚନ ପରେ ଏହି ଅପରେସନ୍ ଲୋଟସ୍ ଟିମ୍ ସକ୍ରିୟ ହୋଇଯାଇଛି। ଅପେକ୍ଷା କରିଛି ମହାରାଷ୍ଟ୍ର ଫଳାଫଳକୁ। ଏହା ପରେ ବିଜେଡିକୁ ଭାଙ୍ଗିବା କାମକୁ ଚବଡାନ୍ତ ରୂପ ଦିଆଯିବ। ଦଳର ପ୍ରତିଷ୍ଠା ଦିବସ 26 ଡିସେମ୍ବର ପୂର୍ବରୁ ହୁ୍ଏତ ଶଙ୍ଖ ଭବନ ମାଲିକାନାକୁ ନେଇ ଏକ ବଡ୍ ଗେମ ଖେଳାଯାଇପାରେ। ଏସବୁ ପରେ ଆସନ୍ତା ସାଧାରଣ ନିର୍ବାଚନରେ ଆଉ ଏକ ଆଞ୍ଚଳିକ ଦଳ କରି ବିଜେପି ସହ ମେଣ୍ଟ କରି ବିଜେଡି ଆସନ ସଂଖ୍ୟାକୁ ହ୍ରାସ କରାଯାଇପାରେ।

https://odishapatrika.com/how-bijay-mohapatra-betrayed-naveen-pattnaik-in-1998