୨୦୧୯ ଠାରୁ ଏଥର ଆହୁରି ଭଲ କରିବ ବିଜେଡ଼ି; ଭି.କେ ପାଣ୍ଡିଆନ…
ଭୁବନେଶ୍ବର: ଗତକାଲି ଦେଶରେ ଚତୁର୍ଥ ତଥା ରାଜ୍ୟରେ ପ୍ରଥମ ପର୍ଯ୍ୟାୟ ମଦତାନ ହୋଇଛି । କଳାହାଣ୍ଡି, କୋରାପୁଟ, ନବରଙ୍ଗପୁର ଓ ବ୍ରହ୍ମପୁର ସଂସଦୀୟ କ୍ଷେତ୍ର ଏବଂ ଏହା ଅଧୀନ ୨୮ଟି ବିଧାନସଭା କ୍ଷେତ୍ରରେ ଭୋଟ ଦେଇଛନ୍ତି ଜନତା । ପ୍ରଥମ ପର୍ଯ୍ୟାୟ ନିର୍ବାଚନ ଶେଷ ହୋଇଥିବା ବେଳେ ଏହାର ଫଳାଫଳକୁ ନେଇ ବରିଷ୍ଠ ବିଜେଡି ନେତା କାର୍ତ୍ତିକ ପାଣ୍ଡିଆନ ଖବର ସରବରାହ ସଂସ୍ଥା ଏନଏନଆଇକୁ ସୂଚନା ଦେଇ କହିଛନ୍ତି ଯେ, ପ୍ରଥମ ପର୍ଯ୍ୟାୟରେ ୨୮ଟି ଆସନରୁ ୨୪ଟି ଆସନରେ ଜିତିବ ବିଜେଡି । ୪ଟି ପର୍ଯ୍ୟାୟରେ ସୁଇପ୍ କରିବ ବିଜୁ ଜନତା ଦଳ । ଲୋକସଭା ନିର୍ବାଚନରେ ବିଜେଡି ପୂର୍ବବର୍ଷ ୨୦ ଆସନ ହାତେଇଥିଲା କିନ୍ତୁ ଏଥର ଏଥିରେ ବୃଦ୍ଧି ଘଟିବ କାରଣ ମୁଖ୍ୟମନ୍ତ୍ରୀଙ୍କ ଲହରୀ ଏବେ ଚାରିଆଡେ ଦେଖାଦେଉଛି ବୋଲି ସେ କହିଛନ୍ତି । ଏହାସହ ବିରୋଧୀ ବିଜେପିକୁ ମଧ୍ୟ ଟାର୍ଗେଟ କରିଛନ୍ତି ।
ପାଣ୍ଡିଆନ କହିଛନ୍ତି ଯେ, ଗତକାଲି ଓଡ଼ିଶା ବିଜେପିର ୫ ନେତା ସାମ୍ବାଦିକ ସମ୍ମିଳନୀ କରିଥିଲେ । ଯାହା ସୂଚନା ଥିଲା ସେମାନେ ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରିଥାନ୍ତେ। ଜଣେ ମହିଳାଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରିଥାନ୍ତେ। କିନ୍ତୁ ଶେଷ ମୁହୂର୍ତ୍ତରେ ନିଜ ନିଜ ଭିତରେ ଝଗଡା ଲାଗି ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କଲେନି। ୧୦ ବର୍ଷ ଧରି ମୁଖ୍ୟମନ୍ତ୍ରୀ ପ୍ରାର୍ଥୀ ଖୋଜୁଛନ୍ତି କିନ୍ତୁ ପାଉନାହାନ୍ତି ବୋଲି କହିଛନ୍ତି କାର୍ତ୍ତିକ ପାଣ୍ଡିଆନ ।
ସେହିପରି ରବିବାର ଦିନ ଗୁଜୁରାଟ ଓ ଓଡ଼ିଶା ମଧ୍ୟରେ ଏକ ତୁଳନାତ୍ମକ ବିଷ୍ଳେଷଣ କରି ସେ କହଛନ୍ତି ଯେ ଗୁଜୁରାଟଠାରୁ ଓଡ଼ିଶାର ପ୍ରଦର୍ଶନ ଭଲ ରହିଛି । ସବୁଠୁ ବିଡମ୍ବନାର ବିଷୟ ହେଲା ଭାଜପା ସରକାର ଗୁଜୁରାଟରେ ଦୀର୍ଘ ୧୦ ବର୍ଷ ଶାସନ କରିବା ପରେ ମଧ୍ୟ ତାର ସ୍ଥିତି ଓଡ଼ିଶା ତୁଳନାରେ ଖରାପ ରହିଛି ବୋଲି ମନ୍ତବ୍ୟ ଦେଇଛନ୍ତି ପାଣ୍ଡିଆନ ।
