ଗୋପାଳପୁରରେ ସିଦ୍ଧାନ୍ତଙ୍କ ଅନୁପ୍ରବେଶକୁ ନେଇ ଦ୍ୱନ୍ଦ୍ୱରେ ବିଜେଡ଼ି କର୍ମୀ

ବ୍ରହ୍ମପୁର: ବ୍ରହ୍ମପୁର ଲୋକସଭା ଆଶନରୁ ଦୁଇ ଥର ସାଂସଦ ଥିଲେ ମଧ୍ୟ ୨୦୧୯ ମସିହାରେ ଟିକେଟ୍ କଟିବା ପରେ ଗାଏବ ହୋଇଯାଇଥିବା ସିଦ୍ଧାନ୍ତ ମହାପାତ୍ର ଏବେ ପୁଣି ଥରେ ସକ୍ରୀୟ ହେବାରେ ଲାଗିଛନ୍ତି । ଏକଦା ତାଙ୍କ ଘନିଷ୍ଠ ନିକଟତର ଥିବା ବିଜେଡ଼ିର ନେତା ଓ କର୍ମୀଙ୍କୁ ନେଇ ତୁହାକୁ ତୁହା ବୈଠକ ଡାକୁଛନ୍ତି । ଅଞ୍ଚଳ ଭ୍ରମଣ କରୁଛନ୍ତି । ବ୍ରହ୍ମପୁର ଲୋକସଭା ନିର୍ବାଚନ ମଣ୍ଡଳୀର ଛତ୍ରପୁର, ଗୋପାଳପୁର, ଚିକିଟି ଏବଂ ବ୍ରହ୍ମପୁର ବିଧାନସଭା ଅଞ୍ଚଳରେ ବିଗତ ଦିନରେ ବିଭିନ୍ନ କାର୍ଯ୍ୟକ୍ରମରେ ସାମିଲ ହୋଇଛନ୍ତି । ତେବେ ଗୋପାଳପୁର ବିଧାନସଭାରେ ମାତ୍ରାଧିକ ହସ୍ତକ୍ଷେପ ଏବଂ ଅନୁପ୍ରବେଶକୁ ନେଇ ବିଜେଡ଼ି କର୍ମୀମାନଙ୍କ ମଧ୍ୟରେ ଦ୍ୱନ୍ଦ୍ୱ ସୃଷ୍ଟି ହୋଇଛି ।
ମଙ୍ଗଳବାର ପୂର୍ବତନ ସାଂସଦ ସିଦ୍ଧାନ୍ତ ଗୋପାଳପୁର ନିର୍ବାଚନ ମଣ୍ଡଳୀର କୁଠାରସିଂ ଏବଂ ନାରାୟଣପୁର ଗସ୍ତ କରିଥିଲେ । ସେଠାରେ ଆୟୋଜିତ ଚୈତନ୍ୟ ଠାକୁରଙ୍କ ଦର୍ଶନ ସହିତ ୨୪ ପ୍ରହର ନାମଯଜ୍ଞରେ ସାମିଲ ହୋଇଥିଲେ । ସର୍ବସାଧାରଣରେ ପ୍ରସାଦ ସେବନ କରିଥିଲେ । ସିଦ୍ଧାନ୍ତଙ୍କ ଗସ୍ତ ବେଳେ ରଙ୍ଗେଇଲୁଣ୍ଡା ବ୍ଲକ ବିଜେଡ଼ି ସଭାପତି ଅଜିତ ଦାସ, ରଙ୍ଗେଇଲୁଣ୍ଡା ବ୍ଲକ ଅଧ୍ୟକ୍ଷା ସିଏଚ. ଉଷା ରାଣୀ ଏବଂ ବରିଷ୍ଠ ନେତା ତଥା ପୂର୍ବତନ ବ୍ଲକ ବିଜେଡ଼ି ସଭାପତି ସିଏଚ. ଭରତ ପାତ୍ର ଉପସ୍ଥିତ ଥିଲେ । ଏହା ପରେ ଗୋପାଳପୁର ଏବଂ ବ୍ରହ୍ମପୁରରେ ଆଉ କେତେକ କାର୍ଯ୍ୟକ୍ରମରେ ସାମିଲ ହୋଇଥିଲେ । ଏକ ଡାକବଙ୍ଗଳାରେ ଗୋପାଳପୁରର ବିଜେଡ଼ି କର୍ମୀଙ୍କ ସହ ଏକ ସାଂଗଠନିକ ବୈଠକରେ ଉପସ୍ଥିତ ଥିଲେ । ତେବେ ଗୋପାଳପୁରରେ ସିଦ୍ଧାନ୍ତ ଅତର୍କିତ ଭାବେ ସକ୍ରିୟ ହେବାକୁ ନେଇ ନେତା ଓ କର୍ମୀମାନଙ୍କ ମଧ୍ୟରେ ନାନା କଥା ଚର୍ଚ୍ଚା ହେଉଛି । କାରଣ ପ୍ରାୟ ଏକ ଦଶନ୍ଧୀ ହେଲା ଏହି ନିର୍ବାଚନ ମଣ୍ଡଳୀର ସର୍ବମାନ୍ୟ ନେତା ଥିଲେ ବର୍ତ୍ତମାନର ବିଧାୟକ ପ୍ରଦୀପ କୁମାର ପାଣିଗ୍ରାହୀ ।

ବିଜେଡ଼ିର ସର୍ବେସର୍ବା ଏବଂ ମୁଖ୍ୟମନ୍ତ୍ରୀ ଘନିଷ୍ଠ ଆନୁଗତ୍ୟ ଥିଲେ । କିନ୍ତୁ ୨୦୨୦ ମସିହା କରୋନା ପରିଚାଳନାକୁ ନେଇ ଜିଲା ପ୍ରଶାସନକୁ ସମାଲୋଚନା କରିବା ଠାରୁ ଆରମ୍ଭ ହୋଇ ପରବର୍ତ୍ତି ସମରେ ଚାକିରି ଦୁର୍ନୀତିରେ ଛନ୍ଦି ହୋଇ ଗିରଫ ହେବା ପରେ ବିଜେଡ଼ିରୁ ବହିସ୍କୃତ ହୋଇଥିଲେ ପ୍ରଦୀପ । ତା’ ପରଠୁ ନେତା ଶୂନ୍ୟ ହୋଇପଡ଼ିଥିବା ଗୋପାଳପୁରର ମଙ୍ଗ ଧରିଥିଲେ ମୁଖ୍ୟମନ୍ତ୍ରୀଙ୍କ ଓଏସଡି ଗୋପବନ୍ଧୁ ଦାସ । ତାଙ୍କ ନେତୃତ୍ୱରେ ଦଳ ପଞ୍ଚାୟତ ଏବଂ ପୌର ନିର୍ବାଚନ ଲଢ଼ି ସଫଳ ହେଲା । ତେବେ ଦଳର ବିଜୟ ପଛରେ ଗୋପବନ୍ଧୁ ନୁହଁ, ବରଂ ବିଜେଡ଼ିର ଲୋକପ୍ରିୟତା ମୁଖ୍ୟ କାରଣ ବୋଲି କୁହାଗଲା । କାରଣ ପ୍ରାୟ ଦୁଇ ବର୍ଷ ହେଲା ଗୋପବନ୍ଧୁ ଗୋପାଳପୁରରେ ସଂଗଠନ ସମ୍ଭାଳୁଥିଲେ ମଧ୍ୟ ଦଳୀୟ କର୍ମୀଙ୍କ ମଧ୍ୟରେ ଗ୍ରହଣୀୟ ହୋଇପାରୁ ନାହାନ୍ତି । ତାଙ୍କ ନାମକୁ ବ୍ୟବହାରୀ କରି କେତେକ ଅସାଧୁ ବ୍ୟକ୍ତି ନିଜର ବ୍ୟବସାୟିକ ସାମ୍ରାଜ୍ୟ ବଢ଼ାଇ ଚାଲିଛନ୍ତି । ସେହିଭଳି ଅନେକ ବିଶୃଙ୍ଖଳିତ କାର୍ଯ୍ୟ ମଧ୍ୟ ବିଜେଡ଼ି ଭିତରେ ବଢ଼ୁଛି । ବିଧାୟକ ଟିକେଟ ପାଇଁ ଆଶାୟୀଙ୍କ ସଂଖ୍ୟା ମଧ୍ୟ ବଢ଼ି ଚାଲିଥିଲା । ବ୍ରହ୍ମପୁରର ଜଣେ ବିଜେଡ଼ି ନେତା ନିୟମିତ ଭାବେ ପ୍ରଦୀପଙ୍କ ସହିତ ଗୋପାଳପୁରରେ ରାଜନୈତିକ କାର୍ଯ୍ୟକ୍ରମ ଆୟୋଜନ କରୁଥିଲେ ମଧ୍ୟ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଗଲା ନାହିଁ । ସେହିଭଳି ବ୍ରହ୍ମପୁରର କେତେକ ବିଜେଡ଼ି ନେତାଙ୍କ ଆଖି ଗୋପାଳପୁର ଆଶନ ଉପରେ ପଡ଼ିଛି । ଦଳୀୟ ସଂଗଠନକୁ ସଜାଡ଼ିବା କିମ୍ବା ସୁଦୃଢ଼ କରିବା ଦିଗରେ ଗୋପବନ୍ଧୁଙ୍କ ବିଫଳତା ସଂପର୍କରେ କୁଆଡ଼େ ହାଇକମାଣ୍ଡ ପାଖରେ ରିପୋର୍ଟ ପହଞ୍ଚିଛି । ଏଣୁ ସିଦ୍ଧାନ୍ତଙ୍କୁ ଗୋପାଳପୁର ଦାୟିତ୍ୱ ମିଳିବ ବୋଲି ଆଲୋଚନା ହେଉଛି । ତେବେ ଏନେଇ କର୍ମୀମାନଙ୍କୁ କୌଣସି ଠୋସ୍ ସୂଚନା ଦିଆଯାଉ ନାହିଁ । ଆଗାମୀ ଦିନରେ ସିଦ୍ଧାନ୍ତଙ୍କ ପ୍ରା ୧୦ଟି କାର୍ଯ୍ୟକ୍ରମ ଗୋପାଳପୁରରେ ରହିଛି । ଗୋଟିଏ ପଟେ ଗୋପବନ୍ଧୁ ଏବଂ ଅନ୍ୟପଟେ ସିଦ୍ଧାନ୍ତ, କର୍ମୀମାନେ କାହା ସହିତ ରହିବେ, ତାହା ଜାଣିପାରୁ ନାହାନ୍ତି । ଏନେଇ ସିଦ୍ଧାନ୍ତ ଗଣମାଧ୍ୟମକୁ କହିଛନ୍ତି ଯେ, ଆୟୋଜକଙ୍କ ନିମୟନ୍ତ୍ରଣ ଏବଂ ଭଗବାନ ଡାକିବାରୁ ଏହି ଧାର୍ମିକ କାର୍ଯ୍ୟକ୍ରମକୁ ଆସିଛି । ଦଳର ଜଣେ ଶୃଙ୍ଖଳିତ କର୍ମୀ ଏବଂ ପୂର୍ବତନ ସାଂସଦ ଭାବେ ମୁଁ ସର୍ବଦା ଦଳୀୟ କର୍ମୀଙ୍କୁ ସାକ୍ଷାତ କରିଛି । ମୋର କୌଣସି ଆଶା ନାହିଁ । ଦଳ ଏବଂ ଜନସାଧାରଣ ଯାହା ନିଷ୍ପତ୍ତି ନେବେ, ତାକୁ ସ୍ୱାଗତ କରିବି । ବିଜେଡ଼ିରେ ଥିଲି, ଅଛି ଏବଂ ଆଗକୁ ମଧ୍ୟ ରହିବି । ଯେବେ ସିଗନାଲ୍ କଥା ଆସିବ, ସେତେବେଳେ ମୁଖ୍ୟମନ୍ତ୍ରୀ ଘୋଷଣା କରିବେ ବୋଲି ସେ କହିଛନ୍ତି ।