ବିଜେପିକୁ ସରକାର ଗଠନ କରିବାରେ ରୋକୁଛି ଇଣ୍ଡିଆ ମେଣ୍ଟ , ଜାଣନ୍ତୁ କ’ଣ ରହିଛି ସମୀକରଣ
ଇଣ୍ଡିଆ ମେଣ୍ଟ ସରକାର ଗଠନ ସମ୍ଭାବନାକୁ ନେଇ ବଡ଼ ସଙ୍କେତ ଦେଇଛନ୍ତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ଓ କଂଗ୍ରେସ ସାଂସଦ ରାହୁଲ ଗାନ୍ଧି। ଇଣ୍ଡିଆ ବ୍ଲକରେ ନୂଆ ସହଯୋଗୀ ମଧ୍ୟ ସାମିଲ ହୋଇପାରନ୍ତି ବୋଲି କହିଛନ୍ତି ଏହି ୨ ଜଣ।
ବିଜେପି ସହ ମେଣ୍ଟ କରିଥିବା ଟିଡିପି ଓ ଜେଡିୟୁ ଉଭୟ ଇଣ୍ଡିଆ ବ୍ଲକକୁ ଆଡ଼କୁ ଢ଼ଳି ପାରନ୍ତି ବୋଲି ସୂଚନା ମିଳିଛି।
ବର୍ତ୍ତମାନ ସୁଦ୍ଧା ହୋଇଥିବା ଗଣତି ଅନୁଯାୟୀ, ବିଜେପି ନେତୃତ୍ୱାଧୀନ ଏନଡିଏ ଓ ଇଣ୍ଡିଆ ମଧ୍ୟରେ କେବଳ ୬୦ଟି ଆସନର ବ୍ୟବଧାନ ରହିଛି। ଏନଡିଏ ୨୯୧ଟି ଆସନ ଜିତିବାକୁ ଥିବା ବେଳେ ବିଜେପି ଏକାକୀ କେବଳ ୨୪୩ଟି ଆସନରେ ଲିଡ୍ କରୁଛି। ଏହାର ଅର୍ଥ ମ୍ୟାଜିକ ନମ୍ବର ୨୭୨ ଠାରୁ ଏହା କମ।
ଏନଡିଏ ସହ ଥିବା ଟିଡିପି ୧୬ଟି ଓ ଜେଡିୟୁ ୧୨ଟି ଆସଜନ ଜିତିବାର ସମ୍ଭାବନା ରହିଛି। ଏହି ଦୁଇ ମିଳିତ ଭାବେ ୨୮ଟି ଆସନ ଜିତିବେ। ଯଦି ଏମାନେ ବିଜେପି ଠାରୁ ଅଲଗା ହୋଇ ଯାଆନ୍ତି, ତା’ହେଲେ ନରେନ୍ଦ୍ର ମୋଦି ତୃତୀୟ ଥର ପାଇଁ କ୍ଷମତା ଦଖଲ କରିବାରୁ ବଞ୍ଚିତ ହେବେ।
ତେଣୁ ଇଣ୍ଡିଆ ବ୍ଲକରେ ଥିବା ବରିଷ୍ଠ ନେତାମାନେ ଏହି ଦୁଇ ଦଳକୁ ନିଜ ଆଡ଼କୁ ଆଣିବାକୁ ଫୁଲ ଦମରେ ଲାଗିପଡ଼ିଛନ୍ତି। ଏନସିପି ମୁଖ୍ୟ ଶରଦ ପାୱାର ମଧ୍ୟ ଟିଡିପି ସୁପ୍ରିମୋ ଚନ୍ଦ୍ରବାବୁ ନାଇଡୁ ଓ ଜେଡିୟୁ ନେତା ନୀତୀଶ କୁମାରଙ୍କ ସହ ଆଲୋଚନା ଆରମ୍ଭ କରି ଦେଇଥିବା ମଧ୍ୟ ଜଣାପଡ଼ିଛି।
