ନିଜ ଯୁକ୍ତିକୁ ଦୃଢ଼ କରିବା
ପାଇଁ ମିଛ ଇତିହାସ ପରିବେଷଣ

ଭୁବନେଶ୍ୱର: (ବିଜୟ ସାହୁ)-ବର୍ତ୍ତମାନ ଟିଭିରେ ଓଡ଼ିଶାର ରାଜନୈତିକ ଝଡ଼ ହେଉଛି ପ୍ରସନ୍ନ ପାଟଶାଣୀ -ଅମର ଶତପଥୀଙ୍କ ନବୀନ ପଟ୍ଟନାୟକଙ୍କୁ ସିଧା ଆକ୍ରମଣ । ଅଵଶ୍ୟ ଏହି ଝଡ଼ ମହାବାତ୍ୟାରେ ପରିଣତ ହେବ କି ଝିପିରି ଝିପିରି ବର୍ଷା ହେଇ କେବଳ ମାଟି ଓଦା କରି ଚାଲିଯିବ ତାହା ସପ୍ତାହ ମଧ୍ୟରେ ସ୍ପଷ୍ଟ ହେଇ ଯିବ ବୋଲି କଣ୍ଟ ଦିଆ ଯାଇଛି ।
ଏହି ବିବାଦ ଉପରେ ରାଜ୍ୟର  ବରିଷ୍ଠ ସାମ୍ବାଦିକ ନିଜର ମତାମତ ରଖି ଚାଲିଛନ୍ତି ।
ବିବାଦ ଆରମ୍ଭରେ ନକ୍ଷତ୍ର ଟିଭିର ପ୍ରଯୋଜିକା ସୁପ୍ରିୟା ଦାସ ମ୍ୟାଡାମ ବରିଷ୍ଠ ସାମ୍ବାଦିକ ପ୍ରଭୂକଲ୍ୟାଣ  ମହାପାତ୍ରଙ୍କ ସହ One -To -One ଆଲୋଚନା କରୁଥିଲେ ।
ପ୍ରଭୂ ବାବୁ ନବୀନ ବାବୁଙ୍କ ନେତୃତ୍ୱରେ କିପରି ଅମର ପ୍ରସାଦ ଶତପଥୀ , ପ୍ରସନ୍ନ ପାଟଶାଣୀ ଅଣନିଶ୍ୱାସୀ ହେଇ ଦଳ ଛାଡ଼ୁଛନ୍ତି ତାହା କହିଲେ । ତାଙ୍କର କହିବା କଥା ବିଜୁବାବୁଙ୍କ ଭଳି ନେତୃତ୍ୱ ଦକ୍ଷତା ନବୀନ ବାବୁଙ୍କ ନଥିଲା , କେବଳ ବିଜୁବାବୁଙ୍କ ନାଁ ରେ ସେ 24 ବର୍ଷ ମୁଖ୍ୟମନ୍ତ୍ରୀ ହେଇଗଲେ । ପୂର୍ବରୁ ମହତାବ ବାବୁ , ବିଜୁ ବାବୁ ପ୍ରଭୃତି ନେତା ସବୁବେଳେ ଦଳକୁ ଏକଜୁଟ କରି ରଖୁଥିଲେ । କିନ୍ତୁ ନବୀନ ବାବୁ ସମସ୍ତଙ୍କୁ ପଳେଇ ଯିବାକୁ କହି ଦୂରେଇ ଦେଉଛନ୍ତି ।

ପ୍ରଭୂକଲ୍ୟାଣ ମହାପାତ୍ରଙ୍କ ଭଳି ଓଡ଼ିଶାର ପ୍ରାୟ ସମସ୍ତ ବରିଷ୍ଠ ସାମ୍ବାଦିକ ଅନୁରୂପ ମତ ଦେଉଛନ୍ତି ।
ବର୍ତ୍ତମାନ ଯେତେବେଳେ ଓଡ଼ିଶାର ଏହା ହିଁ ମୁଖ୍ୟ ଚର୍ଚ୍ଚା ତାହା ଶୁଣି ଶୁଣି ନିଶ୍ଚିତ ଭାବରେ ଓଡ଼ିଶାର ଯୁବକ ମାନେ ଭାବୁଥିବେ ନବୀନ ପଟ୍ଟନାୟକଙ୍କ ପୂର୍ବରୁ ଓଡ଼ିଶାର ବଡ଼ ବଡ଼ ନେତାମାନେ କେତେ ପରସ୍ପର କୁ ଆଦର କରୁ ନ ଥିଲେ ସତେ । ସତେ ଯେମିତି ହାତ ଧରି ନେତା ସୃଷ୍ଟି କରୁଥିଲେ , କୌଣସି ଗୋଛି କଟାକଟି , ପଛ ଟଣାଟାଣି ନ ଥିଲା ।

କିନ୍ତୁ ବାସ୍ତବରେ ସେୟା ନ ଥିଲା ଯାହା ଆମକୁ ସାମ୍ବାଦିକ ପରଶୁଛନ୍ତି ।
କିଛି ଇତିହାସ ଆମେ ଜାଣିବା ଉଚିତ ।
ହରେକୃଷ୍ଣ ମହତାବ , ବିଜୁ ପଟ୍ଟନାୟକ, ପ୍ରହ୍ଲାଦ ମଲ୍ଲିକ, ପ୍ରତାପ ମହାନ୍ତି ଓ ନୀଳମଣି ରାଉତରାୟ ହେଉଛନ୍ତି ଓଡ଼ିଶାର ବରିଷ୍ଠ ନେତାଗଣ । ସର୍ଵ ବରିଷ୍ଠ ହେଉଛନ୍ତି ହରେକୃଷ୍ଣ ମହତାବ ।

ନୀଳମଣି ରାଉତରାୟଙ୍କ
ମୁଖ୍ୟମନ୍ତ୍ରୀ ହେବା କାହାଣୀ –

1977 ରେ ଜନତା ପାର୍ଟି 147 ଆସନରୁ 110 ଆସନ ଜିତି କ୍ଷମତାକୁ ଆସିଲା । ବିଜୁବାବୁ କେନ୍ଦ୍ର ମନ୍ତ୍ରିମଣ୍ଡଳରେ ଯୋଗ ଦେବାରୁ ରାଜ୍ୟର ମୁଖ୍ୟମନ୍ତ୍ରୀ ପଦ ପାଇଁ ଜୋରସୋର ଲବି ଆରମ୍ଭ ହେଇଗଲା । ପ୍ରହ୍ଲାଦ ମଲ୍ଲିକ, ପ୍ରତାପ ମହାନ୍ତି, ନୀଳମଣି ରାଉତରାୟ ମୁଖ୍ୟମନ୍ତ୍ରୀ ଦୌଡ଼ରେ ରହିଲେ ।
କିନ୍ତୁ ପ୍ରହ୍ଲାଦ ମଲ୍ଲିକ ସବୁଠାରୁ ଲୋକପ୍ରିୟ ନେତା ଥିଲେ ଓ ରାଜ୍ୟର ଜଣେ ତୁଙ୍ଗ ହରିଜନ ନେତା ଥିଲେ ।ଅଥଚ ଦୁଇଟି ସାଧାରଣ ନିର୍ବାଚନ ମଣ୍ଡଳୀରୁ 1971 ମସିହାରେ ଜିତିଥିଲେ । ଏବଂ 4 ଟି ବିଧାନସଭା ଓ ଗୋଟିଏ ଲୋକସଭା ଆସନରେ ହାରିଥିବା ବିଜୁବାବୁଙ୍କ ପାଇଁ ଉପ ନିର୍ବାଚନରେ ରାଜନଗର ନିର୍ବାଚନ ମଣ୍ଡଳୀ ଛାଡି ଥିଲେ । ତେଣୁ
ବିଜୁବାବୁ ପ୍ରହ୍ଲାଦ ମଲ୍ଲିକ ମୁଖ୍ୟମନ୍ତ୍ରୀ ହେବା ଚାହୁଁଥିଲେ । ଓଡ଼ିଶାର ପ୍ରଥମ ହରିଜନ ମୁଖ୍ୟମନ୍ତ୍ରୀ ହୁଅନ୍ତୁ ବୋଲି ତାଙ୍କର ଇଚ୍ଛା ଥିଲା । ମୋରାରଜି ଦେଶାଇ ମଧ୍ୟ ତାଙ୍କ ସପକ୍ଷରେ ଥିଲେ । ଜନତା ପାର୍ଟିର କେନ୍ଦ୍ରୀୟ କମିଟି ନୀତିଗତ ନିଷ୍ପତ୍ତି ନେଇଥିଲେ ଜରୁରୀ ପରିସ୍ଥିତିରେ ଜେଲ ଯାଇଥିବା ନେତା ହିଁ ମୁଖ୍ୟମନ୍ତ୍ରୀ ହେବେ । ଏହି ସର୍ତ୍ତ ଅନୁଯାୟୀ ନୀଳମଣି ରାଉତରାୟଙ୍କ ମୁଖ୍ୟମନ୍ତ୍ରୀ ହେବା ବାଟ ବନ୍ଦ ହେଇ ଯାଉଥିଲା ।
ହରେକୃଷ୍ଣ ମହତାବ ସେତେବେଳେ ନୀଳମଣି ରାଉତରାୟଙ୍କ ପତ୍ନୀ ନଳିନୀ ଦେବୀ ରାଉତରାୟଙ୍କ ଶେଷ ଇଚ୍ଛା କଥାଟି ବିଜୁବାବୁଙ୍କୁ ଚେତେଇ ଦେଲେ । ନଳିନୀ ଦେବୀ ଯେତେବେଳେ ବମ୍ବେରେ କ୍ୟାନ୍ସର ବେମାରୀ ସହ ଲଢୁଥିଲେ, ସେତେବେଳେ ମହତାବ ବାବୁ ଓ ବିଜୁବାବୁଙ୍କୁ କହିଥିଲେ, ତାଙ୍କର ସ୍ୱାମୀ ଓଡ଼ିଶାର ମୁଖ୍ୟମନ୍ତ୍ରୀ ହେବା ସେ ଚାହାନ୍ତି ।
ଏହି ସ୍ମୃତିଚାରଣ ମୁଖ୍ୟମନ୍ତ୍ରୀ ଦୌଡ଼ ରେ ନୀଳମଣି ରାଉତରାୟଙ୍କ ପାଇଁ ପଥ ପ୍ରଶସ୍ତ କଲା ।
ସିକନ୍ଦର ବଖତ ସେତେବେଳେ ଜନତା ପାର୍ଟି ସଂସଦୀୟ ଦଳର ପର୍ଯ୍ୟବେକ୍ଷକ ଭାବରେ ଓଡ଼ିଶା ଜନତା ପାର୍ଟି ବିଧାୟକଙ୍କ ନେତା ନିର୍ବାଚନ ବୈଠକରେ ଯୋଗ ଦେଇଥିଲେ ।  ବୈଠକରେ ବିଜୁବାବୁ ନୀରବ ରହିଲେ ଓ ଜରୁରୀ ପରିସ୍ଥିତି ରେ ଜେଲ ଯାଇଥିବା ସର୍ତ୍ତକୁ ଅଣଦେଖା କରି ନୀଳମଣି ରାଉତରାୟ ନେତା ନିର୍ବାଚନ ହେଇଗଲେ । ଜାତିଗତ ଦ୍ୱନ୍ଦ୍ୱ ଜନତା ପାର୍ଟିର କେନ୍ଦ୍ରୀୟ କମିଟି ନୀତି ନିକଟରେ ବଳୀ ପଡ଼ିଲା ।
କଂଗ୍ରେସର ଭେଟେରାନ ନେତା ଭାଗବତ ମହାନ୍ତି ପ୍ରହ୍ଲାଦ ମଲ୍ଲିକଙ୍କ ଜୀବନୀ ପୁସ୍ତିକାରେ ଗୋଟିଏ ଅଧ୍ୟାୟ ” ପ୍ରଥିତଯଶା ପ୍ରହ୍ଲାଦ ” ରେ ଲେଖିଛନ୍ତି -ସେତେବେଳେ Backdoor political machination ଯୋଗୁଁ ଜଣେ ଦଳିତ ନେତା ମୁଖ୍ୟମନ୍ତ୍ରୀ ହେବାରୁ ବଞ୍ଚିତ ହେଇଥିଲେ ।
ମହାନ୍ତି ପୁଣି ତାଙ୍କର ” ଜାତିଦ୍ୱନ୍ଦ୍ୱରେ ମୁଖ୍ୟମନ୍ତ୍ରୀ ପଦ ” ଅଧ୍ୟାୟରେ ଲେଖିଛନ୍ତି , ବିଜୁବାବୁ ପ୍ରହ୍ଲାଦ ମଲ୍ଲିକ ଙ୍କ ଅବଦାନକୁ ଭୁଲିଗଲେ ଓ ଜନତା ପାର୍ଟିର ସଂସଦୀୟ ପାର୍ଟିରେ ପ୍ରହ୍ଲାଦ ମଲ୍ଲିକଙ୍କ Popularity କୁ ସହ୍ୟ କରି ପାରି ନ ଥିଲେ ଏବଂ ଜଣେ ଦଳିତ ନେତାଙ୍କ ଶୀର୍ଷ ପଦବୀକୁ ଉତ୍ତରଣ ପଥ ବନ୍ଦ କରି ଦେଇଥିଲେ ।
ଶ୍ରୀ ମହାନ୍ତି ଶ୍ରୀକାନ୍ତ ଜେନା ଓ ନଳିନୀ ମହାନ୍ତିଙ୍କ ଭୂମିକା କଥା ମଧ୍ୟ ଉଲ୍ଲେଖ କରିଛନ୍ତି ।
ପୁସ୍ତକଟି ପ୍ରହ୍ଲାଦ ମଲ୍ଲିକ ସ୍ମୃତି ପରିଷଦ ଦ୍ଵାରା ମୁଦ୍ରଣ ହେଇଥିଲା ।
ଏହାକୁ ରାଜ୍ୟ ସଂସ୍କୃତି ଓ ଭାଷା ମନ୍ତ୍ରୀ ପ୍ରଦୀପ ପାଣିଗ୍ରାହୀ ଉନ୍ମୋଚନ କରିଥିଲେ । ପୁସ୍ତକ ସମ୍ପର୍କରେ ଆଲୋଚନା କରି ପୂର୍ବତନ ଅର୍ଥମନ୍ତ୍ରୀ  ପଞ୍ଚାନନ କାନୁନଗୋ କହିଥିଲେ , ନୀଳମଣି ରାଉତରାୟ ଓ ପ୍ରତାପ ମହାନ୍ତିଙ୍କ ମଧ୍ୟରେ ଏକ ଗୁପ୍ତ ବୈଠକ ଅନୁଷ୍ଠିତ ହେଇଥିଲା । ଏଥିରେ ଯୁବ ନେତା ଶ୍ରୀକାନ୍ତ ଜେନା ଓ ନଳୀନ ମହାନ୍ତି ମଧ୍ୟସ୍ତି ଥିଲେ । 
ଏହି ଆଲୋଚନା ଅନୁଯାୟୀ ପ୍ରତାପ ମହାନ୍ତି କ୍ୟାବିନେଟର ଦ୍ୱିତୀୟ ଓ ପ୍ରହ୍ଲାଦ ମଲ୍ଲିକ ତୃତୀୟ ସ୍ଥାନରେ ରହିଲେ । ପ୍ରତାପ ମହାନ୍ତି ରାଜସ୍ୱ, ଶକ୍ତି , ଗୋଷ୍ଠୀ ଉନ୍ନୟନ ଓ ସମାଜ ସେବା ,ବାଣିଜ୍ୟ ଓ ଉଠା ଜଳସେଚନ ବିଭାଗ ପାଇଲେ ଓ ପ୍ରହ୍ଲାଦ ମଲ୍ଲିକ କୃଷି, ସମବାୟ , ଜଳସେଚନ, ଆଦିବାସୀ ଓ ଗ୍ରାମୀଣ କଲ୍ୟାଣ ବିଭାଗ ପାଇଲେ ।

ଇଲିସ, ଧୂଆଁ ପତ୍ର , ରସଗୋଲା
ମହତାବ – ନୀଳମଣି ଲଢେ଼ଇ –

ହରେକୃଷ୍ଣ ମହତାବ ନୀଳମଣି ରାଉତରାୟଙ୍କ ଠାରୁ 21 ବର୍ଷ ବଡ଼ ।
1946ରେ ସାଧାରଣ ନିର୍ବାଚନରେ ଜିତି ମହତାବଙ୍କ ନେତୃତ୍ୱରେ ପ୍ରଥମ କଂଗ୍ରେସ ସରକାର ଗଠନ ହେଇଥିଲା । ନୀଳମଣି ରାଉତରାୟ ବାଲେଶ୍ଵର ଦକ୍ଷିଣ ବିଧାନସଭା ଆସନରୁ ପ୍ରଥମେ 1948ରେ ଉପ ନିର୍ବାଚନରେ ଜିତି ବିଧାନସଭାକୁ ପ୍ରବେଶ କରିଥିଲେ । ବିଧାୟକ କୈଳାସ ଚନ୍ଦ୍ର ମହାନ୍ତିଙ୍କ ଇସ୍ତଫା ଯୋଗୁଁ ଏହି ଆସନ ଖାଲି ହେଇ ଥିଲା । ସେତେବେଳେ ନୀଳମଣି ରାଉତରାୟଙ୍କ ବୟସ ମାତ୍ର 28 ବର୍ଷ । ସେ ବିନା ପ୍ରତିଦ୍ବନ୍ଦୀରେ ନିର୍ବାଚିତ ହେଇଥିଲେ । ନୀଳମଣି ରାଉତରାୟ 1952ରେ ଧାମନଗର , 1957ରେ ଚାନ୍ଦବାଲି ( ଦ୍ୱୈତ ଆସନ ) , 1961ରେ ବାସୁଦେବ ପୁରରୁ ନିର୍ବାଚିତ ହେଇଥିଲେ । ସେତେବେଳେ ସେଇ ଅଞ୍ଚଳର ଜଣେ ଉତୁଙ୍ଗ ନେତା ହରେକୃଷ୍ଣ ମହତାବ । କିନ୍ତୁ ଭୁବନେଶ୍ୱରରୁ ପ୍ରାର୍ଥୀ ହେଉଥିଲେ ।ପୂର୍ବରୁ ଓଡ଼ିଶାର ମୁଖ୍ୟମନ୍ତ୍ରୀ / ପ୍ରଧାନମନ୍ତ୍ରୀ , କେନ୍ଦ୍ରରେ ବାଣିଜ୍ୟ ଓ ଶିଳ୍ପ ମନ୍ତ୍ରୀ ଓ ବମ୍ବେର ରାଜ୍ୟପାଳ ହେଇଥିଲେ । 1967 ପୂର୍ବରୁ କଂଗ୍ରେସ ଛାଡି ଜନ କଂଗ୍ରେସ ପାର୍ଟି ଗଠନ କରିଥିଲେ ଓ 1967ରେ ନିର୍ବାଚନ ଲଢ଼ି ଥିଲେ । ସେତେବେଳେ ସେ ବିଜୁ-ବିରେନଙ୍କ ଦୁର୍ନୀତିକୁ ଇସ୍ୟୁ କରି କଂଗ୍ରେସକୁ ହରେଇବା ପାଇଁ ଅଣ୍ଟା ଭିଡି ଥିଲେ ।
ବାସୁଦେବପୁର ତାଙ୍କର ଟାର୍ଗେଟ ଥିଲା । ସେଠାରୁ କଂଗ୍ରେସ ପ୍ରାର୍ଥୀ ଭାବରେ ନୀଳମଣି ରାଉତରାୟ ଲଢୁଥିଲେ । ରାଉତରାୟ ବହୁତ ଲୋକପ୍ରିୟ ଥିଲେ , ତେଣୁ ତାଙ୍କୁ ହରେଇବା ମହତାବଙ୍କ ପାଇଁ କଷ୍ଟକର ଥିଲା ।
ମହତାବ ତାଙ୍କର ଚିରାଚରିତ ନିର୍ବାଚନ ମଣ୍ଡଳୀ ସହ ବାସୁଦେବ ପୁରରୁ ମଧ୍ୟ ପ୍ରାର୍ଥୀ ହେଲେ ।
ନୀଳମଣି ରାଉତରାୟଙ୍କ ପାଇଁ ବହୁ ସଂଖ୍ୟକ ଯୁବ ସ୍ୱେଚ୍ଛାସେବୀ ପ୍ରଚାର ମଇଦାନରେ ଓହ୍ଲେଇ ଥିଲେ ।
ନୀଳମଣି ରାଉତରାୟ ଏହି ଲଢେଇ କୁ ନିଜର ଆତ୍ମଜୀବନୀ ସ୍ମୃତି ଓ ଅନୁଭୂତି ରେ ଲେଖିଛନ୍ତି ।
ନିର୍ବାଚନ ପୂର୍ବରୁ ଇଲିସ ମାଛ ଅସମ୍ଭବ ଭାବରେ ବୃଦ୍ଧି ପାଇଗଲା । ବାସୁଦେବପୁର ନିର୍ବାଚନ ମଣ୍ଡଳୀର ଦୀର୍ଘ ଉପକୂଳରେ ବହୁ ସଂଖ୍ୟକ ମତ୍ସ୍ୟଜୀବୀ ବାସ କରୁଥିଲେ । ଇଲିସ ଉତ୍ପାଦନ ଏତେ ହେଲା ଯେ ମତ୍ସ୍ୟଜୀବୀମାନେ ପୂର୍ବରୁ କେବେ ଜାଣି ନଥିଲେ ।
ହରେକୃଷ୍ଣ ମହତାବଙ୍କ ଦ୍ଵାରା ଗୁଜବ ଛାଡି ଦିଆଗଲା । ମହତାବଙ୍କ ଭଳି ଜଣେ ସନ୍ଥାତ୍ମା ଏହି ଅଞ୍ଚଳରୁ ପ୍ରାର୍ଥୀ ହେଇ ଥିବାରୁ ଏଭଳି ବିସ୍ମୟ ଘଟଣା ଘଟିଛି । ମହତାବଙ୍କ ସାନଭାଇ ଗୋପୀନାଥ ଦାସ ମଧ୍ୟ କହିବା ଆରମ୍ଭ କଲେ, ତାଙ୍କ ବଡ଼ଭାଇଙ୍କ ଚକ୍ଷୁରୁ ଜ୍ୟୋତି ନିର୍ଗତ ହେଉଛି । ଲୋକେ କୌତୁହଳ ହେଇ ସନ୍ଥାତ୍ମା ମହତାବଙ୍କୁ ଦର୍ଶନ କରିବା ପାଇଁ ତାଙ୍କ ନିର୍ବାଚନ ସଭାକୁ ହଜାର ହଜାର ସଂଖ୍ୟାରେ ଗଲେ ।
ଅନ୍ୟ ଏକ କାହାଣୀ ହେଲା – ଧୂଆଁ ପତ୍ର ଓ ରସଗୋଲା ।
ସେତେବେଳେ ଧୂଆଁପତ୍ର କିଲୋ ₹ 9 ଟଙ୍କା ହେଇଗଲା ।ମାତ୍ର ରସଗୋଲା କିଲୋ ₹ 6 .
ମହତାବଙ୍କ ପକ୍ଷରୁ ପ୍ରଚାର କରାଗଲା ଗରୀବ ଲୋକଙ୍କୁ ହଇରାଣ କରିବା ପାଇଁ କଂଗ୍ରେସ ସରକାର  ଧୂଆଁପତ୍ର ମୂଲ୍ୟ ଅଧିକ କରିଛନ୍ତି ଓ ନୀଳମଣି ରାଉତରାୟ ପ୍ରତିଦିନ ସକାଳେ ରସଗୋଲା ଖାଉ ଥିବାରୁ ମୂଲ୍ୟ କମ ରଖିଛନ୍ତି । ସେତେବେଳେ ନୀଳମଣି ରାଉତରାୟ ରାଜ୍ୟ କଂଗ୍ରେସ ସରକାରଙ୍କ ଯୋଗାଣ ମନ୍ତ୍ରୀ ।
ଏହି ଦୁଇ ବ୍ୟକ୍ତିତ୍ବର ଲଢେଇରେ ମହତାବ 20 ହଜାରରୁ ଉର୍ଦ୍ଧ୍ବ ବ୍ୟବଧାନରେ ଜିତିଥିଲେ ଓ ନୀଳମଣି ରାଉତରାୟ ଏହି ଥରେ ମାତ୍ର ହାରିଥିଲେ ।

ପ୍ରୋକ୍ତ ରାଜନୈତିକ ଇତିହାସ ପ୍ରମାଣ କରେ କି ଆମର ତୁଙ୍ଗ ନେତାମାନେ କଦାପି ସହଯୋଗୀ ପ୍ରିୟ ନଥିଲେ । ହରେକୃଷ୍ଣ ମହତାବ 1967 ରେ ବିଜୁବାବୁଙ୍କ ନେତୃତ୍ୱାଧୀନ କଂଗ୍ରେସ ସରକାରଙ୍କୁ ହରେଇବା ପାଇଁ ଜନକଂଗ୍ରେସ ପାର୍ଟି ଗଠନ କରିଛନ୍ତି , ବାଲେଶ୍ଵର ଜିଲ୍ଲାର କନିଷ୍ଠ ରାଜନୈତିକ ପ୍ରତିଦ୍ବନ୍ଦୀ ନୀଳମଣି ରାଉତରାୟଙ୍କୁ ହରେଇବା ପାଇଁ ଇଲିସ, ଧୂଆଁ ପତ୍ର, ରସଗୋଲା ସମେତ ସନ୍ଥାତ୍ମା ମାର୍ଗର ଆଶ୍ରୟ ନେଇଛନ୍ତି , ପୁଣି 1977ରେ ନୀଳମଣି ରାଉତରାୟଙ୍କୁ ମୁଖ୍ୟମନ୍ତ୍ରୀ କରେଇବା ପାଇଁ ବିଜୁବାବୁଙ୍କ ସହାୟତା ନେଇଛନ୍ତି ।

ଏକଥା ଅବିଭକ୍ତ ବାଲେଶ୍ଵର ଜିଲ୍ଲାରୁ ସୃଷ୍ଟି ହେଇଥିବା ସାମ୍ବାଦିକମାନେ ନିଶ୍ଚିତ ଭାବରେ ଜାଣନ୍ତି । କିନ୍ତୁ ବଙ୍ଗଳାରେ ଏକ ଲୋକ କଥା – ଯଖନ ଯେମନ ତଖନ ତେମନ  ଭଳି ଆମ ସାମ୍ବାଦିକମାନେ ଏଭଳି ନବୀନ ବିରୋଧୀ ହେଇଛନ୍ତି ଯେ ଅତୀତର ଇତିହାସକୁ ମଧ୍ୟ ଠିକ ଉପସ୍ଥାପନ କରୁ ନାହାନ୍ତି ।
ବର୍ତ୍ତମାନ ନବୀନ ବିରୋଧୀ ଯୁଦ୍ଧଂଦେହୀ ଆହ୍ୱାନ ଅତୀତ ତୁଳନାରେ କିଛି ନୁହେଁ।।