ନିର୍ବାଚନ ଯେତେ ପାଖଉଛି, ତାଳଚେର କଥା ସେତେ ମନେ ପଡୁଛି.. ଆଗକୁ ଜୋର ଧରିବ ସ୍ୱତନ୍ତ୍ର ଜିଲ୍ଲା ଦାବି …

ତାଳଚେର : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତକାଲି ତାଳଚେର ପାଇଁ ଏକାଧିକ ଘୋଷଣା କରିଛନ୍ତି। ଏହି ଘୋଷଣା ପୂର୍ବରୁ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ୫-ଟି ସଚିବ ତାଳଚେର ଗସ୍ତ କରିଥିଲେ। ଦୀର୍ଘଦିନ ତଳେ ଅନୁଗୁଳ ଜିଲ୍ଲାର ତାଳଚେରକୁ ଏତେଟା ଗୁରୁତ୍ୱ ପ୍ରଦାନ କରାଯାଇଛି। ଯାହା ସ୍ଥାନୀୟ ଅଞ୍ଚଳରେ ଚର୍ଚ୍ଚାର କାରଣ ହୋଇଛି।  ଆଗାମୀ ଦିନରେ ମଧ୍ୟପ୍ରଦେଶରୁ ରାଜ୍ୟସଭା ଯାଇଥିବା ଧର୍ମେନ୍ଦ୍ର ପ୍ରଧାନ ଢେଙ୍କାନାଳ ଲୋକସଭାରେ ପ୍ରାର୍ଥୀ ହେବେ ବୋଲି ଜୋରଦାର ଆଲୋଚନା ହେଉଛି। ତେଣୁ ଢେଙ୍କାନାଳ ଆସନକୁ ଲଗାତର ଜିତି ଆସୁଥିବା ବିଜେଡି ନିର୍ବାଚନ ପୂର୍ବରୁ ଏକାଧିକ ଘୋଷଣା କରି ରାଜ୍ୟ ସରକାର ସପକ୍ଷବାଦୀରାଜନୈତିକ ପରିବେଶ ସୃଷ୍ଟି କରୁଥିବା ଆଲୋଚନା ହେଉଛି।

ଦୁଇଦିନ ପୂର୍ବରୁ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତାଳଚେରର ଅଧିଷ୍ଠାତ୍ରି ଦେବି ମା ହିଙ୍ଗୁଳାଙ୍କ ପୀଠ ଗୋପାଳପ୍ରସାଦ ଯାଇଥିଲେ । ଏହି ପୀଠର ଉନ୍ନତିକରଣ ପାଇଁ ଦୀର୍ଘ ଦିନରୁ ଅନେକ କାର୍ଯ୍ୟକ୍ରମ ଚାଲିଛି । ଏମସିଏଲ ର ସିଏସଆର ଫଣ୍ଡ  ଏବଂ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଥିବା ବେଳେ ଧର୍ମେନ୍ଦ୍ର ପ୍ରଧାନଙ୍କ ଯୋଗୁ ଓଏନଜିସି ପାଣ୍ଠି ଦ୍ୱାରା କିଛି ପ୍ରକଳ୍ପ କାର୍ଯ୍ୟକ୍ଷମ ହୋଇଛି ।ହେଲେ ଅଧିକାଂଶ ଉନ୍ନୟନ କାର୍ଯ୍ୟ ଶ୍ରଦ୍ଧାଳୁମାନଙ୍କ ଦାନରେ ହୋଇଥାଏ। ଦୀର୍ଘଦିନ ଧରି ରାଜ୍ୟ ସରକାରଙ୍କ ପକ୍ଷରୁ କୌଣସି ସ୍ୱତନ୍ତ୍ର କାର୍ଯ୍ୟକ୍ରମ ଏହି ପୀଠ ପାଇଁ ନ ଥିଲା। ସେହିପରି ତାଳଚେରବାସୀଙ୍କ ଦୀର୍ଘଦିନର ଦାବି ତାଳଚେର ମେଡ଼ିକାଲ କଲେଜର କାର୍ଯ୍ୟକ୍ଷମ କରିବା । ୨୦୧୫ ସେପ୍ଟେମ୍ବର ମାସରେ ମୁଖ୍ୟମନ୍ତ୍ରୀ ଏହାର ଶୁଭ ଦେଇଥିଲେ । ସେତେବେଳେ ଏହି କାର୍ଯ୍ୟକ୍ରମରେ ତତ୍କାଳନୀ କେନ୍ଦ୍ର କୋଇଲା ମନ୍ତ୍ରୀ ପୀୟୂଷ ଗୋଏଲ ଓ ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉପସ୍ଥିତରେ ତିନି ବର୍ଷରେ ଅର୍ଥାତ ୨୦୧୮ ସୁଦ୍ଧା କାର୍ଯ୍ୟକାରୀ ହେବ ବୋଲି କୁହାଯାଇଥିଲା ।ଏହା ପାଇଁ ଅର୍ଥ MCL ଦେଇଛି ।କିଂତୁ ଆଠ ବର୍ଷ ହେଲା ରାଜନୀତି ଜୋର ହେଉଛି।  ହେଲେ ମେଡିକାଲ କଲେଜଟି ପୂର୍ଣ୍ଣାଙ୍ଗ କାର୍ଯ୍ୟକ୍ଷମ ହୋଇପାରିଲା ନାହିଁ।  ମାତ୍ର ରାଜ୍ୟ ସରକାର  ଆସନ୍ତା ଅକ୍ଟୋବର ମାସରେ ଖୋଲିବ ନେଇ ଘୋଷଣା କରିବା ସହ ଏହାର ନାଁ ମିମସାରରୁ ପବିତ୍ର ମୋହନ ପ୍ରଧାନ ମେଡ଼ିକାଲ କଲେଜ ନାଁ ନାମିତ କରିଛନ୍ତି । ପୂର୍ବତନ ମୁଖ୍ୟମନ୍ତ୍ରୀ ପବିତ୍ର ମୋହନ ପ୍ରଧାନଙ୍କ ପ୍ରତି ସରକାର ହଠାତ ଅଧିକ ଯତ୍ନବାନ ହୋଇ ଉଠିଛନ୍ତି । କଣିହାଁରେ ତାଙ୍କ ସ୍ମୃତିପୀଠର ଉନ୍ନତିକରଣ, କଣିହାଁରେ ବ୍ରାହ୍ମଣୀ ନଦୀ ଉପରେ ସେତୁର ନାଁ ପବିତ୍ର ପ୍ରଧାନଙ୍କ ନାଁ ନାମିତ ରାଜଧାନୀରେ ସଂଗ୍ରାମୀ ପବିତ୍ର ପ୍ରଧାନଙ୍କ ପୂର୍ଣ୍ଣବୟାବ ପ୍ରତିମୂର୍ତ୍ତି ସ୍ଥାପନ ନିଷ୍ପତ୍ତି ନେଇଛନ୍ତି ରାଜ୍ୟସରକାର । କିଛି ବର୍ଷ ହେବ ଏହି ସବୁ ଦାବି ଉଠାଯାଉଥିଲା ମାତ୍ର କୌଣସି ସୁଫଳ ମିଳୁ ନ ଥିଲା। ହେଲେ ଧର୍ମେନ୍ଦ୍ର ପ୍ରଧାନଙ୍କ ନିର୍ବାଚନ ଲଢିବା ଖବର ଉପରୋକ୍ତ ଦାବି ପ୍ରତି ରାଜ୍ୟ ସରକାରଙ୍କୁ ଅଧିକ ସମ୍ବେଦନଶୀଳ କରାଇଥିବା ସ୍ଥାନୀୟ ରାଜନୈତିକ ସମୀକ୍ଷକ ମାନେ ମତ ରଖିଛନ୍ତି।   ରାଜ୍ୟସରକାରଙ୍କ ଏହି ସବୁ ଘଷୋଣା ପରେ ତାଳଚେରକୁ ସ୍ୱତନ୍ତ୍ର ଜିଲ୍ଲା ଘୋଷଣା ଦାବି ଜୋର ଧରିଛି। ତେଣୁ ଆଗାମୀ ଦିନରେ ତାଳଚେର ଜିଲ୍ଲା ଆନ୍ଦୋଳନ ଶାସକ ଦଳ ଓ ସରକାରୀ କଳ ପାଇଁ ମୁଣ୍ଡବିନ୍ଧାର କାରଣ ହେବ ବୋଲି ସ୍ଥାନୀୟ ବୁଦ୍ଧିଜୀବୀମାନେ ମତ ରଖିଛନ୍ତି।