ମୋଦି ଏବଂ ତାଙ୍କ ବଚସ୍କରଙ୍କ କଥା ଶୁଣିଲେ ଇଶ୍ୱରଙ୍କ ମୁଣ୍ଡ ଗୋଳମାଳ ହୋଇଯିବ : ରାହୁଲ ଗାନ୍ଧୀ
ୱାଶିଂଟନ ଡିସି : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିଦେଶ ଗସ୍ତ ନିକଟରେ ଶେଷ ହୋଇଛି। ଅପରପକ୍ଷରେ କଂଗ୍ରେସର ପୂର୍ବତନ ଅଧ୍ୟକ୍ଷ ତଥା ପୂର୍ବତନ ଏମପି ରାହୁଲ ଗାନ୍ଧୀଙ୍କର ବିଦେଶ ଗସ୍ତ ଆରମ୍ଭ ହୋଇଛି। ରାହୁଲ ଯୁକ୍ତରାଷ୍ଟ୍ର ଆମେରିକା ଗସ୍ତ କରିବା ସହ ସେଠାରେ 3ଟି ସହରରେ ଉଦବୋଧନ ଦେବାର କାର୍ଯ୍ୟକ୍ରମ ରହିଛି। ବିଭିନ୍ନ ବର୍ଗର ବ୍ୟକ୍ତି ଏବଂ ଭାରତୀୟଙ୍କୁ ଭେଟିବା ସହ ସାମ୍ପ୍ରତିକ ରାଜନୀତି ସମ୍ପର୍କରେ ରାହୁଲ ଗାନ୍ଧୀ ବକ୍ତବ୍ୟ ଦେଇଛନ୍ତି।
ଗୋଟିଏ ସଭାରେ ରାହୁଲ ଗାନ୍ଧୀ କହିଛନ୍ତି ଯେ, ସେମାନେ ସବୁ ଜାଣନ୍ତି। ଏହି ମାନସିକତା ରଖୁଥିବା ବ୍ୟକ୍ତି ସମୂହ ଦ୍ୱାରା ହିଁ ଭାରତ ଶାସନ ଚାଲିଛି। ଏହି ବ୍ୟକ୍ତିମାନେ ଭଗବାନଙ୍କ ପାଖରେ ବସିଲେ ସାରା ବିଶ୍ୱ ବ୍ରହ୍ମାଣ୍ଡ କିପରି ଚାଲିଛି ତାହା ଈଶ୍ୱରଙ୍କୁ ବୁଝାଇଦେଇପାରିବେ ବୋଲି ବିଶ୍ୱାସ ରଖନ୍ତି । ପ୍ରଧାନମନ୍ତ୍ରୀ ମୋଦି ହେଉଛନ୍ତି ଏହି ଲୋକମାନଙ୍କ ମଧ୍ୟରୁ ଜଣେ ବୋଲି ସୂଦୂର ଆମେରିକାର କାଲିଫର୍ଣ୍ଣିଆ ବିଶ୍ୱବିଦ୍ୟାଳୟରେ ଉଦ୍ବୋଧନ ଦେଇ କଂଗ୍ରେସ ନେତା ରାହୁଲ୍ ଗାନ୍ଧୀ କହିଛନ୍ତି।
ପ୍ରଧାନମନ୍ତ୍ରୀ ମୋଦୀଙ୍କୁ ସମାଲୋଚନା କରି କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ୍ କହିଛନ୍ତି, ମୋର ମନେହୁଏ ଆପଣମାନେ ଯଦି ମୋଦୀଜୀଙ୍କୁ ଭଗବାନ ଆଗରେ ବସାଇ ଦିଅନ୍ତି, ବିଶ୍ବ-ବ୍ରହ୍ମାଣ୍ଡ କେମତି ଚାଲିଛି ସେ ସର୍ବଶକ୍ତିମାନ ଭଗବାନଙ୍କୁ ବୁଝାଇ ଦେବେ। ତାହା ଶୁଣିବା ପରେ ନିଜେ କ’ଣ ସୃଷ୍ଟି କରିଛନ୍ତି ଭାବି ଭଗବାନଙ୍କ ମସ୍ତିଷ୍କ ଗୋଳମାଳ ହୋଇଯିବ।
ଦଳେ ଲୋକ ଅଛନ୍ତି, ସେମାନେ ସବୁ ବୁଝିପାରନ୍ତି। ସେମାନେ ବୈଜ୍ଞାନିକଙ୍କୁ ବିଜ୍ଞାନ, ଐତିହାସିକମାନଙ୍କୁ ଇତିହାସ, ସେନାକୁ ଯୁଦ୍ଧକୌଶଳ ବତାଇ ଦେଇପାରିବେ। କିନ୍ତୁ, ବାସ୍ତବ କଥା ହେଲା ସେମାନେ କିଛି ଜାଣନ୍ତି ନାହିଁ ବୋଲି କହି ରାହୁଲ୍ ଗାନ୍ଧୀ ସେମାନଙ୍କୁ କଟାକ୍ଷ କରିଛନ୍ତି। ପ୍ରବାସୀ ଭାରତୀୟଙ୍କୁ ରାହୁଲ ଆହୁରି କହିଥିଲେ ଯେ, ସବୁ ଧାର୍ମିକ ବିଶ୍ୱାସର ଜନତାଙ୍କ ପ୍ରତି ସମ୍ମାନ ପ୍ରଦର୍ଶନ କରିବା ଓ ଶ୍ରଦ୍ଧାଭାଜନ ହେବା ମୂଲ୍ୟବୋଧକୁ କଂଗ୍ରେସ ବିଶ୍ୱାସ କରେ। ଆପଣମାନେ ଏଠାରେ ସେ ପ୍ରକାରର ଭାରତର ପ୍ରତିନିଧିତ୍ୱ କରୁଛନ୍ତି। ଏହି ମୂଲ୍ୟବୋଧ ସହିତ ଏକମତ ହୋଇ ନ ଥିଲେ ଆପଣମାନେ ଏଠାରେ ନ ଥାନ୍ତେ। ଆପଣମାନେ ଯଦି କ୍ରୋଧ, ବିଦ୍ୱେଷ ଓ ଅହଙ୍କାରରେ ବିଶ୍ୱସ କରୁଥାଆନ୍ତେ, ତେବେ ‘ଭାଜପାର’ର କୌଣସି ସଭାରେ ବସି ଥାଆନ୍ତେ ଏବଂ ମୁଁ ‘ମନ୍ କୀ ବାତ୍’ କହୁଥାଆନ୍ତି ବୋଲି କହି ରାହୁଲ ମୋଦିଙ୍କୁ କଟାକ୍ଷ କରିଥିଲେ।
ରାହୁଲଙ୍କ ଏହି ଭାବ ବିନିମୟ କାର୍ଯ୍ୟକ୍ରମରେ ‘ଭାରତ ଯୋଡ଼ୋ ଯାତ୍ରା’ ପ୍ରସଙ୍ଗରେ ମଧ୍ୟ ଉଲ୍ଲେଖ କରାଯାଇଥିଲା। ଯାତ୍ରା ସମୟରେ ସରକାରୀ ଏଜେନ୍ସିମାନଙ୍କୁ ଅପବ୍ୟବହାର କରାଯାଉଥିବା ବିରୋଧରେ ସ୍ୱର ଉତ୍ତୋଲନ କରିଥିବା ସେ ଉଲ୍ଲେଖ କରିଥିଲେ। ଏହି ଯାତ୍ରାକୁ ବନ୍ଦ କରିବା ପାଇଁ ସରକାର ଉଦ୍ୟମ ଜାରି ରଖିଥିଲେ। ମାତ୍ର ଲୋକଙ୍କ ସମର୍ଥନ ଯାତ୍ରାକୁ ପରୋକ୍ଷରେ ସଫଳ କରିଥିଲା।
