ଶୁଭ୍ରକାନ୍ତ ପଣ୍ଡାଙ୍କ ନେତୃତ୍ବରେ ଭାରତର ପ୍ରମୁଖ ଶିଳ୍ପପତି ମାନଙ୍କ କାନାଡ଼ା ଗସ୍ତ

ଭୁବନେଶ୍ୱର, ମେ ୧୨, ୨୦୨୩: ବାଣିଜ୍ୟ ଓ ନିବେଶ ସଂକ୍ରାନ୍ତରେ ମନ୍ତ୍ରୀ ସ୍ତରୀୟ ଆଲୋଚନା ପାଇଁ କାନାଡା ଗସ୍ତରେ ଥିବା ଭାରତ ସରକାରଙ୍କ ବାଣିଜ୍ୟ ଓ ଶିଳ୍ପ ମନ୍ତ୍ରୀ ପୀୟୂଷ ଗୋଏଲଙ୍କ ସହିତ ଦେଶର ପ୍ରମୁଖ ଶିଳ୍ପପତି ମାନଙ୍କ ଏକ ସମୂହ ଫିକି ଅଧ୍ୟକ୍ଷ ତଥା ଇମ୍ଫା ପରିଚାଳନା ନିର୍ଦେଶକ (ଏମଡ଼ି) ଶୁଭ୍ରକାନ୍ତ ପଣ୍ଡାଙ୍କ ନେତୃତ୍ବରେ ଯୋଗ ଦେଇଛନ୍ତି ।
ଗତ ୯ ତାରିଖରେ ଫିକି ଏବଂ କାନାଡ଼ା ବାଣିଜ୍ୟ ପରିଷଦ (ବିସିସି)ର ମିଳିତ ଉଦ୍ୟମରେ ଅନୁଷ୍ଠିତ ହୋଇଥିବା ମୁଖ୍ୟ କାର୍ଯ୍ୟନିଵାହୀ ଅଧିକାରୀ (ସିଇଓ ) ସ୍ତରୀୟ ଗୋଲ ଟେବୁଲ ବୈଠକରେ ଶ୍ରୀ ପଣ୍ଡା ଅଂଶଗ୍ରହଣ କରିଥିଲେ l ବିସିସିର ସିଇଓ ଶ୍ରୀ ଗୋଲଡି ହାଇଦରଙ୍କ ସହ ଶ୍ରୀ ପଣ୍ଡା ବୈଠକରେ ପ୍ରାରମ୍ଭିକ ସୂଚନା ପ୍ରଦାନ କରି କହିଥିଲେ ଯେ, ଭାରତ ଏବଂ କାନାଡ଼ା ମଧ୍ୟରେ ଦ୍ୱିପାକ୍ଷିକ ବାଣିଜ୍ୟରେ ଅପାର ସମ୍ଭାବନା ରହିଛି l ଗସ୍ତ ସମୟରେ ହୋଇଥିବା ବୈଠକ ସକାରତ୍ମକ ଥିବା ସେ ଉଲ୍ଲେଖ କରିଥିଲେ l ଏହି ଗୋଲ ଟେବୁଲ ବୈଠକରେ କେନ୍ଦ୍ର ମନ୍ତ୍ରୀ ପୀୟୂଷ ଗୋଏଲ ଏବଂ କାନାଡ଼ା ସରକାରଙ୍କ ଅନ୍ତର୍ଜାତୀୟ ବାଣିଜ୍ୟ, ଏବଂ କ୍ଷୁଦ୍ରଶିଳ୍ପ ଓ ଅର୍ଥନୈତିକ ବିକାଶ ଵିଭାଗ ମନ୍ତ୍ରୀ ମିସ ମ୍ୟାରି ଏନ୍ ଜି ଭାଗ ନେଇଥିଲେ l
ଅନୁରୂପ ଭାବେ ଗତ ୧୦ ତାରିଖରେ ଫିକି ଏବଂ କାନାଡ଼ା ଭାରତ ବାଣିଜ୍ୟ ପରିଷଦ ଦ୍ୱାରା ଆୟୋଜିତ ଆର୍ଥିକ କ୍ଷେତ୍ର ସଂକ୍ରାନ୍ତୀୟ ଗୋଲ ଟେବୁଲ ବୈଠକରେ ଶ୍ରୀ ପଣ୍ଡା ମଧ୍ୟ ଯୋଗ ଦେଇଥିଲେ । ଏହି ବୈଠକରେ କେନ୍ଦ୍ର ମନ୍ତ୍ରୀ ଅଂଶ ଗ୍ରହଣ କରି ଭାରତୀୟ ଶିଳ୍ପ ସମୂହ ଗୁଡିକରେ ଥିବା ଅପାର ନିବେଶ ସମ୍ପର୍କରେ ବକ୍ତବ୍ୟ ରଖିଥିଲେ l
ଫିକି ମହାସଚିବ ଶୈଳେଶ ପାଠକ ଏବଂ ଦେଶର ଅନ୍ୟ ବିଜିନେସ ଲିଡ଼ର୍ସମାନେ ଏହି ଗସ୍ତରେ ଶ୍ରୀ ପଣ୍ଡାଙ୍କ ସହିତ ଯୋଗ ଦେଇଥିଲେ l