ରାମ ମନ୍ଦିର ପ୍ରାଣ ପ୍ରତିଷ୍ଠା ପାଇଁ ଅଯୋଧ୍ୟାରେ ବଢିଲା ହୋଟେଲ ଓ ବିମାନ ଭଡ଼ା …
ଅଯୋଧ୍ୟାରେ ରାମ ଲାଲାଙ୍କ ପ୍ରାଣ ପ୍ରତିଷ୍ଠା ଦିନ ଯେତେ ପାଖଉଛି ସେତେ ବଢିବାରେ ଲାଗିଛି ହୋଟେଲ ବୁକିଂ ।କ’ଣ ଆପଣ ଚାହୁଁଛନ୍ତି ଅଯୋଧ୍ୟାରେ ରହି ଏହି ଭବ୍ୟ ମୂହୁର୍ତ୍ତକୁ ଅନୁଭବ କରିବା ପାଇଁ ।ତେବେ ଆମେ ଆପଣଙ୍କୁ କହି ରଖୁଛୁ ଯେ ଆପଣଙ୍କୁ ଏଠି ଗୋଟିଏ ରାତି ପାଇଁ ରୁମ୍ ରେଣ୍ଟ ଦେବାକୁ ପଡ଼ିବ ଲକ୍ଷେ ଟଙ୍କା । ରାମମନ୍ଦିରେ ରାମଲାଲାଙ୍କ ପ୍ରାଣ ପ୍ରତିଷ୍ଠା ପୂର୍ବରୁ ଏବେ ପୂରା ଅଯୋଧ୍ୟାରେ ଦେଖା ଦେବ ଜନ ସମାଗମ । ତେଣୁ ଏପରି ସମୟରେ ଭଲ ଦୁଇ ପଇସା ରୋଜଗାର ଆଶାରେ ରହିଛନ୍ତି ହୋଟେଲ ବ୍ୟବସାୟୀ ।
ରାମଲାଲାଙ୍କ ପ୍ରାଣ ପ୍ରତିଷ୍ଠା ପାଇଁ ଲକ୍ଷ ଲକ୍ଷ ଭକ୍ତ ଏବଂ ପ୍ରାୟ ୭ ହଜାର ଭିଭିଆଇପି ଅତିଥି ଅଯୋଧ୍ୟାକୁ ଆସିବେ । ଆଉ ସମସ୍ତଙ୍କ ପାଇଁ ରହଣି ବ୍ୟବସ୍ଥାର ଆବଶ୍ୟକ ରହିଛି । ଏଥିପାଇଁ ସମସ୍ତ ହୋଟେଲରେ ରୁମ୍ ଭଡ଼ା ବହୁ ବୃଦ୍ଧି ପାଇଛି । ଅଯୋଧ୍ୟାର ଅନ୍ୟତମ ହୋଟେଲ ପାର୍କ ଇନ୍ ରେଡିସନ୍ର ସବୁଠାରୁ ବିଳାସପୂର୍ଣ୍ଣ କୋଠରିକୁ ମାତ୍ର ଗୋଟିଏ ଦିନ ପାଇଁ ୧ଲକ୍ଷ ଟଙ୍କା ପର୍ଯ୍ୟନ୍ତ ରଖାଯାଇଛି ।
ମେକ୍ ମାଇ ଟ୍ରିପ୍ ଏବଂ ବୁକିଂ ଡଟ୍ କମ୍ ପରି ଅନଲାଇନ୍ ଟ୍ରାଭେଲ୍ ଏଜେନ୍ସି ଇଭେଣ୍ଟ ପୂର୍ବରୁ ଅଯୋଧ୍ୟାଙ୍କ ଅଧିକାଂଶ ହୋଟେଲରେ ଆଉ ରୁମ୍ ଖାଲି ନାହିଁ ବୋଲି ଦର୍ଶାଇଛନ୍ତି । ଖାଲି ସେତିକି ନୁହେଁ ରୁମ୍ର ସାଧାରଣ ଭଡ଼ା ଠାରୁ ୫ ଗୁଣା ବୃଦ୍ଧି ହୋଇଥିବା କୁହାଯାଉଛି । ସିଗ୍ନେଟ୍ କଲେକ୍ସନ୍ ହୋଟେଲ ଅଧିକାଂଶ ରୁମ୍ ଗୁଡ଼ିକର ଦାମ୍ ୭୦ ହଜାର ୨୪୦ ଟଙ୍କା ରଖାଯାଇଛି । ଅହୁରି ଏପରି ଅନେକ ହୋଟେଲ ରୁମ୍ ରହିଛି ଯାହାର ପ୍ରତିଦିନ ଦାମ୍ ପ୍ରାୟ ୪୦ ହଜାର ଟଙ୍କା ରଖାଯାଇଛି ।
ଖାଲି ହୋଟେଲ୍ ନୁହେଁ ବିମାନ ଖର୍ଚ୍ଚ ମଧ୍ୟ ବୃଦ୍ଧି ପାଇଛି । ଜାନୁଆରୀ ୨୨ ପାଇଁ ମୁମ୍ବାଇ ଓ ଦିଲ୍ଲୀରୁ ଅଯୋଧ୍ୟାକୁ ଆସିଲେ ଯାତ୍ରୀମାନଙ୍କୁ ୧୫ରୁ ୨୦ ହଜାର ଟଙ୍କା ଦେବାକୁ ପଡ଼ିବ । ଯାହା ପୂର୍ବରୁ ୩ରୁ ୫ ହଜାର ଟଙ୍କା ରହିଥିଲା ।
