ଝାରସୁଗୁଡ଼ା ଉପନିର୍ବାଚନ; ନାମାଙ୍କନ ଦାଖଲ କଲେ ଦୀପାଳି

ଝାରସୁଗୁଡ଼ା,୧୮/୪(ବ୍ଯୁରୋ):ଝାରସୁଗୁଡ଼ା ଜିଲ୍ଲାର ଝାରସୁଗୁଡ଼ା ବିଧାନସଭା ଉପନିର୍ବାଚନ ନେଇ ନାମାଙ୍କନ ଦାଖଲ ଜାରି ରହିଛି। ଏହି କ୍ରମରେ ବିଜେଡି ପକ୍ଷରୁ ଦୀପାଳି ଦାସ ମଙ୍ଗଳବାର ନାମାଙ୍କନ ପତ୍ର ଦାଖଲ କରିଛନ୍ତି। ଦୀପାଳି ଦାସ ଝାରସୁଗୁଡ଼ାର ପୂର୍ବତନ ବିଧାୟକ ସ୍ୱର୍ଗତ ନବ ଦାସଙ୍କ କନ୍ଯା। ବିରାଟ ପଟୁଆରରେ ନିଜ ଭାଇ, ସମର୍ଥକ ଏବଂ ଦଳୀୟ ବରିଷ୍ଠ ନେତାଙ୍କ ସହ ଯାଇ ଦୀପାଳି ନାମାଙ୍କନ ପତ୍ର ଦାଖଲ କରିଛନ୍ତି। ଦୀପାଳି ସହ ବିଜେଡିର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ଉପ ନିର୍ବାଚନ ପର୍ଯ୍ୟବେକ୍ଷକ ପ୍ରସନ୍ନ ଆଚାର୍ଯ୍ୟ, ଦେବୀ ପ୍ରସାଦ ମିଶ୍ର ଓ ଶାରଦା ନାୟକ ପ୍ରମୁଖ ଶୋଭାଯାତ୍ରାରେ ଯୋଗ ଦେଇଥିଲେ। ଅନ୍ଯମାନଙ୍କ ମଧ୍ୟରେ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ, ରୀତା ସାହୁ, ପ୍ରତାପ ଦେବ ଓ ଟୁକୁନି ସାହୁ, ବରିଷ୍ଠ ବିଧାୟକ ଅରୁଣ କୁମାର ସାହୁ, ପ୍ରତାପ ଜେନା, ପଦ୍ମନାଭ ବେହେରା,ସ୍ନେହାଙ୍ଗିନୀ ଛୁରିଆ ଏବଂ ପୂର୍ବତନ ବିଧାୟକ ପୁଷ୍ପେନ୍ଦ୍ର ସିଂଦେଓ ପ୍ରମୁଖ ଉପସ୍ଥିତ ରହିଥିଲେ। ଦୀପାଳି ନାମାଙ୍କନ ଦାଖଲ ପୂବର୍ରୁ ଇଷ୍ଟ ଦେବୀ ମା ପାଟଣେଶ୍ୱରୀଙ୍କ ଠାରେ ପୂଜାର୍ଚ୍ଚନା କରିଥିଲେ। ଝାରସୁଗୁଡ଼ାବାସୀ ତାଙ୍କୁ ନିଶ୍ଚୟ ବିପୁଳ ବ୍ଯବଧାନରେ ବିଜୟୀ କରିବେ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି।