ସଙ୍ଗଠନକୁ ଫେରିବେ ଧର୍ମେନ୍ଦ୍ର, ସମସ୍ତ ସହଯୋଗ ସହ ମିଳିଲା ସବୁଜ ସଙ୍କେତ

୨୦୨୪ ସାଧାରଣ ନିର୍ବାଚନ ପାଖେଇ ଆସିଲାଣି। ଏହାକୁ ଦୃଷ୍ଟିରେ ରଖି ବିଜେପି ବଡ଼ ପ୍ଲାନ ପ୍ରସ୍ତୁତ କରୁଛି। ଜାତୀୟ ରାଜନୀତିର କ୍ଷମତା ଖେଳ ଓ ଦୀର୍ଘ ପ୍ରଶାସନିକ ଅନୁଭବ ଥିବା ନେତାଙ୍କୁ ବିଭିନ୍ନ ରାଜ୍ୟର ସଙ୍ଗଠନରେ ଅବସ୍ଥାପିତ କରାଯିବ। କାହାକୁ ରାଜ୍ୟ ବିଜେପି ସଭାପତି କରାଯିବ ତ କାହାକୁ ପ୍ରଚାର କମିଟି ଅଧ୍ୟକ୍ଷ କରାଯିବ। ଏହି କ୍ରମରେ ଓଡ଼ିଶାରେ କାହାକୁ କଣ କରାଯିବ, ସେ ନେଇ ଉତ୍କଣ୍ଠା ଲାଗି ରହିଛି। ନୂଆ ସଭାପତି, ନୂଆ ପ୍ରଭାରୀ, ସହ ପ୍ରଭାରୀ ଦାୟିତ୍ୱ ନେବା ପରେ  ରାଜ୍ୟ କମିଟି ଘୋଷଣା ହୋଇ ନାହିଁ।

          ଗତକାଲି ପ୍ରଧାନମନ୍ତ୍ରୀ ମନ୍ତ୍ରୀପରିଷଦ ବୈଠକରେ ପରୋକ୍ଷରେ ଏହି ସୂଚନା ଦେଇଛନ୍ତି। କାହାରି ଖରାପ ପ୍ରଦର୍ଶନ ପାଇଁ ନୁହେଁ, ବରଂ ପ୍ରଶାସନର ଉପଲବ୍ଧି ଓ ଅନୁଭବକୁ ତୃଣମୂଳକୁ ନେବା ପାଇଁ ଏହି ଅପସାରଣ ପ୍ରକ୍ରିୟା କରାଯାଉଛି। ଏହି କ୍ରମରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମନ୍ତ୍ରୀମଣ୍ଡଳରୁ ଅପସାରିତ ହୋଇପାରନ୍ତି। ଏହା ପରେ ଜାତୀୟ ରାଜନୈତିକ ଦାୟିତ୍ୱ ସହ ରାଜ୍ୟର ପ୍ରଚାର ମୁଖ୍ୟ ହେବାର ସମ୍ଭାବନା ରହିଛି। ଆଗାମୀ ଦିନ ଗୁଡିକରେ ଧର୍ମେନ୍ଦ୍ର ରାଜ୍ୟର ପ୍ରତି ଜିଲ୍ଲା, କୋଣ ଅନୁକୋଣ ବୁଲିବା ସହ ବିଭିନ୍ନ ବର୍ଗର ଲୋକଙ୍କୁ ଭେଟିବେ ବୋଲି ଜଣାପଡିଛି। ଜୁଲାଇ ତୃତୀୟ ସପ୍ତାହ ସୁଦ୍ଧା ଏ ନେଇ ଆହୁରି ସ୍ପଷ୍ଟତା ଆସିବ ବୋଲି କୁହାଯାଉଛି।

ରାଜ୍ୟ କମିଟିରେ ମଧ୍ୟ ଧର୍ମେନ୍ଦ୍ର ପ୍ରଧାନଙ୍କ ପ୍ରାଧାନ୍ୟ ବାରି ହୋଇ ପଡିଛି। ମନମୋହନଙ୍କ ଦ୍ୱାରା କରାଯାଇଥିବା ଡ୍ରାପ୍ଟ କମିଟିରେ ଏକାଧିକ ବଦଳ କରାଯିବ ବୋଲି ଜଣାପଡିଛି। ଆଗାମୀ ନଭେମ୍ବର ମାସରେ ମଧ୍ୟ ପ୍ରଦେଶ, ଛତିଶଗଡ, ତେଲେଙ୍ଗାନା, ରାଜସ୍ଥାନ ଏବଂ ମିଜୋରମରେ ନିର୍ବାଚନ ହେବାକୁ ରହିଛି। ଏହି ରାଜ୍ୟ ଗୁଡିକ ମଧ୍ୟରେ ମଧ୍ୟ ପ୍ରଦେଶ କିମ୍ବା ରାଜସ୍ଥାନ ନିର୍ବାଚନ ଦାୟିତ୍ୱ ଶ୍ରୀ ପ୍ରଧାନଙ୍କୁ ମିଳିବାର ସମ୍ଭାବନା ରହିଛି।