ପିସିସି କମିଟି ଘୋଷଣା କର୍ମୀଙ୍କ ମନରେ ଉତ୍ସାହ ଭରି ପାରିଲା ନାହିଁ …..ସମଭାବାପନ୍ନ ଦଳକୁ ସାଥିରେ ନେବ କିଏ…
ଭୁବନେଶ୍ୱର,୨୬/୪(ବ୍ୟୁରୋ): ମାସକ ପରେ ପିସିସି ସଭାପତି ଭାବେ ଦାୟିତ୍ୱ ନେବାର ଶରତ ପଟ୍ଟନାୟକ ବର୍ଷ ପୂର୍ତ୍ତି ପାଳନ କରିଥାନ୍ତେ। ପିସିସି ସଭାପତି ଦାୟିତ୍ୱ ନେବାର ପରେ କମିଟି ଟିଏ କରିବା ପାଇଁ ତାଙ୍କୁ ୧୧ ମାସ ଲାଗିଗଲା। କମିଟି ଜୁମ୍ବୋ ହୋଇଛି, ହେଲେ କେତେକ ଦୃଷ୍ଟିରୁ ଶରତଙ୍କ ପାଇଁ ନିରାପଦ। କାରଣ ପୂର୍ବରୁ ନିରଞ୍ଜନ ଏବଂ କେ.ପି ସିଂଦେଓଙ୍କ ପରି ୩ ଜଣିଆ କାର୍ଯ୍ୟକାରୀ ସଭାପତି ଘୋଷଣା କରାଯାଇନାହିଁ। ମାତ୍ର କମିଟି ଘୋଷଣା ପରେ ତାରା, ଅଧିରାଜଙ୍କ ବୟାନ ଶରତଙ୍କୁ ଚିନ୍ତାରେ ପକାଇବ।
ତାରା କହିଲେ ଯେ, ତାଙ୍କ ନାଁ କାଫି, ତାଙ୍କୁ ପଦ ଦରକାର ନାହିଁ। ସେ ନିଜ ନିର୍ବାଚନ ମଣ୍ଡଳୀରେ ଅଧିକ ସମୟ ଦେବେ। ରାଜ୍ୟ ଦାୟିତ୍ୱ ନେବେ ନାହିଁ। ଠିକ୍ ତାରାଙ୍କ କଥାରେ ଏକ ସ୍ୱର ହେଲାଭଳି ଅଧିରାଜ ମୋହନ ପାଣିଗ୍ରାହୀ ମଧ୍ୟ ସେପରି କହିଲେ। ରାଜ୍ୟସ୍ତରୀୟ ଦାୟିତ୍ୱ ନେବା ପରେ ନିଜ ଅଞ୍ଚଳରେ ସମୟ କମିଯିବ ବୋଲି ପାଣିଗ୍ରାହୀ କହିଲେ। ଅବଶ୍ୟ ଜିତିଥିବା କଂଗ୍ରେସ ବିଧାୟକମାନେ ଦଳ ଅପେକ୍ଷା ନିଜର ଦକ୍ଷତା ବଦଳରେ ଜିତିଛନ୍ତି। ତେଣୁ ସ୍ୱାଭାବିକ ଭାବେ ଜିତିବା ପାଇଁ ସେମାନେ ଉଦ୍ୟମ କରିବେ। ମାତ୍ର ଶରତ କେଉଁ କୋର ଟିମ୍ କୁ ଧରି ଆଗକୁ ଯିବେ, ତାହାର କୌଣସି ଆଭାସ ମିଳିପାରିଲା ନାହିଁ। କେତେକଙ୍କ ମତରେ ଭବିଷ୍ୟତରେ ନିରଞ୍ଜନ ପଟ୍ଟନାୟକଙ୍କ ପୁତ୍ର ନବଜ୍ୟୋତି ପଟ୍ଟନାୟକଙ୍କୁ ରାଜ୍ୟସ୍ତରୀୟ ନେତା କରିବା ପାଇଁ ଯାହା ଦରକାର, ସେପରି ଅନୁଗତ ମାନଙ୍କୁ କମିଟିରେ ରଖାଯାଇଛି। ଜାତୀୟ ସ୍ତରରେ କଂଗ୍ରେସ ସହଯୋଗୀ ଏବଂ ସମଭାବାପନ୍ନ ଦଳ ସହ ମେଣ୍ଟ କରିବାକୁ ଚିନ୍ତା କରୁଛି। ହେଲେ ରାଜ୍ୟ କଂଗ୍ରେସ ମେଣ୍ଟ କରିବା କଥା ଚିନ୍ତା କରି ପାରୁନି। ୧୪୭ ବିଧାନସଭା ପ୍ରାର୍ଥୀ ଏବଂ ୨୧ ଲୋକସଭା ପ୍ରାର୍ଥୀ ବାଛି ପାରୁନାହିଁ। କଂଗ୍ରେସରେ ରହି ପଦ ପାଇ ସୋସିଆଲ ମିଡିଆରେ ନିଜର ପ୍ରଚାରରେ ଦଳୀୟ ନେତା ଗୁରୁତ୍ୱ ଦେଉଛନ୍ତି। କେତେକ ଲୋକ କେବଳ କଂଗ୍ରେସ ଟିକେଟରେ ଲଢିବାକୁ ଚାହୁଁଛନ୍ତି। ହେଲେ ଦଳକୁ ଜିତାଇବାକୁ ନୁହେଁ, ନିଜ ରାଜନୈତିକ ସ୍ଥିତି ଦଳ କିଛି ଦଳୀୟ ପାଣ୍ଠି ହାତେଇବାକୁ । ଏପରି ଯଦି ହୁଏ, ତେବେ କଂଗ୍ରେସ 4ରୁ5 ଟି ଆସନରେ ସୀମିତ ହୋଇଯିବ। କଂଗ୍ରେସ, ବାମଦଳ, ଜେଏମ୍ଏମ୍, ଏସପି, ଏନସିପି , ଜନତା ଦଳର ଅନ୍ୟ ଗ୍ରୁପ୍ଏବଂ ସମତାକ୍ରାନ୍ତିକୁ ନେଇ ଉଦ୍ୟମ କରିବାକୁ ରୋଡ୍ ମ୍ୟାପ୍ ପ୍ରସ୍ତୁତି ହୋଇଛି। କଂଗ୍ରେସ ନେତୃବୃନ୍ଦଙ୍କ ଆଗ୍ରହ ଉପରେ ଏ ସବୁ ନିର୍ଭର କରୁଛି। ହେଲେ କଂଗ୍ରେସ ଦଳ କିମ୍ବା ଜାତୀୟ ସ୍ତରରେ ୟୁପିଏର ଉତ୍ଥାନ ଅପେକ୍ଷା ନିଜ ନିଜ ଚୌକି ବଞ୍ଚାଇବାରେ ବ୍ୟସ୍ତ।
ପୂର୍ବତନ ଏମପି ରଞ୍ଜିବ ବିଶ୍ୱାଳଙ୍କୁ ଏଆଇସିସିର ବିଭିନ୍ନ ପଦରୁ ବାଦ୍ ଦିଆଯାଇଥିଲା। ନିକରେ ପିସିସିର କୌଣସି କମିଟିରେ ତାଙ୍କୁ ଦେଖିବାକୁ ମିଳିନାହିଁ। ଚିରଞ୍ଜୀବଙ୍କୁ କେବଳ କାର୍ଯ୍ୟକାରିଣୀ କମିଟିରେ ସ୍ଥାନ ଦିଆଯାଇଛି। ମାତ୍ର 2 ଭାଇ ବିଜେଡି ଯିବା ନେଇ ପ୍ରସ୍ତୁତ ହେଉଥିବା ଏକ ଗୁଞ୍ଜରଣ ସୃଷ୍ଟି ହୋଇଛି। ବିଶ୍ୱାଳ ପରିବାରର ବହୁ ନିକଟତମ ବ୍ୟକ୍ତିଙ୍କୁ ଚଳିତଥର ପିସିସି କମିଟିରେ ସ୍ଥାନ ମିଳିନାହିଁ। , ୨୦୧୯ ସାଧାରଣ ନିର୍ବାଚନ ପୂର୍ବରୁ ନିରଞ୍ଜନ ପଟ୍ଟନାୟକଙ୍କୁ ପିସିସି ସଭାପତି କରିଥିଲେ ମଧ୍ୟ ନବକିଶୋର ଦାସ, ଚିରଞ୍ଜିବୀ ବିଶ୍ୱାଳ ଓ ପ୍ରଦୀପ ମାଝୀଙ୍କୁ କାର୍ଯ୍ୟକାରୀ ସଭାପତି କରିଥିଲା । ନବ ଓ ପ୍ରଦୀପ କଂଗ୍ରେସ ଛାଡ଼ି ବିଜେଡିରେ ସାମିଲ ହୋଇଥିଲେ । ଆଉ ଚିରଞ୍ଜିବୀ କଂଗ୍ରେସରେ ରହି ବିଜେଡିକୁ ଲମ୍ଫ ଦେବା ଚର୍ଚ୍ଚା କାରଣରୁ କାର୍ଯ୍ୟକାରୀ ସଭାପତି ପଦ ରଖାଯାଇନାହିଁ।
କେଉଁ ପ୍ରସଙ୍ଗ ଆଧାରରେ କଂଗ୍ରେସ ଭୋଟ ଲଢିବ, ତାହା ସ୍ଥିର କରାଯାଇପାରୁନାହିଁ। ବିଜୟ ପଟ୍ଟନାୟକଙ୍କୁ ପ୍ରଚାର କମିଟି ଅଧ୍ୟକ୍ଷ କରାଯିବାକୁ ନେଇ କେତେକ ଅସନ୍ତୋଷ ଜାହିର କରିଛନ୍ତି। ଏହା ପୂର୍ବରୁ ଶ୍ରୀକାନ୍ତ ଜେନାଙ୍କୁ ବିଜୟଙ୍କ ଭେଟିବାକୁ ମଧ୍ୟ ଶରତ,ନରସିଂହ, ନିରଞ୍ଜନ, ଅନନ୍ତ, ଆର୍ଯ୍ୟ କୁମାର ଜ୍ଞାନେନ୍ଦ୍ର ନାପସନ୍ଦ କରିଛନ୍ତି। ବିଜୟ ପଟ୍ଟନାୟକ କାଳେ ଟଙ୍କା ଖର୍ଚ୍ଚ କରିବେ, ସେଥିପାଇଁ ତାଙ୍କୁ ଦାୟିତ୍ୱ ଦିଆଯାଇଛି। ହେଲେ ଅସଜଡା ଘରେ ବିଜୟ କାହିଁକି ନିବେଶ କରିବେ, ତାହା ମଧ୍ୟ ପ୍ରଶ୍ନବାଚୀ ସୃଷ୍ଟି କରିଛି।
