ବିଜେଡି ଯିବାକୁ ମନସ୍ଥିର କରିସାରିଲେଣି ଚିରଞ୍ଜୀବ ବିଶ୍ୱାଳ, ଦଶହରା ବେଳକୁ ଧରିପାରନ୍ତି ଶଙ୍ଖ
ଭୁବନେଶ୍ୱର : ୨୦୧୯ ସାଧାରଣ ନିର୍ବାଚନରେ ଉପକୂଳରେ କିଏ ଟିକେଟ୍ ପାଇବେ, ତାହା ସ୍ଥିର କରୁଥିଲେ ରିରଞ୍ଜୀବ ବିଶ୍ୱାଳ। ସେ ସମୟର କଂଗ୍ରେସ ସଭାପତି ରାହୁଲ ଗାନ୍ଧୀ ଚିରଞ୍ଜୀବ ବିଶ୍ୱାଳଙ୍କୁ କାର୍ଯ୍ୟକାରୀ ପିସିସି ସଭାପତି କରିଥିଲେ। ହେଲେ କାର୍ଯ୍ୟକାରୀ ସଭାପତି ମହୋଦୟ ନିଜେ ଜଗତସିଂହପୁର ବିଧାନସଭା ଆସନରୁ ହାରି ଗଲେ। ଏହା ପରେ ଦଳର ନେତୃତ୍ୱ ପରିବର୍ତ୍ତନ ସ୍ୱର ତୀବ୍ର ହେଲା। ଶ୍ରୀ ବିଶ୍ୱାଳ ଚାହିଁଥିଲେ ପିସିସି ସଭାପତି ହୋଇପାରିଥାନ୍ତେ। ହେଲେ ଏତେ ବଡ ଦାୟିତ୍ୱ ନେବା ପାଇଁ ଆଗ୍ରହ ଦେଖାଇଲେ ନାହିଁ। ଆଗାମୀ ଦିନରେ କଂଗ୍ରେସରେ ନିଜ ଭବିଷ୍ୟତ ଦେଖି ପାରୁ ନାହାନ୍ତି ବସନ୍ତ ନନ୍ଦନ ଚିରଞ୍ଜୀବ। ତେଣୁ 2024ରେ ସେହି ଜଗତସିଂହପୁର ବିଧାନସଭାରୁ ନିଶ୍ଚିତ ଜିତିବା ପାଇଁ ଶାସକ ଦଳ ବିଜେଡିରେ ଯୋଗ ଦେବାକୁ ମନସ୍ଥିର କରିସାରିଲେଣି। ଶ୍ରୀ ବିଶ୍ୱାଳଙ୍କ ନିକଟତମ ମହଲରୁ ଏ ଖବର ଶୁଣିବାକୁ ମିଳିଲାଣି।
ବିଶ୍ୱାଳ ବିଜେଡି ଯିବା ଦ୍ୱାରା ଜଗତସିଂହପୁର କଂଗ୍ରେସ ରାଜନୀତି ବହୁଳ ଭାବେ ପ୍ରଭାବିତ ହେବ। ତିର୍ତୋଲ ଏବଂ ଜଗତସିଂହପୁର କଂଗ୍ରେସ ଭୋଟର ବିଶ୍ୱାଳ ପରିବାରର ପୁରୁଣା ସମର୍ଥକ। ତେଣୁ କଂଗ୍ରେସର ଭୋଟ ହାର ଅହେତୁକ ହ୍ରାସ ପାଇବ। ଏହା କଂଗ୍ରେସର ସାମଗ୍ରିକ ଭାବେ ଜଗତସିଂହପୁର ଲୋକସଭା ଭୋଟକୁ ମଧ୍ୟ ପ୍ରଭାବିତ କରିବ। ନିରଞ୍ଜନଙ୍କ ପରେ ଶରତ ପଟ୍ଟନାୟକ ପିସିସି ସଭାପତି ଦାୟିତ୍ୱ ନେବା ପରେ ତାଙ୍କୁ ଅବହେଳା କରାଯାଇଥିବା ସେ ଅନୁଭବ କରୁଛନ୍ତି। ଏକଥା ନିକଟରେ ସେ ଏକ ମଞ୍ଚରେ ମଧ୍ୟ କହିଥିଲେ। ଶ୍ରୀ ବିଶ୍ୱାଳ କହିଥିଲେ ଯେ, ଆମ ଦଳର 9 ବିଧାୟକ ହେଲେ 20 ଜଣ ମୁଖ୍ୟମନ୍ତ୍ରୀ ପ୍ରାର୍ଥୀ। ପିସିସି ହେବା ପୂର୍ବରୁ ସମସ୍ତେ ପଚାରନ୍ତି ହେଲେ , ଥରେ ଚୌକି ପାଇବା ପରେ ଭୁଲି ଯାଆନ୍ତି। ଆଗାମୀ ଦିନରେ କଂଗ୍ରେସକୁ 147ଟି ଆସନରେ ପ୍ରାର୍ଥୀ ପାଇ ନ ପାରେ ବୋଲି ଚିରଞ୍ଜୀବ ମତ ରଖିଥିଲେ। ଏହି ମତାମତକୁ ନେଇ ସୁର ରାଉତରାୟ ଏବଂ ଅନ୍ୟମାନେ ପ୍ରତିକ୍ରିୟା ପ୍ରକାଶ କରିଥିଲେ। ଦିନକ ପୂର୍ବରୁ ଚିରଞ୍ଜୀବଙ୍କ ସମେତ ମହମ୍ମଦ ମୋକ୍କିମଙ୍କୁ ଏଆଇସିସି ପକ୍ଷରୁ ଦଳ ବିରୋଧି ମନ୍ତବ୍ୟ ପାଇଁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି।
ଯଦି ଚିରଞ୍ଜୀବ ବିଜେଡିରେ ଯୋଗ ଦିଅନ୍ତି, ତେବେ ରାଜଧାନୀ କିମ୍ବା ଜଗତସିଂହପୁର ପୌରାଞ୍ଚଳରେ ଏକ ମିଶ୍ରଣ ପୂର୍ବରେ ସେ ଯୋଗ ଦେବେ। ଆସନ୍ତା ଦଶହରା ବେଳକୁ ଏହି ମିଶ୍ରଣ ପର୍ବ ଅନୁଷ୍ଠିତ ହେବେ। ଚିରଞ୍ଜୀବ ବିଜେଡିରୁ ଜଗତସିଂହପୁର ଆସନରୁ ଲଢିଲେ ବର୍ତ୍ତମାନର ବିଧାୟକ ପ୍ରଶାନ୍ତ ମୁଦୁଲି ବାଲିକୁଦା-ଏରସମାରୁ ଲଢିବେ। ଶାରୀରିକ ଅସୁସ୍ଥତା କାରଣରୁ ରଘୁନନ୍ଦନ ଦାସ ନିର୍ବାଚନ ଲଢିବେ ନାହିଁ। ବର୍ତ୍ତମାନର ସାଂସଦ ଥିବା ରାଜଶ୍ରୀ ମଲ୍ଲିକ ତିର୍ତ୍ତୋଲରୁ ପ୍ରାର୍ଥୀ ହେବେ। ଏରସମାରୁ ପୁନର୍ବାର ଦାମ ରାଉତଙ୍କ ପୁତ୍ର ସମ୍ବିତ ରାଉତରାୟ ପ୍ରାର୍ଥୀ ହେବେ ବୋଲି ଜଣାପଡିଛି।
