ନେଡିଗୁଡ଼ କହୁଣୀକୁ ବୋହିଗଲା ପରେ ଫାଳେ ବୁଝୁଛି ବିଜେଡି…..ପ୍ରକୃତ ପ୍ରସଙ୍ଗକୁ ଫେରୁଛି

ଭୁବନେଶ୍ୱର-  ସମୟ ଓ ଧୈର୍ଯ୍ୟଠୁ ବଳି ବଡ଼ କେହି ଯୋଦ୍ଧା ନାହାନ୍ତି। ଏକଥା ଇତିହାସରେ ବହୁଥର ବିଭିନ୍ନ ଉଦାହରଣରେ ଉଲ୍ଲେଖ କରାଯାଇଛି। ସମୟ ହିଁ ବଳବାନ , ଏହା ରାଜନୀତିରେ ପ୍ରତି ମୂହୁର୍ତ୍ତରେ ପରିବର୍ତ୍ତିତ ହୋଇଥାଏ। ଓଡ଼ିଶା ରାଜନୀତି ମଧ୍ୟ ଠିକ୍ ସେହିପରି କଡ଼ ଲେଉଟାଇଛି। ଯେଉଁ ସବୁ ପ୍ରସଙ୍ଗ ବିଜେଡି ଅଣଦେଖା କରୁଥିଲା। ସେହି ପ୍ରସଙ୍ଗରେ ଆଜି ପ୍ରଥମେ ହାଜିରା ପକାଉଛି। ଦୁଇଦିନ ତଳେ ସିପିଏମ୍ କାର୍ଯ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ଶାସକ ଦଳ ବିଜେପି ବ୍ୟତିରକେ ପ୍ରାୟ ସମସ୍ତ ଦଳକୁ ଆମନ୍ତ୍ରଣ କରାଯାଇଥିଲା। ସେହି ହିସାବରେ ବିରୋଧୀ ଦଳ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମଧ୍ୟ ଚିଠି ଦିଆଯାଇଥିଲା। ଅନୁରୋଧ ରକ୍ଷା କରି ସେ ନିଜର ପ୍ରତିନିଧି ଭାବେ ଶଶୀଭୂଷଣ ବେହେରାଙ୍ୁମ ପଠାଇଥିଲେ। ପ୍ରସଙ୍ଗ ଥିଲା- ତୁରନ୍ତ ଜାତି ଭିତ୍ତିକ ଜନଗଣନା ଓ ସାମାଜିକ ନ୍ୟାୟ ପ୍ରସଙ୍ଗ। ନିର୍ଦ୍ଦିଷ୍ଟ ପ୍ରସଙ୍ଗ ଥିବାରୁ ବିଜେଡି ଏହାକୁ ସମର୍ଥନ ଜଣାଇଥିଲା। ହେଲେ ଏହି ପ୍ରସଙ୍ଗକୁ ନିର୍ବାଚନ ପୂର୍ବରୁ କାହିଁକି ନାକ ଟେକୁଥିଲା। ତାହା ଆଜି ବି ଚର୍ଚ୍ଚାର ବିଷୟ।
ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ପୂର୍ବରୁ ଓଡ଼ିଶା ବିଧାନସଭାରେ ଜାତିଭିତ୍ତିକ ଜନଗଣନା ନେଇ ସର୍ବସମ୍ମତ ପ୍ରସ୍ତାବ ଗୃହୀତ କରାଇଥିଲେ। ମାତ୍ର ପରେ କରୋନା ଆସିଥିଲା। ଏହା ପରେ ପଛୁଆବର୍ଗ କମିସନ ସର୍ଭେକ୍ଷଣ କରାଯାଇଥିଲା। ମାତ୍ର ଏହାକୁ ପରିଚାଳନା କରିଥିଲେ ସଚିବାଲୟରେ କାର୍ଯ୍ୟରତ କେତେକ ସାଧାରଣ ବର୍ଗର ଅଧିକାରୀ। ଅତ୍ୟନ୍ତ ତରବରିଆ ଭାବେ ମନଇଚ୍ଛା ସାମ୍ପୁଲ ସଂଗ୍ରହ କରାଗଲା। ପୁରୁଣା ତଥ୍ୟ ଓ ଆସିଥିବା ରିପୋର୍ଟକୁ ତର୍ଜମା କରି ଜଣାଗଲା, ଏଥିରେ ଭୟଙ୍କର ତ୍ରୁଟି ହୋଇଛି। ତେଣୁ କମିସନ ସରକାରଙ୍କୁ ରିପୋର୍ଟ ଦେଇଥିଲେ ବି, ତାହା ସାର୍ବଜନୀନ ହୋଇପାରୁନାହିଁ। ତେଣୁ ନିର୍ବାଚନ ପୂର୍ବରୁ ବିଜେଡି ବ୍ୟାକଫୁଟରେ ରହିଲା। ରାଜନୈତିକ ଭାବେ ବିଜେପି ଦୁଇ ଜଣ ଚେହେରାଙ୍କୁ ଆଗକୁ ଆଣିଲା। ପଛୁଆବର୍ଗର ଧର୍ମେନ୍ଦ୍ର ପ୍ରଧାନ ଓ ମନମୋହନ ସାମଲଙ୍କ ହାତରେ ଦାୟିତ୍ୱ ରହିଲା। ପ୍ରତି ଜିଲ୍ଲାରେ ପଛୁଆବର୍ଗ କମିଟି କରାଗଲା। ତାହାର କାର୍ଯ୍ୟକାରିଣୀ ହେଲା। ଏମିତି କି ବିଜେପିରେ ଥିବା ବ୍ରାହ୍ମଣ, କରଣ, ବିହାରୀ, ମାରଓ୍ୱାଡି ନେତାମାନେ ମଧ୍ୟ କାର୍ଯ୍ୟକ୍ରମର ସୁପରିଚାଳନା କଲେ। ଅପରପକ୍ଷରେ ବିଜେଡିର ଓବିସି ସେଲ୍ ଗଠନ ହୋଇ ପାରିଲା ନାହିଁ। ବୈଠକ ବସିବା ଦୂରର କଥା। ଜନତା ଦଳରେ ଥିବା ବେଳେ ବିଜୟ ମହାପାତ୍ରଙ୍କ ଗୋଷ୍ଠୀରୁ ଉତୁରିଥିବା ନେତାମାନେ ସାମାଜିକ ନ୍ୟାୟ ରାଜନୀତି ଅପେକ୍ଷା ଟଙ୍କାକୁ ଅଧିକ ଗୁରୁତ୍ୱ ଦେଲେ। ଯାହାର ସିଧାସଳଖ ଫାଇଦା ନେଲା ବିଜେପି। ସରକାର ମଧ୍ୟ କଲା। ସରକାର ଆସିବା ପରେ ପ୍ରମୁଖ ଆଦିବାସୀ ସମ୍ପ୍ରଦାୟ ସାନ୍ତାଳ ବିଧାୟକ ମୁଖ୍ୟମନ୍ତ୍ରୀ ହେଲେ। ଖଣ୍ଡାୟତ ମହିଳା ପ୍ରଭାତୀ ପରିଡାଙ୍କୁ ଉପ ମୁଖ୍ୟମନ୍ତ୍ରୀ କରାଗଲା। ଅପରପକ୍ଷରେ ମୁଖ୍ୟ ବିରୋଧୀ ଦଳ ଥିବା ବିଜେଡି ବିରୋଧୀ ଦଳ ନେତା, ଉପ ନେତା, ମୁଖ୍ୟ ସଚେତକ, ବିରୋଧୀ ଦଳ ନେତାଙ୍କ ରାଜନୈତିକ ସଚିବ, ଲୋକସମ୍ପର୍କ ଅଧିକାରୀ ଏବଂ ବ୍ୟକ୍ତିଗତ ସହାୟକ ଗୁଡିକ ସାଧାରଣ ବର୍ଗ ହାତରେ ରହିଲା। ତେଣୁ ବିଜେପି ପରାଜୟରୁ ଶିଖିବା ପରିବର୍ତ୍ତେ ଆହୁରି ଭୁଲ୍ ଆଦରିଲା। ବର୍ତ୍ତମାନ ସାମାଜିକ ନ୍ୟାୟ ପ୍ରସଙ୍ଗରେ ନିଜର ସମର୍ଥନ ଜଣାଇଛି। ଆଗାମୀ ଦିନରେ ଏହି ପ୍ରସଙ୍ଗରେ କେତେ ଦୃଢ ଭାବରେ ଛିଡା ହେଉଛି, ତାହା ଦେଖିବାକୁ ବାକି ରହିଲା।
ଉଲ୍ଲେଖଯୋଗ୍ୟ, ସିପିଏମ୍ ଅଫିସରେ ହୋଇଥିବା ବୈଠକରେ କଂଗ୍ରେସ, ସପା, ଆରଜେଡି, ଏନସିପି, ସିପିଏମଏଲ୍, ସାମାଜିକ ନ୍ୟାୟ ଯୁବ-ଛାତ୍ର ସଙ୍ଗଠନ ପ୍ରମୁଖ ଅଂଶଗ୍ରହଣ କରିଥିଲେ। ତିନି ବର୍ଷ ବିଳମ୍ବ ରେ ଦେଶରେ ଜନ ଗଣନା ପାଇଁ ଘୋଷଣା ହୋଇଛି। ଜନ ଗଣନା ରେ ପ୍ରତ୍ୟେକ ବ୍ୟକ୍ତି ର ଲିଙ୍ଗ, ବୟସ, ଧର୍ମ, ଶିକ୍ଷା, ଆଦି ତଥ୍ୟ ସଂଗ୍ରହ ବ୍ୟବସ୍ଥା ରହିଛି। ମାତ୍ର ଜାତିଗତ ତଥ୍ୟ ସଂଗ୍ରହ କରାଯାଉ ନାହିଁ। ଆମ ଦେଶ ଭାରତ ରେ ୩୦୦୦ ଜାତି ଓ ୨୫୦୦୦ ଉପଜାତି ବସବାସ କରୁଛନ୍ତି। ଜାତି ଭିତ୍ତି ଏବଂ ସାମାଜିକ ସ୍ଥିତି ଆଧାର ରେ ଶିକ୍ଷା ଏବଂ ସରକାରୀ ଚାକିରି ରେ ସଂବିଧାନ ନିର୍ଦ୍ଦେଶ ଅନୁସାରେ ସଂରକ୍ଷଣ ବ୍ୟବସ୍ଥା ରହିଛି।
ଅତଏବ ଜନ ଗଣନା ମାଧ୍ୟମ ରେ ଜାତିଗତ ସଂଖ୍ୟା ନିରୂପଣ ଏକ ସାମାଜିକ, ଆର୍ଥିକ ଏବଂ ରାଜନୈତିକ ଆବଶ୍ୟକତା। ଏହି ପୃଷ୍ଠଭୁମି ରେ ଓଡ଼ିଶା ରାଜ୍ୟରେ ଜାତିଗତ ଜନଗଣନା କୁ ଜନ ଗଣନା ରେ ଯୁକ୍ତ କରିବା ପାଇଁ ସମସ୍ତ  ବିରୋଧୀ ଦଳ ମାନଙ୍କ ତରଫ ରୁ ଦାବି କରାଯାଇଛି
ନିଜର ହିନ୍ଦୁତ୍ବ କର୍ମସୂଚୀ କୁ କାର୍ଯ୍ୟକାରୀ କରିବା ପାଇଁ କେନ୍ଦ୍ର ର ବିଜେପି ସରକାର ଜାତିଗତ ଜନଗଣନା ଦାବି କୁ କ୍ରମାଗତ ଭାବେ ଅଗ୍ରାହ୍ୟ କରି ଆସିଛି। ରାଜ୍ୟ ବିଜେପି ସରକାର ଏହି ଦାବି ସମ୍ପର୍କ ରେ  କର୍ଣ୍ଣପାତ କରୁ ନାହାଁନ୍ତି । ରାଜ୍ୟରେ ପଛୁଆବର୍ଗ ଶିକ୍ଷାରେ ଆଦୌ ସଂରକ୍ଷଣ ପାଉନାହାନ୍ତି l ନିଯୁକ୍ତିରେ ମାତ୍ର 27 ପ୍ରତିଶତ ବଦଳରେ ମାତ୍ର 11 ପ୍ରତିଶତ ପାଉଛନ୍ତି l ଅନୁରୂପ ଭାବେ ଉଚ୍ଚ ଶିକ୍ଷା (ମେଡ଼ିକାଲ ଓ ଇଞ୍ଜିନିୟରିଂ) ରେ ସେମାନଙ୍କୁ ସଂଖ୍ୟାନୁପାତରେ ସଂରକ୍ଷଣ ମିଳୁ l ସେମାନଙ୍କ ସଂଖ୍ୟା ୩୮.୭୫ % ହୋଇଥିବା ବେଳେ ସେମାନଙ୍କୁ ମାତ୍ର 20% ସଂରକ୍ଷଣ ମିଳୁଛି l

ରାଜ୍ୟର ସମସ୍ତ  ବିରୋଧୀ ଦଳ ମାନଙ୍କର ଏକ ରାଜ୍ୟ ସ୍ତରୀୟ ବୈଠକ ସି ପି ଆଇ(ଏମ୍) ରାଜ୍ୟ ଅଫିସ ରେ ଅନୁଷ୍ଠିତ ହୋଇ ଏହି ଦାବି କରଯାଇଛି। ଜାତିଗତ ଜନ ଗଣନା କଲେ ହିଁ ସଂରକ୍ଷଣ ଭଳି ସାମ୍ବିଧାନିକ ବ୍ୟବସ୍ଥାକୁ ନିରପେକ୍ଷତା ର ସହିତ କାର୍ଯ୍ୟକାରୀ କରାଯାଇପାରିବ। ଅନୁସୂଚିତ ଜାତି, ଜନଜାତି ଏବଂ ପଛୁଆ ବର୍ଗ ଶିକ୍ଷା ଏବଂ ନିଯୁକ୍ତିର କ୍ଷେତ୍ର ରେ ସେମାନଙ୍କର ସାମ୍ବିଧାନିକ ହକ ପାଇ ପାରିବେ ବୋଲି ଏହି ବୈଠକ ରେ ବିରୋଧୀ ଦଳ ମାନେ ସହମତ ହୋଇଛନ୍ତି। ଏହି ଗୁରୁତ୍ଵପୂର୍ଣ୍ଣ ପ୍ରସଙ୍ଗ ଉପରେ ସମଭାବାପର୍ଣ୍ଣ ଦଳ ମାନଙ୍କ ତରଫରୁ ଖୁବ୍ ଶୀଘ୍ର ନଭେମ୍ବର ଦ୍ଵିତୀୟ ସପ୍ତାହ ରେ ଭୁବନେଶ୍ବର ରେ ଏକ ରାଜ୍ୟ ସ୍ତରୀୟ କନଭେନ୍ସନ୍ ଆୟୋଜନ କରିବା ପାଇଁ ନିଷ୍ପତ୍ତି ହୋଇଛି।