ଡେମୋକ୍ରାଟ କେବଳ ପରାଜିତ ନୁହଁନ୍ତି ବିଲୁପ୍ତି ପଥରେ ଐତିହାସିକ ପଦକ୍ଷେପ

ନୂଆଦିଲ୍ଲୀ: (ବିଜୟ ସାହୁ)-2024 ଆମେରିକା ରାଷ୍ଟ୍ରପତି ନିର୍ବାଚନ ଭାରତବାସୀଙ୍କ ପାଇଁ ” ବେଗାନୀ ଶାଦୀ ମେଁ ଅବ୍ଦୁଲ୍ଲା
ଦୀବାନା ” କି ?
କିନ୍ତୁ ସରକାରୀ ଭାବରେ ଫଳାଫଳ ଘୋଷଣା ଓ ସରକାରୀ ଭାବରେ
ହ୍ଵାଇଟ ହାଉସକୁ ପ୍ରବେଶ ପୂର୍ବରୁ ଡୋନାଲଡ଼ ଟ୍ରମ୍ଫଙ୍କୁ ବିଜୟ ବାର୍ତା ପଠାଇବା ପାଇଁ ପ୍ରଧାନମନ୍ତ୍ରୀଙ୍କ ସହ ଭାରତବାସୀ ଦୀବନା !
“ଗଣତନ୍ତ୍ରର ଜନନୀ ଭାରତ ” ଗଣତନ୍ତ୍ରର ଅଧିବକ୍ତା ଆମେରିକାର ଗଣତନ୍ତ୍ର ହତ୍ୟାର ମହାନ ପର୍ବରେ ଢୋଲ ବାଦକ ହେଇଛନ୍ତି ।
2024 ବିଶ୍ଵ କ୍ୟାଲେଣ୍ଡରର ଏକ ସଂବତ୍ସର ନୁହେଁ , ମଙ୍ଗଳବାର ଏକ ଦିବସ ନୁହେଁ -ଏହା ଆଉ ଏକ ଅନନ୍ୟ ସଂବତ୍ସର , ଆଉ ଏକ ଅନନ୍ୟ ଦିବସ ଯାହାକୁ 500 ବର୍ଷ ପରେ ବିଶ୍ୱ ନୂତନ ଭାବରେ ଆବିଷ୍କାର କଲା ।

କୃଷ୍ଣକାୟ କମଲା ହାରିସ ହାରିଲେ କି ଶ୍ୱେତକାୟ ଡୋନାଲଡ଼  ଜିତିଲେ ତାହା ଆମ ପାଇଁ ସମ୍ପୂର୍ଣ୍ଣ ମୂଲ୍ୟହୀନ । କିନ୍ତୁ କୃଷ୍ଣକାୟ ଭୋଟର ହିଁ କୃଷ୍ଣକାୟ ପ୍ରାର୍ଥୀଙ୍କୁ ହରେଇବାରେ ସମସ୍ତ ଶକ୍ତି ଓ ସାମର୍ଥ୍ୟ ଅଜାଡି ଦେଲେ ତାହା ହିଁ ପ୍ରଣୀଧାନ ଯୋଗ୍ୟ ।
ଆମେରିକା ଦିନେ ଅପ୍ରବାସୀ ଆଫ୍ରିକୀୟ, ସ୍ପାନିଶ , ଲାଟିନୋ-ଆମେରିକା ଦ୍ଵାରା ପ୍ରତିଷ୍ଠିତ ଓ ସମୃଦ୍ଧ ହେଇଥିଲା । 2024 ରାଷ୍ଟ୍ରପତି ନିର୍ବାଚନ ଟ୍ରମ୍ପଙ୍କ ଅପ୍ରବାସୀଙ୍କ ପ୍ରବେଶ ପଥରେ ଦୀବାର ସୃଷ୍ଟି ନିର୍ବାଚନ ଏଜେଣ୍ଡାକୁ ସିଗ୍ନେଚର ଦେଲା !

1831ରେ ଜନୈକ ଫରାସୀ ଆରିଷ୍ଟୋକ୍ରାଟ ଓ ସମାଜବିଦଆଲେକ୍ସ ଡି ତାକଭିଲ୍ଲେକ୍ସ ଆମେରିକାର ଜେଲ-ସଂସ୍କାର ଅନୁଧ୍ୟାନ ପାଇଁ ମାତ୍ର 9ମାସ ଆମେରିକା ଭ୍ରମଣ କରିଥିଲେ । ସେ ଆମେରିକାରେ ଗଣତନ୍ତ୍ର ଫରାସୀ ଭାଷାରେ ଲେଖିଥିଲେ । 1835 ଓ 1840ରେ ଦୁଇଟି ଖଣ୍ଡରେ ଏହା ଇଂରାଜୀ ଭାଷାରେ ପ୍ରକାଶିତ ହେଇଥିଲା । ଆମେରିକୀୟ ଗଣତନ୍ତ୍ର ଵିଷୟଟି ଆମେରିକା ଛାତ୍ରଙ୍କ ପାଇଁ ବାଧ୍ୟତାମୂଳକ ପାଠ୍ୟକ୍ରମ ହେଇଥିଲା, ଆଜି ମଧ୍ୟ ଏହା ବଳବତ୍ତର ରହିଛି ।
ଏଣୁ ଆମେରିକା ରାଷ୍ଟ୍ରପତି ନିର୍ବାଚନ ଓ ଏହାର ଜଟିଳ ନିର୍ବାଚନ ପ୍ରକ୍ରିୟା , ଗଣତନ୍ତ୍ରର ମହୋତ୍ସବରେ ଆମେ ” ବେଗାନୀ ଅବ୍ଦୁଲ୍ଲା ହେଇପାରୁ, ପାର୍ଶ୍ୱ ଦର୍ଶକ ହେଇପାରୁ , କିନ୍ତୁ ଆଉ ଜଣେ ଆଲେକ୍ସ ତାକଭିଲ୍ଲେକ୍ସଙ୍କୁ ପୁନଃ ବିଚରଣ କରିବାରେ କ୍ଷତି କିଛି ନାହିଁ  !

ଇଂଲଣ୍ଡର ଶିଳ୍ପ ବିପ୍ଳବ ସୃଷ୍ଟ ଅର୍ଥନୀତି, ଫରାସୀ ରାଷ୍ଟ୍ର ବିପ୍ଳବ ସୃଷ୍ଟ କାଳ୍ପନିକ ସମାଜବାଦୀ ଚିନ୍ତନ ଓ ଜର୍ମାନୀ ଦାର୍ଶନିକ ଚିନ୍ତନ ଯେତେବେଳେ ନୂଆଦୁନିଆ ମଣିଷର ଆଧାର ଶିଳା ନିର୍ମାଣ କରୁଛି , ସେତିକି ବେଳେ କାର୍ଲ ମାର୍କସ ଓ ଫ୍ରେଡେରିକ ଏଞ୍ଜେଲସ ଏହାକୁ Three Sources and Three Components ଭାବରେ ଗ୍ରହଣ କରି ମାନଵଜାତିର କ୍ରମ ବିକାଶର ଐତିହାସିକ ଦିଗନିର୍ଦେଶର   ଇସ୍ତାହାରକୁ ସଂକ୍ଷିପ୍ତ କିନ୍ତୁ ବଳିଷ୍ଠ ଭାବରେ ଉତ୍ଥାପନ କରି ମାନଵ ଜାତିକୁ ପ୍ରକୃତ ମୁକ୍ତ ବିଚାର, ପ୍ରକୃତ ଗଣତନ୍ତ୍ର ଓ ପ୍ରକୃତ ମୁକ୍ତି ମାର୍ଗ ପାଇଁ ଅସ୍ତ୍ର ପ୍ରଦାନ କରିଛନ୍ତି । ଏହି ଇସ୍ତାହାରର ଉପସଂହାର ପଂକ୍ତିରେ ଉଲ୍ଲେଖ କରିଛନ୍ତି –
କମ୍ୟୁନିଷ୍ଟମାନେ ସେମାନଙ୍କ ଦୃଷ୍ଟିଭଙ୍ଗୀ ଓ ଲକ୍ଷ୍ୟଗୁଡିକୁ ଗୋପନ ରଖିବାକୁ ଘୃଣା କରନ୍ତି । ସେମାନେ ପ୍ରକାଶ୍ୟ ଘୋଷଣା କରନ୍ତି ,ସେମାନଙ୍କ ଲକ୍ଷ୍ୟ କେବଳମାତ୍ର ବିଦ୍ୟମାନ ସମସ୍ତ ସାମାଜିକ ବ୍ୟବସ୍ଥାର ଜୋରପୂର୍ବକ ଉତ୍ଖାତ କରିବା ମାଧ୍ୟମରେ ଅର୍ଜନ କରିବା ସମ୍ଭବ । ଏକ କମ୍ୟୁନିଷ୍ଟ ବିପ୍ଳବରେ ଶାସକଶ୍ରେଣୀଗୁଡ଼ିକ କମ୍ପି ଉଠନ୍ତୁ  । ସର୍ବହରାଶ୍ରେଣୀର ଶୃଙ୍ଖଳ ଛଡା ହରେଇବାକୁ କିଛି ନାହିଁ ।
ସେମାନଙ୍କ ସମ୍ମୁଖରେ ଏକ ବିଶ୍ଵ ଵିଜୟ ପାଇଁ ରହିଛି । ଦୁନିଆର ମଜଦୂର ଏକ ହୁଅ ।

ଏହି ଇସ୍ତାହାର ସମଗ୍ର ବିଶ୍ୱର ଚିନ୍ତନ ଜଗତକୁ ଆଲୋଚନା ମଧ୍ୟକୁ ଟାଣି ଆଣିଛି । କ୍ଷେତର କୃଷିଜୀବୀ ଠାରୁ କାରଖାନାର ମଜଦୂର ପର୍ଯ୍ୟନ୍ତ, ଫକୀର ଠାରୁ ସିଂହାସନର ସାମ୍ରାଟ ପର୍ଯ୍ୟନ୍ତ, ପୋପ ଠାରୁ ଚର୍ଚ୍ଚର ପାଦ୍ରୀ ପର୍ଯ୍ୟନ୍ତ, ଇମାମ ଠାରୁ ମୁସଲିମ ଧର୍ମଗୁରୁ ପର୍ଯ୍ୟନ୍ତ,ଦେବାଳୟ ଠାରୁ ପୂଜକ ପର୍ଯ୍ୟନ୍ତ କେହି ଏହି ଆଲୋଚନାରୁ ନିଜକୁ ଦୂରେଇ ପାରିନାହାନ୍ତି । ବିଜ୍ଞାନୀରୁ ଆରମ୍ଭ କରି ଅଜ୍ଞାନୀ ପର୍ଯ୍ୟନ୍ତ କେହି ଏହି ତୋଫାନର ସ୍ପର୍ଶରୁ ଅସ୍ପର୍ଶ ରହି ନାହାଁନ୍ତି ।
କେଉଁଠି କମ୍ପନ ତ କେଉଁଠି ଶିହରଣ ।
ପ୍ରତ୍ୟେକ ବର୍ଗ ଏକ ନୂଆ ଦୁନିଆରେ ନିଜର ପରିଚୟ ଓ ସ୍ଥିତି ଖୋଜିଛନ୍ତି । ବିଶ୍ୱ ସମ୍ପଦ ସୃଷ୍ଟି ଓ ଅଧିକାର କ୍ଷେତ୍ରରେ ମଣିଷ ତାର ସହଭାଗୀତା ଓ ସମତା ସ୍ୱର ଉତ୍ତୋଳନ କରିଛି ଓ ଏବଂ ଏହି ସ୍ୱରକୁ ଚାପି ଦେବାପାଇଁ ମୁଷ୍ଟିମେୟ ପୁରୁଣା ସମାଜର ଅଧିପତି ଓ ଅଧିବକ୍ତା ମଧ୍ୟ ପ୍ରତିରୋଧ ସୃଷ୍ଟି କରିଛନ୍ତି ।
ଏହି ଦ୍ୱନ୍ଦ୍ୱ ଓ ସଂଘାତ ମଧ୍ୟରୁ ଦିନେ ନୂଆ ଦୁନିଆର ସମସ୍ତ ସୃଷ୍ଟି ଓ ସମୃଦ୍ଧି । ଏବଂ ଏହାର ସିଂହଭାଗର ଅଧିକାରୀ ଆଜିର ଆମେରିକା – ଗଣତନ୍ତ୍ରର ” ଜନକ/ଜନନୀ ।
ଏହି ଗଣତନ୍ତ୍ର ,ଲିବର୍ଟୀ ଯୋଗୁଁ ଦିନେ ଆମେରିକାର ପ୍ରତ୍ୟେକ ସୀମାନ୍ତ ଉନ୍ମୁକ୍ତ ଥିଲା – ଅପ୍ରବାସୀଙ୍କୁ ୱେଲକମ କରି ପ୍ରବାସୀ କରିବା ପାଇଁ । ପ୍ରତ୍ୟେକ ସୀମାନ୍ତରେ WELCOME USA – FLAG . ଏସିଆ, ଆଫ୍ରିକା,ଇଉରୋପ , ଲାଟିନୋ-ଆମେରିକା , ସ୍ପାନିସ୍ ଭୂଖଣ୍ଡରୁ ଶହ ଶହ ବର୍ଷ ଧରି ମାଇଗ୍ରେସନ ହେଇଥିଲା । ସେମାନେ ହିଁ ନୂତନ ଆମେରିକା ଗଢ଼ିଥିଲେ ।

କିନ୍ତୁ ସବୁଠାରୁ ବଡ଼ ବିଡମ୍ବନା ଯେଉଁମାନେ ଦିନେ ମାଇଗ୍ରେସନ ହେଇ ଆମେରିକା ଗଢ଼ିଥିଲେ , ଚଳିତ ରାଷ୍ଟ୍ରପତି ନିର୍ବାଚନରେ ସେମାନଙ୍କ ଉତ୍ତର ପିଢ଼ି ଡୋନାଲଡ଼ ଟ୍ରମ୍ଫଙ୍କ NO MIGRATION ଏଜେଣ୍ଡା ଝଣ୍ଡା ଉଠେଇ ବିପୁଳ ସଂଖ୍ୟାରେ ଟ୍ରମ୍ଫଙ୍କୁ ଭୋଟ ଦେଲେ । ରିପବ୍ଲିକାନ ପାର୍ଟି କେବଳ ନିଜର ପରମ୍ପରାଗତ ଶ୍ୱେତକାୟ ଅଞ୍ଚଳର ରାଜ୍ୟଗୁଡିକରେ ଵିଜୟକେତନ ଉଡେଇଲା ନାହିଁ , ଡେମୋକ୍ରାଟିକ ପାର୍ଟିର ପରମ୍ପରାଗତ ରାଜ୍ୟଗୁଡିକରେ ମଧ୍ୟ ଅଭ୍ୟୁତପୂର୍ଵ ଉପସ୍ଥିତି ଜାହିର କଲା । ସମସ୍ତ 50ଟି ରାଜ୍ୟରେ ରିପ୍ଲବିକ ପାର୍ଟିର ଝଣ୍ଡା ଉଡିଲା ଓ ସମସ୍ତ ରାଜ୍ୟକୁ ଭୋଟର SWING STATES କରିଦେଲେ ।
ଏକଦା ରାଷ୍ଟ୍ରପତି ଟ୍ରମ୍ଫ  ଫ୍ଲୋରିଡାରେ ଏକ ଜନ ସମ୍ପର୍କ ସଭାରେ କହିଥିଲେ , ଏହି ରାଜ୍ୟର ରାଜପଥରେ କୃଷ୍ଣକାୟଙ୍କୁ ଗୁଳି ମାରିଦେଲେ ମଧ୍ୟ ଆମକୁ କୌଣସି ଫରକ ପଡ଼ିବ ନାହିଁ । ଏଭଳି ବିବୃତି ପରେ ମଧ୍ୟ ଡେମୋକ୍ରାଟିକ ପାର୍ଟି  କୃଷ୍ଣକାୟଙ୍କୁ ସୁରକ୍ଷା ଦେବା କୌଣସି କଠୋର ବ୍ୟବସ୍ଥା କରି ନଥିଲେ । ଓଲଟି ବାଇଡେନ ଯେତେବେଳେ ରାଷ୍ଟ୍ରପତି ହେଲେ ସେତେବେଳେ ମଧ୍ୟ କୃଷ୍ଣକାୟଙ୍କୁ ହତ୍ୟା ଅପରିବର୍ତ୍ତିତ ରହିଲା ।

ଚଳିତ ନିର୍ବାଚନ ଫଳାଫଳ ପ୍ରମାଣ କଲା ଏଣିକି କୌଣସି ରାଜ୍ୟର ରାଜପଥରେ ଭୋଟରଙ୍କୁ ଗୁଳି ମାରିଦେଲେ ମଧ୍ୟ ଟ୍ରମ୍ଫଙ୍କୁ କୌଣସି ଫରକ ପଡ଼ିବ ନାହିଁ । କାରଣ ସେମାନେ ସ୍ୱଇଛାରେ ଡେମୋକ୍ରାଟ ପ୍ରାର୍ଥୀ କମଲା ହାରିସଙ୍କୁ ହରେଇବା ପାଇଁ ମୃତ୍ୟୁର ହୁକୁମନାମାକୁ ଗଳାବନ୍ଧ କରି ଭୋଟ ଦେଇଛନ୍ତି । ଡେମୋକ୍ରାଟିକ ପାର୍ଟି ସର୍ବଦା  ଧରି ନେଇଥିଲା ରାଷ୍ଟ୍ରପତି ନିର୍ବାଚନରେ ଯାହାକୁ ପ୍ରାର୍ଥୀ କଲେ ବି ପାରମ୍ପରିକ ଡେମୋକ୍ରାଟିକ ରାଜ୍ୟଗୁଡ଼ିକରେ ଭୋଟ ମିଳିଯିବ , କେବଳ Swing States ଗୁଡ଼ିକୁ ଜିତିବା ପାଇଁ ପ୍ରୟାସ ଓ ନୀତିଗ୍ରହଣ  କରିବାକୁ ହେବ , ବ୍ୟାପକ ପ୍ରଚାର ସାଧନ ସଂଗ୍ରହ କରିବାକୁ ପଡ଼ିବ ।
କିନ୍ତୁ ଚଳିତ ନିର୍ବାଚନରେ ଏତାଦୃଶ ଭୋଟ ବ୍ୟାଙ୍କ ପଲିଟିକ୍ସ ସମ୍ପୂର୍ଣ୍ଣ ଧୂଳିସାତ ହେଇ ଯାଇଛି । ଏପରି କି ମହିଳା ପ୍ରାର୍ଥୀ ମଧ୍ୟ ମହିଳାଙ୍କ ଭୋଟ ହିଲାରୀ କ୍ଲିଣ୍ଟନ ଓ ଜୋ ବାଇଡେନ ଙ୍କ ଠାରୁ ବେଶୀ ପାଇ ନାହାନ୍ତି ।

7ଟି Swing ରାଜ୍ୟର ଗ୍ରାମାଞ୍ଚଳ ସହର ଓ ସହରୀ ଭୋଟର ହେଉଛନ୍ତି ଡେମୋକ୍ରାଟିକ ପାର୍ଟିର ପରମ୍ପରାଗତ ସମର୍ଥକ। ଗ୍ରାମାଞ୍ଚଳ ସହର ଗୁଡିକର ଅଧିକାଂଶ ଭୋଟ ଡେମୋକ୍ରାଟ ପ୍ରାର୍ଥୀ ନେଇଥାନ୍ତି ଓ ଗ୍ରାମାଞ୍ଚଳରେ ରିପ୍ଲବିକ ପାର୍ଟି କିଛି ପରିମାଣରେ ପ୍ରତିଦ୍ବନ୍ଦିତାରେ ଥାଏ । କେବଳ ସହର ଅଞ୍ଚଳଗୁଡିକରେ ଉଭୟ ଦଳ ଜୋର ଦେଇଥାନ୍ତି । ସହରର ଶିକ୍ଷିତ ଭୋଟର ଲିବରାଲ ଆଦର୍ଶରେ ବିଶ୍ୱାସ କରନ୍ତି, ବ୍ୟବସାୟଗୋଷ୍ଠୀ ରିପ୍ଲବିକ ଦଳର ଆଦର୍ଶରେ ବିଶ୍ୱାସ କରନ୍ତି । ବ୍ୟବସାୟୀଗୋଷ୍ଠୀ ହେଉଛନ୍ତି ମୂଳତଃ ଶ୍ୱେତକାୟ ଓ ରିପ୍ଲବିକ ପାର୍ଟିର ଆଦର୍ଶରେ ବିଶ୍ୱାସ କରୁଥିବା ଖ୍ରୀଷ୍ଟାନ , କିଛି ଜାତିଗତ ଦ୍ଵେଷ ସଂକ୍ରମିତ ଗୋଷ୍ଠୀ , ବିଭିନ୍ନ ସମ୍ପ୍ରଦାୟର ଧର୍ମଗୁରୁ । ଚଳିତ ନିର୍ବାଚନରେ ଏହି ଭୋଟ ବ୍ୟାଙ୍କ ଧାରଣା ମଧ୍ୟ ଭୁଲ ହେଇଛି । ଟ୍ରମ୍ଫଙ୍କ ଖୋଲାଖୋଲି ଉଗ୍ର ରକ୍ଷଣଶୀଳ ନୀତି ସତ୍ତ୍ୱେ ସବୁ ଭୋଟ ବ୍ୟାଙ୍କରେ ରିପ୍ଲବିକମାନଙ୍କ ଆଧିପତ୍ୟ ବିସ୍ତାର ହେଇଛି ।
ଆମେରିକାରେ ସମୁଦାୟ ସହର ଭୋଟର 30%,ଅର୍ଧ ସହର ଭୋଟର 51% ଓ ଗ୍ରାମାଞ୍ଚଳ ଭୋଟର 19% . ଚଳିତ ନିର୍ବାଚନରେ ହାରିସ ସହର ଭୋଟର ମଧ୍ୟରୁ 60%, ଅର୍ଧ ସହର ଭୋଟର ମଧ୍ୟରୁ 48% ଓ ଗ୍ରାମାଞ୍ଚଳ ଭୋଟର ମଧ୍ୟରୁ 36% ଭୋଟ ପାଇଛନ୍ତି । ଟ୍ରମ୍ଫ ଯଥାକ୍ରମେ 37%, 50% ଓ 63% ଭୋଟ ପାଇଛନ୍ତି ।
ଏପର୍ଯ୍ୟନ୍ତ ସାଧାରଣରେ ଧାରଣା ଥିଲା ଡେମୋକ୍ରାଟ ପ୍ରାର୍ଥୀ ସହର ଭୋଟରଙ୍କ 90% ପର୍ଯ୍ୟନ୍ତ ଭୋଟ ପାଇଥାନ୍ତି , ବେଳେ ବେଳେ 95-98% ଭୋଟ ପାଇଥାନ୍ତି । କିନ୍ତୁ ଏଥର ଟ୍ରମ୍ଫ ସହର ଭୋଟରଙ୍କ ମଧ୍ୟରୁ 37% ଭୋଟ ନେଇଛନ୍ତି । ଅନ୍ୟପକ୍ଷରେ ଅର୍ଧ ସହର ଭୋଟର ମଧ୍ୟରୁ ହାରିସ 48% ଓ ଟ୍ରମ୍ଫ 50% ଭୋଟ ନେଇଛନ୍ତି ।
ଗ୍ରାମାଞ୍ଚଳ ଭୋଟର ମଧ୍ୟରୁ ହାରିସ ମାତ୍ର 36% ଓ ଟ୍ରମ୍ଫ 63% ଭୋଟ ନେଇଛନ୍ତି ।
ଏହାର ଅର୍ଥ ଅର୍ଧସହର ଓ ଗ୍ରାମାଞ୍ଚଳ ଭୋଟର 70% ରୁ ଟ୍ରମ୍ଫ 50% ଭୋଟ ପାଇଛନ୍ତି ଓ ହାରିସ 48% ଭୋଟ ନେଇଛନ୍ତି । ଅବଶିଷ୍ଟ ଭୋଟ Third Party ପ୍ରାର୍ଥୀ ଜିଲ୍ ଇଲେନ ଷ୍ଟେଇନ ନେଇଛନ୍ତି । ଷ୍ଟେଇନ ପ୍ରାର୍ଥୀ ହେଇ ନଥିଲେ ସେଇ ଭୋଟ ହାରିସ ଙ୍କ ନିକଟକୁ ଯାଇଥାନ୍ତା । ତାଙ୍କର ମୁଖ୍ୟ ନିର୍ବାଚନ ପ୍ରଚାର ଥିଲା ଯୁଦ୍ଧ ବିରୋଧୀ, ବିନା ମୂଲ୍ୟରେ ଜନ ଶିକ୍ଷା, ବାସ୍ତବ ସବୁଜ ନୂତନ ଚୁକ୍ତି, ଶକ୍ତିଶାଳୀ ଶ୍ରମିକ ଅଧିକାର ।

ହାରିସ ସହର ଭୋଟର 30% ରୁ 60% ଭୋଟ ନେଇଛନ୍ତି । ଅନ୍ୟପକ୍ଷରେ ଟ୍ରମ୍ଫ 37% ପର୍ଯ୍ୟନ୍ତ  ଭୋଟ ନେଇଛନ୍ତି ।

Latinos-African-Muslims –
କୃଷ୍ଣକାୟ ପୁରୁଷ ଭୋଟର 2016ରେ 69% ,2020ରେ 60%,2024ରେ 58%
ଡେମୋକ୍ରାଟଙ୍କୁ ଦେଇଛନ୍ତି । ଅର୍ଥାତ ହିଲାରୀଙ୍କ ତୁଳନାରେ କମଲା 11% ଭୋଟ କମ ପାଇଛନ୍ତି । ଏହାର ଅର୍ଥ କୃଷକାୟ ଭୋଟରଙ୍କ ମଧ୍ୟରୁ ଭଲ ସଂଖ୍ୟାରେ ଭୋଟର ଟ୍ରମ୍ଫଙ୍କୁ ଦେଇଛନ୍ତି, ଅଥବା ଘରେ ବସି ଯାଇଛନ୍ତି । ଯାହା ଦ୍ୱାରା ଟ୍ରମ୍ପଙ୍କ  ଭୋଟ ହାର ଆଶାତୀତ ଭାବରେ ବୃଦ୍ଧି ପାଇଛି । ଏହି ଭୋଟ ବୃଦ୍ଧି କୌଣସି ନିର୍ଦ୍ଦିଷ୍ଟ ଅଞ୍ଚଳରେ ସୀମାବଦ୍ଧ ନ ହୋଇ ପୂରା ଆମେରିକା ମୂଲକରେ ପ୍ରସାରିତ ହେଇଛି ।

ମାଇଗ୍ରେସନ- ବିରୋଧୀ ପ୍ରଚାର ଥିଲା ଟ୍ରମ୍ପଙ୍କ ମୂଳ ଆଧାର – America for Americans . ଏହି ଆମେରିକା ଭିତରେ ଟ୍ରମ୍ଫ କେବଳ ନେଟିଭ ଆମେରିକା କଥା କହୁଥିଲେ ଓ ମାଇଗ୍ରେସନ ଯୋଗୁଁ ନେଟିଭ ଆମେରିକୀୟ ଦୁର୍ଦ୍ଦଶାର ଶିକାର ହେଉଛନ୍ତି ବୋଲି ପ୍ରଚାର କରୁଥିଲେ । ଅନ୍ୟ ପକ୍ଷରେ ଡେମୋକ୍ରାଟମାନେ ପରମ୍ପରାଗତ ଭାବରେ ମାଇଗ୍ରେସନକୁ ସମର୍ଥନ କରୁଥିଲେ । ତେଣୁ କମଲାଙ୍କ ପ୍ରଚାରରେ ଥିଲା – America for all Americans .
କିନ୍ତୁ ଅପ୍ରବାସୀମାନେ  ହିଁ ଅପ୍ରବାସୀମାନଙ୍କ ଇସ୍ୟୁକୁ ବିରୋଧ କରି ଭୋଟ ଦେଲେ ।
ବର୍ତ୍ତମାନର ଅଧିକାଂଶ ନାଗରିକ ଅପ୍ରବାସୀ । ସେମାନେ ମୂଳ ବାସିନ୍ଦା ନୁହନ୍ତି । ଶହ ଶହ ବର୍ଷ ଧରି ସେମାନେ ଆମେରିକାକୁ ଦଖଲ କରିଛନ୍ତି ଓ ମୂଳ ବାସିନ୍ଦାଙ୍କୁ ବେଦଖଲ କରିଛନ୍ତି । ଦ୍ଵିତୀୟ ବିଶ୍ୱଯୁଦ୍ଧ ପରେ ଆମେରିକାର ଯୁଦ୍ଧ ଖୋର ବୈଦେଶିକ ନୀତି ଯୋଗୁଁ ହିଁ ଯୁଦ୍ଧ ବିଧ୍ଵଂସ ଦେଶରୁ ରାଜନୈତିକ ଶରଣାର୍ଥୀ ଭାବରେ କ୍ରମାଗତ ମାଇଗ୍ରେସନ ହେଇଛି । ଏକ୍ଷେତ୍ରରେ ଉଭୟ ଦଳର ନୀତି ମୂଳତଃ ସମାନ । ଓବାମାଙ୍କ ଠାରୁ ଆରମ୍ଭ କରି ବାଇଡେନଙ୍କ ପର୍ଯ୍ୟନ୍ତ ମଧ୍ୟପ୍ରାଚ୍ୟରେ, ଲିବିଆରେ , ଘାନାରେ , ଆଫଗାନିସ୍ତାନରେ, ୟୁକ୍ରେନରେ , କ୍ୟୁବାରେ, ଭିଏତନାମରେ , କୋରିଆରେ ଯେଉଁ ଯୁଦ୍ଧ ଚାଲିଛି ବା ଚାଲିଥିଲା ତାର ନାୟକ ସ୍ୱୟଂ ଆମେରିକା । ଟ୍ରମ୍ପଙ୍କ ସମୟରେ ଯଦିଓ ସେ ଯୁଦ୍ଧର ବିରୋଧୀ ବୋଲି ପ୍ରଚାର କରିଥିଲେ , କିନ୍ତୁ ଆଜି ପାଲେଷ୍ଟିନମାନଙ୍କୁ ରାଷ୍ଟ୍ର ହୀନ କରିବାରେ ଆମେରିକା ଓ ପଶ୍ଚିମ ଇଉରୋପର 90 ଭାବ ଯୁଦ୍ଧାସ୍ତ୍ର ବିନିଯୋଗ ହେଉଛି, ଯାହା ଆମେରିକା ନାଗରିକଙ୍କ ଟିକସ ।

ଅନ୍ୟାନ୍ୟ ଜନଗୋଷ୍ଠି , ରେସିଆଲ ଗୋଷ୍ଠୀ ଓ ଧର୍ମ ସ୍ୱୀକାର କରୁନଥିବା
ଗୋଷ୍ଠୀ ,ସମଲିଙ୍ଗୀ ଭୋଟରଙ୍କ ମତଦାନରେ ବଡ଼ ବଦଳ –

ଚଳିତ ନିର୍ବାଚନରେ ଟ୍ରମ୍ଫ ପାରମ୍ପରିକ ଡେମୋକ୍ରାଟ ଭୋଟରଙ୍କ ଭିତରେ ବଡ଼ ଧରଣର ସଫଳତା ଅର୍ଜନ କରିଛନ୍ତି ।
ଶ୍ୱେତକାୟ,କୃଷ୍ଣକାୟ,ଲାଟିନୋ,
ଏସିଆନ,ଅନ୍ୟାନ୍ୟ ଧର୍ମଗୋଷ୍ଟି ସଂଖ୍ୟାଲଘୁ ଓ ଧର୍ମକୁ ଅସ୍ବୀକାର କରୁଥିବା ଗୋଷ୍ଠୀ ମଧ୍ୟରେ 53% ଭୋଟ ସଫଳତା ଅର୍ଜନ କରିଛନ୍ତି ।
ଅନ୍ୟ ପକ୍ଷରେ ହାରିସ 43% ଭୋଟ ପାଇଛନ୍ତି । ଏହି ଭୋଟ ବ୍ୟବଧାନ ସବୁକିଛି ଓଲଟ ପାଲଟ କରି ଦେଇଛି । ଏମାନେ ସମସ୍ତେ ମାଇଗ୍ରେସନ ଭୋଟର । ଯୁଦ୍ଧ ଶରଣାର୍ଥୀ ଭାବରେ ବିଭିନ୍ନ ସମୟରେ ଆମେରିକା ନାଗରିକ ହେଇଛନ୍ତି ।
ସବୁଠାରୁ ରୋଚକ କଥା ହେଲା ଗୁଜରାଟରୁ ବହୁ ସଂଖ୍ୟାରେ ଆମେରିକା ଯାଇଛନ୍ତି ଓ ଏପର୍ଯ୍ୟନ୍ତ ଭିସା ସମସ୍ୟା ମଧ୍ୟରେ ରହିଛନ୍ତି । ଏମାନେ ଶରଣାର୍ଥୀ ଆଳ ନେବା ସମ୍ଭବ ନୁହେଁ, କାରଣ କୌଣସି ଯୁଦ୍ଧର ପୀଡ଼ିତ ନୁହଁନ୍ତି । ଆମେରିକା ଏମାନଙ୍କୁ ସ୍ଥାୟୀ ଭିସା ଦେବାକୁ ଜାତିସଂଘର ମାନବିକ ଅଧିକାର ସର୍ତ୍ତ ଅନୁଯାୟୀ ବାଧ୍ୟ ନୁହେଁ ।
ଟ୍ରମ୍ପଙ୍କ ମୁଖ୍ୟ ଏଜେଣ୍ଡା ଯେତେବେଳେ ଆମେରିକା ନେଟିଭଙ୍କ ଆମେରିକା , ସେତେବେଳେ ଟ୍ରମ୍ପଙ୍କ ଶାସନ କାଳରେ ରିଭର୍ସ ମାଇଗ୍ରେସନ
ହେବାକୁ ବାଧ୍ୟ । ମାଇଁ ଫ୍ରେଣ୍ଡ ଟ୍ରମ୍ଫଙ୍କ ନୀତି କୌଣସି ସାହାଯ୍ୟ କରିବ ନାହିଁ ।

ଆମେରିକାର ମୁକ୍ତ ସ୍ବର –
ବର୍ତ୍ତମାନ ବିଶ୍ଵ କହୁଛି ଆମେରିକା ମିଡିଆ ରାଷ୍ଟ୍ରପତିଙ୍କୁ ମଧ୍ୟ କାଠଗଡାରେ ଠିଆ କରେଇ ପାରୁଥିଲା , ଆମେରିକା ନାଗରିକ ରାଷ୍ଟ୍ରପତିଙ୍କୁ ନୀତି ପ୍ରଣୟନରେ ବାଧ୍ୟ କରି ପାରନ୍ତି ଇତ୍ୟାଦି ଇତ୍ୟାଦି ।
କିନ୍ତୁ ଟ୍ରମ୍ଫ 300 ପାଖାପାଖି ଇଲେକ୍ଟ୍ରୋରାଲଭୋଟ ପାଇବା ଓ ପପୁଲାର ଭୋଟ 5 ନିୟୁତରୁ ଅଧିକ ପାଇବା ପରେ ଓ ସିନେଟ, କଂଗ୍ରେସ, ରାଜ୍ୟ ସଦନଗୁଡ଼ିକରେ , ଗଭର୍ଣ୍ଣର ପଦବୀରେ ଡେମୋକ୍ରାଟଙ୍କ ସୁପଡା ସାଫ କରିବା ପରେ ଟ୍ରମ୍ଫଙ୍କ ନୀତିକୁ ପ୍ରତିରୋଧ କରିବା ଶକ୍ତି କାହାର ନାହିଁ । ଟ୍ରମ୍ଫ ସୁପର ମେଜେରିଟି ହାସଲ କରୁଛନ୍ତି । ଯେଉଁମାନେ ଟ୍ରମ୍ଫଙ୍କୁ ବିରୋଧ କରିବେ ସେମାନେ ଆମେରିକା ରାଷ୍ଟ୍ରବିରୋଧୀ ଘୋଷଣା ହେବେ । ଖୁବ ଶୀଘ୍ର ଏହାର ନୀଳ ନକ୍ସା ପ୍ରସ୍ତୁତ ହେଇଯିବ ।

ଟ୍ରମ୍ପଙ୍କ କ୍ୟାବିନେଟ ଘୋଷଣା ନିଜ ଇଚ୍ଛା ଅନୁଯାୟୀ କରିବେ ଯେଉଁମାନେ ତାଙ୍କ ନୀତିକୁ ଅନ୍ଧଭକ୍ତ ଭାବରେ ସମର୍ଥନ କରିବେ ।
ପୂର୍ବରୁ ଡେମୋକ୍ରାଟ ଏପରି କି ରିପ୍ଲବିକ ସଭ୍ୟ କ୍ୟାବିନେଟ ନିଯୁକ୍ତି କ୍ଷେତ୍ରରେ ଚାପ ସୃଷ୍ଟି କରି ପାରିଥିଲେ   । ବର୍ତ୍ତମାନ ସେଇ ରାସ୍ତା ବନ୍ଦ । ଯେକୌଣସି ଆଇନଗତ ପ୍ରତିବନ୍ଧକକୁ Executive Order ଦ୍ଵାରା ଅଥବା ଆଇନ ସଂଶୋଧନ ଦ୍ୱାରା ଟ୍ରମ୍ଫ ନିଜର ନୀତି ନିର୍ଦ୍ଧାରଣ କରି ପାରିବେ ।
ସବୁଠାରୁ ବେଶୀ କ୍ଷତିଗ୍ରସ୍ତ ହେବ ଆମେରିକା ସୁପ୍ରିମକୋର୍ଟ। ରାଷ୍ଟ୍ରପତି କୌଣସି ବେଆଇନ କାର୍ଯ୍ୟ କଲେ ସୁପ୍ରିମକୋର୍ଟ ହସ୍ତକ୍ଷେପ କରି ପାରୁଥିଲା । ସୁପ୍ରିମକୋର୍ଟ ବିଚାର ପତି ଥରେ ନିଯୁକ୍ତି ହେଇଗଲେ ମୃତ୍ୟୁ ପର୍ଯ୍ୟନ୍ତ ବିଚାରପତି ରହୁଥିଲେ । ଅବସର ବୟସ ନାହିଁ। କେବଳ ଜଣେ ମୃତ୍ୟୁବରଣ କଲେ ଅଥବା ଇସ୍ତଫା ଦେଲେ ନୂଆ ବିଚାରପତି ନିଯୁକ୍ତି ହେଉଥିଲେ ।
ବର୍ତ୍ତମାନ ସୁପ୍ରିମକୋର୍ଟରେ ରିପ୍ଲବିକ ପାର୍ଟି ସମର୍ଥକ ବିଚାରପତି ବୋଧେ 5ରୁ 4 । ଦୁଇଜଣ ଵିଚାରପତି 80 ବର୍ଷରୁ ଉର୍ଦ୍ଧ୍ବ । ଟ୍ରମ୍ଫ ସେମାନଙ୍କୁ ଇସ୍ତଫା କରାଇ ଯୁବ ବିଚାରପତି ନିଯୁକ୍ତି କରିବେ ଓ ଆଗାମୀ 40 ବର୍ଷ ସୁପ୍ରିମକୋର୍ଟ ରିପ୍ଲବିକ ନିୟନ୍ତ୍ରଣରେ ରହିବ । ଆଗାମୀ ନିର୍ବାଚନରେ ଡେମୋକ୍ରାଟ ଜିତିଲେ ମଧ୍ୟ ସୁପ୍ରିମକୋର୍ଟ ବିଚାରପତି ପୂର୍ବବତ ରହିବେ । କେବଳ ମୃତ୍ୟୁ ହେଲେ ଭିନ୍ନ କଥା ।

ଟ୍ରମ୍ପଙ୍କ ଵିଜୟ ଓ
ମାଇଁ ଫ୍ରେଣ୍ଡ ଦେଶ ପାଇଁ
ତାର ପ୍ରଭାବ :

ଟ୍ରମ୍ଫ ସରକାରୀ ଭାବରେ ରାଷ୍ଟ୍ରପତି ଘୋଷଣା ପୂର୍ବରୁ ପ୍ରଧାନମନ୍ତ୍ରୀ ମୋଦୀ ଟ୍ୱିଟ କରି ମାଇଁ ଫ୍ରେଣ୍ଡ ଶୁଭେଚ୍ଛା ଜଣାଇ ସାରିଲେଣି । ଅନ୍ୟାନ୍ୟ ରାଷ୍ଟ୍ର ମୁଖ୍ୟମାନେ ନିଜ ନିଜର ଶୁଭେଚ୍ଛା ବାର୍ତ୍ତା ପଠେଇ ସାରିଲେଣି । ଭାରତୀୟମାନେ ଟ୍ରମ୍ପଙ୍କ ସଫଳତାରେ କୁରୁଳି ଉଠିଲେଣି । ଭାରତ ପାଇଁ ସେ କେତେ ଶୁଭଙ୍କର ହେବେ ସେଇ ଚର୍ଚ୍ଚା ଚାଲିଛି । ଆମ ଭାରତୀୟ କନ୍ୟା ହାରିସଙ୍କ ପାଇଁ ଆଉ କେହି ନାହାନ୍ତି ।
ସମସ୍ତେ ଭାବିଲେଣି ଟ୍ରମ୍ଫ ଡଲାର ମୂଲ୍ୟ ବୃଦ୍ଧି କରି ଭାରତକୁ ପ୍ରବାସୀ ଆମେରୀୟ ଯେଉଁ ଅର୍ଥ ପ୍ରେରଣ କରୁଛନ୍ତି ତାହା ଆମ ଅର୍ଥନୀତିରେ ଜିଡିପି ବୃଦ୍ଧି କରିବ । କିନ୍ତୁ ଟ୍ରମ୍ପଙ୍କ ଘୋଷିତ ମାଇଗ୍ରେସନ ନୀତିରେ ମୂଳରୁ ମାଇପ ନାହିଁ, ପୁଅ ନାଁ ଆମେ ଗୋପାଳିଆ ଦେଇ ସାରିଲେଣି ।
ଏକ୍ଷେତ୍ରରେ ଆମେରିକା ସମ୍ପର୍କ Give &Take ହେବାର ସମ୍ଭାବନା ନାହିଁ । ଯଦି ବି କିଛି ଦିନ ଆମେ ଖୁସି ହେଇପାରିବା ତଥାପି ତାହା ଟ୍ରମ୍ପଙ୍କ ସର୍ତ୍ତରେ ହେବ । ଆମେରିକା ଗୋଦାମ ରଦ୍ଦୀ ଵସ୍ତୁ ଓ ଯୁଦ୍ଧାସ୍ତ୍ର ଆମକୁ କିଣିବାକୁ ବାଧ୍ୟ କରିବ, ଆମେ ଉନ୍ନତମାନର ସାମଗ୍ରୀ ଆମେରିକା ରପ୍ତାନୀ କରିବା ।
କିଛି ମହଲରେ ଚର୍ଚ୍ଚା ହେଉଛି ଟ୍ରମ୍ଫ ଚୀନ ବିରୋଧୀ । ତେଣୁ ଚୀନ-ଆମେରିକା ବାଣିଜ୍ୟିକ ସମ୍ପର୍କରେ ବିରାଟ ପରିବର୍ତ୍ତନ ଘଟିବ ଓ ଭାରତରେ ଆମେରିକା ଏଫଡିଆଇ ଭର୍ତ୍ତି ହେଇଯିବ ।
ବାଇଡେନ ମଧ୍ୟ ଚୀନ ବିରୋଧୀ ଥିଲେ । କିନ୍ତୁ ତାଙ୍କ ସମୟରେ 95% ଆମେରିକା କମ୍ପାନୀ ଚୀନ ଓ ଚୀନ ର ମିତ୍ର ରାଷ୍ଟ୍ରମାନଙ୍କରେ ପୁଞ୍ଜି ଖଟାଇ ଥିଲେ । ଆମେରିକା ବାଣିଜ୍ୟିକ ସଂସ୍ଥା ଆମେରିକା ଜନତାଙ୍କ ସେବା ପାଇଁ ପୁଞ୍ଜି ଖଟାଉ ନାହାନ୍ତି । ସୁପର ପ୍ରଫିଟ ପାଇଁ ବାଣିଜ୍ୟ କରୁଛନ୍ତି ।
ଯଦି ବି କିଛି ପୁଞ୍ଜି ଭାରତକୁ ଆସିବ ତାହା ସେଇ କ୍ଷେତ୍ରରେ ଆସିବ ଯାହା ଟ୍ରମ୍ପଙ୍କ Geo-Political ରାଜନୀତିର ଅନୁକୂଳ ହେବ ଓ ଭାରତକୁ ଆମେରିକାର ପ୍ରତ୍ୟକ୍ଷ ସମରସଂଗୀ ହେବାକୁ ବାଧ୍ୟ କରିବ । ଫଳରେ ଭାରତୀୟମାନେ ଆମେରିକାର ଯୁଦ୍ଧ ଭିତରକୁ ଟାଣି ହେଇଯିବେ ।

ଇସ୍ରାଇଲ ସମସ୍ୟା –
ବାଇଡେନଙ୍କ ସମୟରେ ଆମେରିକା ଇସ୍ରାଇଲର ଗଣହତ୍ୟା ଯଜ୍ଞକୁ କେବଳ କଥାରେ ବିରୋଧ କରୁଥିଲେ । କିନ୍ତୁ ଇସ୍ରାଇଲ ଉପରେ ତାର କୌଣସି ପ୍ରଭାବ ପଡୁନଥିଲା ।
ଟ୍ରମ୍ପଙ୍କ ଫାସିଷ୍ଟ ନୀତି ଇସ୍ରାଇଲ କ୍ଷେତ୍ରରେ ଭିନ୍ନ ରୂପରେ ଆସିବ । ଡୋମେଷ୍ଟିକ ନାଗରିକଙ୍କୁ ସନ୍ତୁଷ୍ଟ କରିବା ପାଇଁ ଟ୍ରମ୍ଫ ଯୁଦ୍ଧ ବିରତି ହେବ ବୋଲି ବିବୃତି ଦେବେ । କିନ୍ତୁ ଆମେରିକାର ଅସ୍ତ୍ର ଶସ୍ତ୍ର ଚାଲାଣ ବନ୍ଦ ହେବ ନାହିଁ । ବନ୍ଦ ହେଇଗଲେ ଇସ୍ରାଇଲ କଥା ସରିଲା । ତେଣୁ ନିତ୍ୟାନ୍ୟୁୟଙ୍କ ସହ ଆଲୋଚନା କରି କହିବେ ଯୁଦ୍ଧ ବନ୍ଦ କରିଦିଅ ଓ ସବୁ ଅଞ୍ଚଳକୁ କବଜା କରିଦିଅ ।
ଇସ୍ରାଇଲ ଏଭଳି ରିସ୍କ ନେଇ ପାରିବ କି ? କାରଣ ଯୁଦ୍ଧ ହିଁ ଇସ୍ରାଇଲ ଅସ୍ତିତ୍ୱ ବଜାୟ ରଖିଛି ।

ଚଳିତ ଭୋଟ ପରେ ଜଣେ ସ୍ପାନିସ ଭୋଟର ଲେଖିଥିଲେ -ମୁଁ କେବେ ହେଲେ ଶ୍ୱେତକାୟ ପ୍ରାର୍ଥୀଙ୍କୁ ଭୋଟ ଦେଇ ନଥିଲି ।ମୁଁ କୃଷ୍ଣକାୟ ଖ୍ରୀଷ୍ଟାନ  ହେଲେ ବି ସବୁବେଳେ ଡେମୋକ୍ରାଟଙ୍କୁ ଭୋଟ ଦେଇଛି । ଟ୍ରମ୍ଫ ଜଣେ ଫାସିଷ୍ଟ ଓ ଚରିତ୍ର ହୀନ ବ୍ୟକ୍ତି , ବହୁ ପତ୍ନୀକ ଯାହା ଖ୍ରୀଷ୍ଟାନ ଧର୍ମ ଗ୍ରହଣ କରେ ନାହିଁ । କିନ୍ତୁ ଏଥର ଭୋଟ ଦେଲି । କାରଣ ମାଇଗ୍ରେସନ ଯୋଗୁଁ ଲୋକ ଆସୁଛନ୍ତି ଓ ମୋ ମଜୁରୀ ହ୍ରାସ ହେଇଛି । ପ୍ରଥମେ ମୁଁ ଦୈନିକ $ 25 ଡଲାରରେ ଇଲେକ୍ଟିସିଆନ ଭାବରେ କାର୍ଯ୍ୟ କରୁଥିଲି । ବର୍ତ୍ତମାନ ମାଇଗ୍ରେସନରେ ଆସିଥିବା ଶ୍ରମିକ 12 ଡଲାରରେ କାର୍ଯ୍ୟ କରୁଛି । ତେଣୁ ନିଯୁକ୍ତିଦାତା ମୋତେ କାହିଁକି $25ରେ ରଖିବ ? ମୁଁ ଫାସିଷ୍ଟକୁ ସହ୍ୟ କରିପାରିବି କିନ୍ତୁ ବେକାରୀ ଅବସ୍ଥାକୁ ନୁହେଁ ।

ସ୍ପାନିସ ଶ୍ରମିକର ଦୃଷ୍ଟିଭଙ୍ଗୀ ହେଉଛି
Tip of the iceberg . ସମସ୍ତ କୃଷକାୟ ଚଳିତ ନିର୍ବାଚନରେ ମତ ପରିବର୍ତ୍ତନ କ୍ଷେତ୍ରରେ ଟ୍ରମ୍ପଙ୍କ ମୂଳ ନିବାସୀ ଆମେରିକାଙ୍କୁ ନିଯୁକ୍ତି ଗ୍ୟାରେଣ୍ଟି କାର୍ଯ୍ୟ କରିଛି ।
ଏବେ ବଞ୍ଚିଥିଲେ ଫରାସୀ ସମାଜବିଦ ଆମେରିକା ଗଣତନ୍ତ୍ର ଉପରେ କଣ ଲେଖିଥାନ୍ତେ ତାହା ଆମେରିକାବାସୀ ବିଚାର କରିବେ ଓ ବିଶ୍ୱବାସୀ ଆମେରିକା ଗଣତନ୍ତ୍ରକୁ କେତେ ନମ୍ବର ଦେବେ ତାହା ମଧ୍ୟ ଆଲୋଚନା କରିବେ ।