ପୁରୀ ବିଧାନସଭା ଆସନ : ପ୍ରାର୍ଥୀତ୍ୱ ନେଇ ବିଜେପି ଭିତରେ କସରତ

ପୁରୀ:  ୨୦୨୪ ସାଧାରଣ ନିର୍ବାଚନ ପାଖେଇ ଆସିଲାଣି। ଶାସକ ଦଳ ବିଜେଡି ପାଇଁ ପୁରୀ ଜିଲ୍ଲା ବହୁତ ଗୁରୁତ୍ୱ ବହନ କରୁଛି। ଏହି ଜିଲ୍ଲାରେ ଗତଥର ବିଜେପି ଦୁଇଟି ବିଧାନସଭା ଆସନ ଜିତିଥିଲା। ସବୁ ସ୍ଥାନରେ କଡ଼ା ମୁକାବିଲା କରିବା ସହ ବିଜେପି ଦ୍ୱିତୀୟ ସ୍ଥାନରେ ରହିଥିଲା।  ବିଜେପି ନିଜର ପୁରୀ ଆସନରେ ପ୍ରାର୍ଥୀତ୍ୱକୁ ନେଇ ପ୍ଲାନ –ବି ପ୍ରସ୍ତୁତ କରିଛି। ବର୍ତ୍ତମାନର ବିଧାୟକ ଜୟନ୍ତ ଷଡଙ୍ଗୀ ବିଜେଡି ଯିବାର ପ୍ରବଳ ସମ୍ଭାବନା ରହିଛି। ତେଣୁ ଶ୍ରୀ ଷଡ଼ଙ୍ଗୀ ଯଦି ବିଜେଡି ଯାଆନ୍ତି, ତେବେ ପୁରୀରେ କିଏ ଦଳୀୟ ପ୍ରାର୍ଥୀ ହେବ , ସେ ନେଇ ଆଲୋଚନା ଆରମ୍ଭ ହୋଇଛି। ପ୍ରାଥମିକ ବିଚାରବିମର୍ଶ ଅନୁଯାୟୀ ଜୟନ୍ତଙ୍କ ପରେ ବିଜେପି ଟିକେଟ୍ ପାଇବା ପାଇଁ ପୂର୍ବତନ ଜିଲ୍ଲାପରିଷଦ ଅଧ୍ୟକ୍ଷ ଶଙ୍କର୍ଷଣ ପରିଡ଼ା ନାଁ ଆଗରେ ରହିଛି। ତାଙ୍କୁ ଦଳର ସଭାପତି ମନମୋହନ ସାମଲ, କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ପୁରୀ ଲୋକସଭାର ବିଜେପି ପ୍ରାର୍ଥୀ ସମ୍ବିତ ପାତ୍ରଙ୍କ ସମର୍ଥନ ରହିଥିବା ତାଙ୍କ ସମର୍ଥକମାନେ ଦାବି କରିଛନ୍ତି।