ଜାତୀୟ ରାଜନୀତିରେ ଗୁରୁତ୍ୱ ହରାଇବାରେ ଲାଗିଛି ବିଜେଡି
ଭୁବନେଶ୍ୱର(ମତାମତ) : ନୂଆଦିଲ୍ଲୀ ତଥା ଜାତୀୟ ରାଜନୈତିକ ପ୍ରେକ୍ଷାପଟରେ ବିଜେଡ଼ି ନିଜର ଗୁରୁତ୍ୱ ହରାଉଥିବା ବିଭିନ୍ନ ଘଟଣାରୁ ସ୍ପଷ୍ଟ ହେବାରେ ଲାଗିଛି। ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଓଡ଼ିଶା ଗସ୍ତରେ ଆସିବା ପରେ ଏହା ପରଦିନ ପ୍ରଧାନମନ୍ତ୍ରୀଙ୍କୁ ଭେଟିବା ନବୀନ ପଟ୍ଟନାୟକଙ୍କୁ ଏକ ପ୍ରକାର ଅପଦସ୍ଥ କରିଛି। ସେହିପରି ବନ୍ଦେ ଭାରତ ଟ୍ରେନ୍ ଉଦଘାଟନ ସମୟରେ ପ୍ରଧାନମନ୍ତ୍ରୀଙ୍କୁ 3ରୁ 4 ବର୍ଷ ପରେ ପୁରୀ ବିମାନବନ୍ଦର ଉଦଘାଟନ କରିବାକୁ କହିବା ବିଜେଡିକୁ ଆହୁରି ଛୋଟ କରି ଦେଇଛି। ସଂସଦ ଅଧିବେଶନ ସମୟରେ ସେଣ୍ଟ୍ରାଲ ହଲରେ ବିଜେଡି ନେତାମାନଙ୍କୁ ଅନ୍ୟ ଦଳର ନେତାମାନେ ଏପରି କହୁଛନ୍ତି। କର୍ନାଟକ ବିଧାନସଭା ନିର୍ବାଚନ ଫଳାଫଳ ପରେ ବହୁ ବିରୋଧି ନେତା ସେଠାକୁ ନିଜର ପ୍ରତିନିଧି ପଠାଇଥିଲେ। ସେଠାକୁ ନବୀନ ପଟ୍ଟନାୟକଙ୍କୁ ଆମନ୍ତ୍ରଣ କରାଯାଇ ନ ଥିଲା। ନରେନ୍ଦ୍ର ମୋଦିଙ୍କ ପାଇଁ ଖୋଲା ପ୍ରଚାର କରିବା ଯୋଗୁ ନୀତିଗତ ଭାବେ ବିରୋଧିଙ୍କ ପକ୍ଷରୁ ଏହି ନିଷ୍ପତ୍ତି ନିଆଯାଇଛି।
ନବୀନ ଦିଲ୍ଲୀ ଯିବା ପରେ ନିଜ ମନ୍ତ୍ରିମଣ୍ଡଳ ସମ୍ପ୍ରସାରଣ କରିବା ମଧ୍ୟ ରାଜ୍ୟ ସରକାରରେ କେନ୍ଦ୍ର ବିଜେପିର ପ୍ରଭାବ ବୋଲି ରାଜନୈତିକ ସମୀକ୍ଷକମାନେ ଅଭିହିତ କରିଛନ୍ତି। ଆଗାମୀ ଦିନରେ ଆନ୍ଧ୍ର ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡି ନିଜ ଆଭିମୁଖ୍ୟ ସ୍ପଷ୍ଟ କରିପାରନ୍ତି। ହେଲେ ନବୀନ ଏନଡିଏ ବାହାରେ ରହି ବିଜେପିକୁ ସବୁ ପ୍ରକାର ସହଯୋଗ କରିବେ ବୋଲି ପ୍ରତିଶ୍ରୁତି ଦେଇସାରିଛନ୍ତି। ଦିଲ୍ଲୀ ସରକାର ବିରୋଧରେ ସୁପ୍ରିମକୋର୍ଟ ରାୟ ବିରୋଧରେ ଯାଇ କେନ୍ଦ୍ର ସରକାର ଅଧ୍ୟାଦେଶ ଆଣିବାକୁ ଯାଉଛନ୍ତି। ଏହାକୁ ବିଭିନ୍ନ ରାଜନୈତିକ ଦଳ ବିରୋଧ କରିବାରେ ଲାଗିଛନ୍ତି। ହେଲେ ବିଜେଡି କିମ୍ବା ନବୀନ ପଟ୍ଟନାୟକ ଏହି ପ୍ରସଙ୍ଗରେ ମୁହଁ ଖୋଲି ନାହାନ୍ତି। ତେଣୁ ଏହି ପ୍ରସଙ୍ଗ ନବୀନଙ୍କ ସଂଘୀୟ ଢାଞ୍ଚା ଭଲ ପାଇବାର ଅସଲ ପରକ୍ଷା ହେବାକୁ ଯାଉଛି। ଅନୁରୂପ ଭାବେ ଅନ୍ୟ ଏକ ଘଟଣା ମଧ୍ୟ ନବୀନ ଏବଂ ବିଜେଡିକୁ ନିନ୍ଦିତ କରୁଛି। ଦେଶର କୁସ୍ତି ଯୋଦ୍ଧାମାନେ ଆନ୍ଦୋଳନ ରତ ଅଛନ୍ତି, ସେଠାକୁ ବହୁତ ରାଜନେତା, ବୁଦ୍ଧିଜୀବୀ ଗସ୍ତ କରି ନିଜର ସମର୍ଥନ ଜଣାଇଛନ୍ତି। ହେଲେ ଓଡ଼ିଶାକୁ କ୍ରୀଡ଼ା ରାଜଧାନୀ କରିବାକୁ କହୁଥିବା ଓଡ଼ିଶାରେ ଶାସନରତ ବିଜେଡି ଏହି ପ୍ରସଙ୍ଗରେ ଚୁପ୍ ରହିଛି। ବିଜେଡି ମହିଳା ସଶକ୍ତୀକରଣ, ମିଶନ୍ ଶକ୍ତି ଏବଂ ସଂସଦ ଓ ବିଧାନସଭାରେ 33 ପ୍ରତିଶତ ସଂରକ୍ଷଣ ବ୍ୟବସ୍ଥା କଥା କହୁଥିବା ବେଳେ, ମହିଳା ଆଥଲେଟ୍ ମାନଙ୍କ ଅଭିଯୋଗ ଉପରେ ନୀରବତା ବିଜେଡିର ଅସଲ ଚରିତ୍ର ପଦାରେ ପକାଇଛି। (ଓଡ଼ିଶା ପତ୍ରିକା ବ୍ୟୁରୋ)
