କାହିଁକି ସୁରଙ୍କ ବିରୋଧରେ ହେଲାନି କାର୍ଯ୍ୟାନୁଷ୍ଠାନ.. ମୋକ୍କିମ୍,ଚିରଞ୍ଜୀବ ଉପରେ କାହିଁକି ନିଲମ୍ବନ…ଜାଣନ୍ତୁ…
ଭୁବନେଶ୍ୱର : ଦଳର ପରିସ୍ଥିତି ବିପର୍ଯ୍ୟସ୍ତ ଅବସ୍ଥାରେ ରହିଛି। ବିଜେଡି ଓ ବିଜେପିକୁ ସମ୍ମୁଖିନ ହେବାକୁ ସାଧାନ ନାହିଁ। ମାତ୍ର ଏହି ପରିସ୍ଥିତିରେ ଓଡ଼ିଶା କଂଗ୍ରେସ ପକ୍ଷରୁ ଏଆଇସିସି ଦ୍ୱାରା ଏକ ବଡ଼ ନିଷ୍ପତ୍ତି ନିଆଯାଇଛି। ଏହି ନିଷ୍ପତ୍ତି କଂଗ୍ରେସ ମହଲରେ ଆଲୋଡ଼ନ ସୃଷ୍ଟି କରିଛି। ବର୍ତ୍ତମାନ କଟକ-ବାରବାଟୀ ବିଧାୟକ ଥିବା ମହମ୍ମଦ ମୋକ୍କିମ ଏବଂ ପୂର୍ବତନ ପିସିସି କାର୍ଯ୍ୟକାରୀ ସଭାପତି ଚିରଞ୍ଜୀବ ବିଶ୍ୱାଳଙ୍କୁ ଦଳରୁ ନିଲମ୍ବନ କରାଯାଇଛି। ହେଲେ ସମାନ ପ୍ରସଙ୍ଗରେ ସୁର ରାଉତରାୟଙ୍କ ଦେହରେ ଏଆଇସିସି ହାତ ମାରିନାହିଁ।
ଧର୍ମେନ୍ଦ୍ର ପ୍ରଧାନ ବଢିଆ ପିଲା। ମୋ ଜଟଣା ପାଇଁ ବହୁତ କରିଛି। ଅପରାଜିତା ବଢିଆ ନେତ୍ରୀ। ଅଶ୍ୱିନୀ ବୈଷ୍ଣବ ଓଡ଼ିଶାରୁ ଯାଇଛନ୍ତି, ଭଲ କାମ କରୁଛନ୍ତି। ବିଜେପିର କେନ୍ଦ୍ର ମନ୍ତ୍ରୀ ବଢିଆ। ଆମେ ଆମର କେନ୍ଦ୍ର ମନ୍ତ୍ରୀମାନଙ୍କୁ ଦେଖିବାକୁ ପାଉ ନ ଥିଲୁ। ଉପରୋକ୍ତ କେଇ ପଦ କଥା ସୁର ରାଉତରାୟ ବିଭିନ୍ନ ଗଣମାଧ୍ୟମ ଆଗରେ ଘୋଷି ହେଉଥାନ୍ତି। କଂଗ୍ରେସର ଅଫସୁଟ୍ ଜନତା ଦଳ(ବିଜେଡି) ଅପେକ୍ଷା ବିଜେପିକୁ ଅଧିକ ସୁହାଇଥାଏ। ଦଳ କୌଣସି ନିଷ୍ପତ୍ତି ନେବା ପୂର୍ବରୁ ବିଭିନ୍ନ ପ୍ରସଙ୍ଗରେ ସୁର ରାଉତରାୟ ମତ ଦେଇଥାନ୍ତି। ତାଙ୍କୁ ମଧ୍ୟ ଥରେ କାରଣ ଦର୍ଶାଅ ନୋଟିସ୍ ହୋଇଥିଲା। ମାତ୍ର ସେ ତାହାର ଉତ୍ତର ଦେଇନାହାନ୍ତି କି ଦେବେ ନାହିଁ ବୋଲି ଜଣାପଡିଛି। ତାଙ୍କ ପୁଅ ବିଜେଡି କିମ୍ବା ବିଜେପିରୁ ଲଢିପାରେ ବୋଲି ଚର୍ଚ୍ଚା ହେଲାଣି। ଏହା ସତ୍ତ୍ୱେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ କରାଗଲା ନାହିଁ। ସୁର ରାଉତରାୟ ପ୍ରତିଦିନ ଦଳୀୟ କାର୍ଯ୍ୟାଳୟ ଆସିବା ସହ ସମସ୍ତ ବୈଠକରେ ଯୋଗ ଦେଉଛନ୍ତି। ପିସିସ ସଭାପତି କିମ୍ବା ପ୍ରଭାରୀଙ୍କ କୌଣସି କଥାକୁ ନୀତିଗତ ଭାବେ ବିରୋଧ କରିନାହାନ୍ତି। ରାଜଧାନୀ ତଥା ମୁଖ୍ୟାଳୟରେ କଂଗ୍ରେସକୁ ସକ୍ରିୟ ରଖିବାରେ ତାଙ୍କର ଏକ ବିଶେଷ ଭୂମିକା ରହିଛି। ତେଣୁ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହୋଇଥିବା ଏଆଇସିସି ସୂତ୍ରରୁ ପ୍ରକାଶ।
ଝାରସୁଗୁଡ଼ାରେ ନିର୍ବାଚନ ଚାଲୁଥିବା ସମୟରେ ଚିରଞ୍ଜୀବ ଦଳ ବିରୋଧରେ ମନ୍ତବ୍ୟ ଦେଇଥିଲେ। ସେ ଯେଉଁ କାର୍ଯ୍ୟକ୍ରମରେ ଏହା କହିଥିଲେ, ତାହାର ଆୟୋଜକ ଥିଲେ ମହମ୍ମଦ ମୋକ୍କିମ। ମୋକ୍କିମ ଏହା ପୂର୍ବରୁ ରାଷ୍ଟ୍ରପତି ନିର୍ବାଚନରେ ଦଳୀୟ ହ୍ୱିପ୍ ମାନି ନ ଥିଲେ। ଏହି ସବୁ ଘଟଣା ପରେ ତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଥିଲା। ସେମାନେ ଏହାର ଉତ୍ତର ଦେଇଛନ୍ତି ନା ନାହିଁ ଜଣା ନାହିଁ। ମାତ୍ର ପିସିସି ସଭାପତି ଓ ପିସିସି ପ୍ରଭାରୀ ଥିବା କୌଣସି ଦଳୀୟ କାର୍ଯ୍ୟକ୍ରମକୁ ଦୀର୍ଘଦିନ ଧରି ଉଭୟ ମୋକ୍କିମ୍ ଏବଂ ଚିରଞ୍ଜୀବ ଆସିଲେ ନାହିଁ। ତେଣୁ ଦଳ ବିରୋଧି ମନ୍ତବ୍ୟ ସହ କାର୍ଯ୍ୟକ୍ରମରୁ ନିଜକୁ ଦୂରେଇ ରଖିବା ପାଇଁ ଉଭୟଙ୍କୁ ନିଲମ୍ବନ କରାଯାଇଥିବା କଂଗ୍ରେସ ସୂତ୍ରରୁ ପ୍ରକାଶ।
