ଆଜି ଆଇପିଏଲରେ ଦୁଇଟି ମ୍ୟାଚ୍; ପ୍ରଥମେ ଲକ୍ଷ୍ନୌ ଓ ଗୁଜରାଟ, ପରେ ମୁମ୍ବାଇ – ପଞ୍ଜାବ ମୁହାଁମୁଁହି
ଲକ୍ଷ୍ନୌ : ଆଜି ଆଇପିଏଲର ୩୦ତମ ଲିଗ୍ ର ପ୍ରଥମ ମ୍ୟାଚରେ ଲକ୍ଷ୍ନୌ ସୁପରଜ୍ୟାଣ୍ଟ୍ସ-ଗୁଜରାଟ ଟାଇଟାନ୍ସକୁ ଏକ୍ନା ଷ୍ଟାଡ଼ିୟମରେ ଭେଟିବେ। ଗୁଜରାଟ ୬ଷ୍ଠ ଓ ଲକ୍ଷ୍ନୌ ସପ୍ତମ ମ୍ୟାଚ ଖେଳିବେ। ଲକ୍ଷ୍ନୌ ବିଜୟକୁ ବଜାୟ ରଖିବାକୁ ଉଦ୍ୟମ କରିବାବେଳେ ଗୁଜରାଟ ବିଜୟପଥକୁ ଫେରିବା ପାଇଁ ପ୍ରୟାସ କରିବ।
ଲକ୍ଷ୍ନୌ ୬ଟି ମ୍ୟାଚରୁ ୪ଟି ବିଜୟ ଓ ୨ଟି ପରାଜୟ ସହ ୮ ପଏଣ୍ଟ ପାଇଛି। ଦଳ ଶେଷ ମ୍ୟାଚରେ ରାଜସ୍ଥାନ ରୟାଲ୍ସ ବିପକ୍ଷରେ ବିଜୟ ହାସଲ କରିଥିଲା। ଦୁଇ ଓପନର ଅଧିନାୟକ ଲୋକେଶ ରାହୁଲ ଓ କାଏଲ ମେୟର୍ସ ଭଲ ଫର୍ମରେ ରହିଛନ୍ତି। ସେହିପରି ଗୁଜରାଟର ଦୁଇ ଓପନର ଶାହା ଓ ଶୁଭମନ୍ ଗିଲ୍ ମଧ୍ୟ ଭଲ ପଦର୍ଶନ କରୁଛନ୍ତି। ଆଜି ଆଇପିଏଲରେ ଡବଲ ହେଡର ହୋଇଥିବାରୁ ଦ୍ୱିତୀୟ ମ୍ୟାଚରେ ପାଞ୍ଚ ଥରର ଚମ୍ପିୟାନ ମୁମ୍ବାଇ ପଞ୍ଜାବକୁ ଭେଟିବ। ମୁମ୍ବାଇର ୱାଙ୍ଖେଡେରେ ଖେଳା ଯିବାକୁଥିବା ଏହି ମ୍ୟାଚ୍ ଉପରେ ସଭିଙ୍କ ନଜର ରହିଛି।ମୁମ୍ବାଇ ଇଣ୍ଡିଆନ୍ସ ୫ଟି ମ୍ୟାଚରୁ ୩ଟି ବିଜୟ ଓ ୨ଟି ପରାଜୟ ସହ ୬ ପଏଣ୍ଟ ପାଇ ଟେବୁଲର ଷଷ୍ଠ ସ୍ଥାନରେ ରହିଛି। ସେହିପରି ପଞ୍ଜାବ ତାର ପୂର୍ବ ମ୍ୟାଚ୍ ରେ ବାଙ୍ଗାଲୋରଠୁ ହାରି ୬ ଟି ମ୍ୟାଚରୁ ୩ ଟିରେ ଜିତି ସପ୍ତମ ସ୍ଥାନରେ ରହିଛି।
