ପୁରୀ-ନିମାପଡ଼ା ବିଜେଡି ରାଜନୀତିରେ ନିଆରା ସଂଯୋଗ, ବଦଳୁଛି ସମୀକରଣ…ଶଙ୍ଖ ଭବନ କ୍ୟାଣ୍ଟିନରେ କଣ ହୋଇଥିଲା ଆଲୋଚନା..

ଭୁବନେଶ୍ୱର:  ସାଧାରଣ ନିର୍ବାଚନ ପାଖେଇ ଆସିଲାଣି। କେନ୍ଦ୍ରୀୟ ବିଜେପି ନେତାଙ୍କୁ ଲୋକସଭା ଆସନ ଚିନ୍ତା ଘାରିଛି। ଅନୁରୂପ ଭାବେ ବିଜେଡିକୁ ବିଧାନସଭା ଆସନ ଚିନ୍ତା ଘାରିବାକୁ ଲାଗିଛି। ଏହି କ୍ରମରେ ଉପକୂଳ ଓଡ଼ିଶାରେ ପୁରୀ ଏବଂ ଭଦ୍ରକ ଜିଲ୍ଲାରେ ବିଜେପି ନିଜକୁ ଶକ୍ତିଶାଳୀ କରି ପୂର୍ବାପେକ୍ଷା ଅଧିକ ବିଧାନସଭା ଆସନ ହାତେଇବ ବୋଲି କେତେକ ସର୍ଭେକ୍ଷଣ ସଂସ୍ଥା ରିପୋର୍ଟ ଦେଇଥିଲେ। ମାତ୍ର ଅମିତ ଶାହାଙ୍କ ଗସ୍ତ ସହ ଏକାଧିକ କେନ୍ଦ୍ର ମନ୍ତ୍ରୀଙ୍କ ମେଣ୍ଟ ନ ହେବା ସଫେଇ ସବୁ କିଛି ଗୋଳମାଳ କରିଦେଇଛି। ଏହି କ୍ରମରେ ପୁରୀ ବିଜେଡି ମଧ୍ୟ ନିଜକୁ ସଜାଡିବା ଆରମ୍ଭ କରିଦେଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ପୁରୀ ଗସ୍ତ କରିବାକୁ ଥିବା 5-ଟି ସଚିବଙ୍କ ଗସ୍ତକୁ ସଫଳ କରିବା ପାଇଁ ସମସ୍ତେ ଆଗେଇ ଆସିଲେଣି। ଏହି କ୍ରମରେ ପୁରୀ ଜିଲ୍ଲାରେ ଥିବା ବିଧାନସଭା ଆସନର ସମ୍ଭାବ୍ୟ ପ୍ରାର୍ଥୀ ନେଇ ପ୍ରଥମ ସୂତ୍ରୀ ଆଲୋଚନା ଆରମ୍ଭ ହୋଇଯାଇଛି।

ଏହି କ୍ରମରେ ଜିଲ୍ଲାର ତିନୋଟି ବିଧାନସଭା ଆସନ ନେଇ ଆଲୋଚନା ଆରମ୍ଭ ହୋଇଛି। ଏହି ଆସନ ଗୁଡିକ ହେଉଛି ପୁରୀ, ନିମାପଡ଼ା ଏବଂ କାକଟପୁର। ପୁରୀ ଆସନରେ ବର୍ତ୍ତମାନ ବିଧାୟକ ଥିବା ଜୟନ୍ତ ଷଡ଼ଙ୍ଗୀଙ୍କ ଘର ବାହୁଡ଼ାକୁ ଏଡାଇ ଦିଆଯାଇ ନ ପାରେ। ଶାରରୀକ ଦୃଷ୍ଟିକୋଣରୁ ମହେଶ୍ୱର ମହାନ୍ତିଙ୍କୁ ଟିକେଟ୍ ଦେବା ପାଇଁ ବିଜେଡି ଚାହୁଁନାହିଁ। ମାତ୍ର ତାଙ୍କ ପୁତ୍ର ସୁନୀଲ କୁମାର ମହାନ୍ତି ସାଙ୍ଗଠନିକ କାର୍ଯ୍ୟ କରିବା ସହ ସକ୍ରିୟ ହେଉଛନ୍ତି। ତେବେ ତାଙ୍କର କଣ ହେବ ବୋଲି ପ୍ରଶ୍ନ ଉଠୁଛି। ପୁରୀ ଏବଂ ନିମାପଡ଼ା ବିଜେଡି ରାଜନୀତିରେ କଣ ସଂଯୋଗ ରହିଛି, ତାହା ଉପରେ ଆମର ଏହି ରିପୋର୍ଟ ଟି ପ୍ରସ୍ତୁତ ହୋଇଛି। ପୁରୀରେ ଚାଲିଥିବା କାମ ରାଜ୍ୟ ସରକାରଙ୍କ ବ୍ରାଣ୍ଡିଂ ପାଇଁ ବ୍ୟବହାର ହେବ। ତେଣୁ ପୁରୀ ବିଧାନସଭା ଏବଂ ଲୋକସଭା ଜିତିବା ଦଳ ପାଇଁ ସମ୍ମାନର ପ୍ରଶ୍ନ ହେବ। ତେଣୁ ଏଠି ଜଣେ ଶୃଙ୍ଖଳିତ ବ୍ୟକ୍ତିଙ୍କୁ ବିଜେଡି ପ୍ରାର୍ଥୀ କରିବାକୁ ଚାହିଁବ। ଏହି କ୍ରମରେ ମୁଖ୍ୟମନ୍ତ୍ରୀ, ପ୍ରଭାବଶାଳୀ ସଚିବଙ୍କ ବିରୋଧରେ ପଦେ କହି ନ ଥିବା, ସମସ୍ତ ପ୍ରକଳ୍ପକୁ ବିରୋଧ ନ କରିଥିବା ଜୟନ୍ତ ଷଡ଼ଙ୍ଗୀଙ୍କ ଠାରୁ କେହି ଉପଯୁକ୍ତ ପ୍ରାର୍ଥୀ ହୋଇପାରିବେ ନାହିଁ। ତେଣୁ ଜୟନ୍ତ ଆଗାମୀ ଦିନରେ ବିଜେଡିରୁ ପ୍ରାର୍ଥୀ ହେବାର ଯଥେଷ୍ଟ ସମ୍ଭାବନା ରହିଛି।

ଏହି କ୍ରମରେ ଦୀର୍ଘଦିନ ଧରି ଜନତା ଦଳ ରାଜନୀତିର ମଙ୍ଗ ଧରିଥିବା ମହେଶ୍ୱର ମହାନ୍ତି ନିମାପଡ଼ାର ମୂଳ ବାସିନ୍ଦା। ନିକଟରେ ନିମାପଡ଼ା ବିଧାୟକ ସମୀର ରଞ୍ଜନ ଦାଶଙ୍କୁ ମନ୍ତ୍ରୀ ପଦରୁ ଅତ୍ୟନ୍ତ ଅପ୍ରୀତିକର ପରିସ୍ଥିତିରେ ମନ୍ତ୍ରୀ ପଦରୁ ବିଦା କରି ଦିଆଗଲା। ଆଗ ଅପେକ୍ଷା ତାଙ୍କୁ ବିରୋଧ ଟିକେ ଟିକେ ଗଣମାଧ୍ୟମରେ ଦେଖାଗଲାଣି। ଉପନିର୍ବାଚନରେ ଜିଲ୍ଲା ପରିଷଦ ପ୍ରାର୍ଥୀକୁ ମଧ୍ୟ ଜିତାଇ ପାରିଲେ ନାହିଁ। ତେଣୁ ତାଙ୍କୁ ବିଜେଡି ପ୍ରାର୍ଥୀ କରିବାକୁ ଚାହୁଁନାହିଁ। ନିମାପଡ଼ା ପରିବର୍ତ୍ତେ ସେ ଶୃଙ୍ଖଳିତ ହୋଇ ରହିଲେ ତାଙ୍କୁ ଅନ୍ୟ ଆସନରେ ଥାଇଥାନ କରାଯାଇପାରିବ। ଯାହା ଶଶିଭୂଷଣ ବେହେରା, ପ୍ରଶାନ୍ତ ଜଗର୍ଦ୍ଦେବ, ଅରବିନ୍ଦ ଢାଲି ଇତ୍ୟାଦିଙ୍କ କ୍ଷେତ୍ରରେ ହୋଇପାରିଛି। ବିଜେପିରେ ପ୍ରଭାତୀ ପରିଡ଼ା ଏବଂ ଦିଲ୍ଲୀପ ନାୟକଙ୍କ ବିବାଦ ରହିଛି। ତେଣୁ ସାମାନ୍ୟ ବଦନାମ୍ ହୋଇଥିବା ସମୀରଙ୍କୁ ବଦଳାଇ ନୂଆ ବିଜେଡି ପ୍ରାର୍ଥୀ ଦଳକୁ ବିଜୟୀ କରିପାରିବ ବୋଲି ଏକ ସଂସ୍ଥା ରିପୋର୍ଟ ଦେଇଛି। ଏହି କ୍ରମରେ ନବାଗତ ମହେଶ୍ୱରଙ୍କ ପୁଅ ସୁନୀଲ କୁମାର ମହାନ୍ତି ନିମାପଡ଼ାରେ ଦଳର ପ୍ରାର୍ଥୀ ହୋଇପାରିନ୍ତି ବୋଲି ତିନି ସପ୍ତାହ ଧରି ଆଲୋଚନା ହେଉଛି। ଆଗାମୀ ଦିନରେ ପୁରୀ ଜିଲ୍ଲାକୁ ମୁଖ୍ୟମନ୍ତ୍ରୀ ଗସ୍ତ କରିବେ, ଏହି କ୍ରମରେ ଦଳୀୟ ଦୃଷ୍ଟିକୋଣରୁ ସବୁ କିଛି ଠିକ୍ କରିବାକୁ ଶଙ୍ଖ ଭବନରେ ଏକ ବୈଠକ ହୋଇଥିଲା। ଏହା ପୂର୍ବରୁ ଜିଲ୍ଲାର ବରିଷ୍ଠ ନେତାମାନଙ୍କ ସହ ଆଲୋଚନା ହୋଇଥିଲା। ଏହି ଆଲୋଚନା ତିନି ସପ୍ତାହେ ତଳେ ହୋଇଥିଲା। ତେଣୁ ପୁରୀରୁ ଜୟନ୍ତ ଷଡ଼ଙ୍ଗୀ ଏବଂ ନିମାପଡ଼ାରୁ ସୁନୀଲ ମହାନ୍ତିଙ୍କ ପ୍ରାର୍ଥୀ ହେବା ସମ୍ଭାବନାକୁ ଏଡ଼ାଇ ଦିଆଯାଇ ନ ପାରେ।  ଯଦି ସମୀର ବଦଳନ୍ତି, ତେବେ ମୁଁ କାହିଁକି ନୁହେଁ ବୋଲି ଜିଲ୍ଲା ପରିଷଦ ଉପାଧ୍ୟକ୍ଷ ସ୍ୱାଧିନ ନାୟକ ଓରଫ ବାବୁଙ୍କ ସମର୍ଥକମାନେ ବି କହିବା ଆରମ୍ଭ କଲେଣି।