କମିଟିଟିଏ ପାଇଁ ନୂଆଦିଲ୍ଲୀରେ ନାକେଦମ୍ ମନମୋହନ-ମାନସ, ଏଯାଏଁ ଛିଣ୍ଡୁନି ଅଙ୍କ
ଭୁବନେଶ୍ୱର : ରାଜ୍ୟ ବିଧାନସଭା ନିର୍ବାଚନ ଓ ଲୋକସଭା ନିର୍ବାଚନ ପାଖେଇଲାଣି। ଦଳ ଥରେ ଚେଷ୍ଟା କରି ତୃତୀୟରୁ ଦ୍ୱିତୀୟ ସ୍ଥାନକୁ ଆସିଛି। କେନ୍ଦ୍ରରେ ସରକାର ଅଛି। ଇଡି, ସିବିଆଇ, ଆୟକର ବିଭାଗ ମଧ୍ୟ ସାଥ୍ ଦେବ। ଦ୍ୱିତୀୟରୁ ପ୍ରଥମ ଚେଷ୍ଟା କଲେ ପୂର୍ଣ୍ଣ ସଫଳତା ନ ମିଳିପାରେ। ହେଲେ ୧୫ ରୁ ୧୬ ଲୋକସଭା ଏବଂ ୫୦ ରୁ ୬୦ ବିଧାନସଭା ଆସନ ହାତେଇ ହେବ। ୟୁପିରେ ଦଳକୁ ବିଜୟୀ କରିଥିବା ସୁନୀଲ ବଂଶଲଙ୍କ ପରି ଧୂରୀଣ ରଣନୀତିକାର କ୍ଷେତ୍ର ପ୍ରଭାରୀ ହେବେ। ପୁରୁଖା ନେତା ମନମୋହନ ସାମଲ ରାଜ୍ୟ ସଭାପତି ହେବେ। ଏମିତି କେଇ ଧାଡ଼ି କଥା ମାସ କେତେଟା ଆଗରୁ ବିଜେପିର ନେତା ଏବଂ ସମର୍ଥକଙ୍କ ନିକଟରୁ ଶୁଣିବାକୁ ମିଳିଥିଲା। ହେଲେ ବର୍ତ୍ତମାନ ଆଉ ସେପରି ଶୁଣିବାକୁ ମିଳିନାହିଁ।
ବିଜେପି ଓ ବିଜେଡି ତୁଳନାରେ ରାଜ୍ୟରେ ଅଧିକ ବିଶୃଙ୍ଖଳିତ ବୋଲାଉଥିବା କଂଗ୍ରେସ ସାମାନ୍ୟ ଭୁଲ୍ ପାଇଁ ତିନି ଜଣ ନେତାଙ୍କୁ ନିଲମ୍ବନ କରିସାରିଲାଣି। ଏମାନଙ୍କ ମଧ୍ୟରେ ପୂର୍ବତନ କାର୍ଯ୍ୟକାରୀ ସଭାପତି, ବର୍ତ୍ତମାନର ବିଧାୟକ ଏବଂ ଦୁଇ ଦଶନ୍ଧିରୁ ଅଧିକ ଦିନ ଧରି କଂଗ୍ରେସରେ ଥିବା ନେତା ରହିଛନ୍ତି। ଶରତ ପଟ୍ଟନାୟକ ନିଜ ଟିମ୍ ମଧ୍ୟ ଘୋଷଣା କରିସାରିଲେଣି। ହେଲେ ବିଜେପିରେ ଏହି କାମ ହୋଇପାରିନାହିଁ। ସୁନୀଲ ବଂଶଲ ଏକଦା ପାର୍ଟି ଅଫିସରେ ବୈଠକ କରିବା ସମୟରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମର୍ଥକମାନଙ୍କ ଅନୁପସ୍ଥିତି ବାରି ହୋଇ ପଡିଥିଲା। ଏହା ପରେ ଶ୍ରୀ ବଂଶଲ ଏପରି କାହିଁକି ହେଉଛି ବୋଲି ପଚାରିଥିଲେ। ଉତ୍ତରରେ ଶ୍ରୀ ସାମଲ କହିଥିଲେ ନୂଆ ଟିମ୍ ଗଠନ ହୋଇନାହିଁ। ତେଣୁ ବୈଠକରେ ଉତ୍ସାହ ନାହିଁ। ଏହା ଶୁଣି ପୂର୍ଣ୍ଣାଙ୍ଗ ତାଲିକା ପ୍ରସ୍ତୁତ କରି ନୂଆଦିଲ୍ଲୀ ଆସିବକୁ ମନମୋହନ ସାମଲଙ୍କୁ ପ୍ରସ୍ତାବ ଦିଆଯାଇଥିଲା। ତାଲିକା ତିଆରି କରି ମନମୋହନ ସାମଲ , ସଙ୍ଗଠନ ମନ୍ତ୍ରୀ ମାନସ ରଞ୍ଜନ ମହାନ୍ତି ଗତ ସପ୍ତାହରେ ନୂଆଦିଲ୍ଲୀ ଗସ୍ତ କରିଥିଲେ। ଯୁବ ମୋର୍ଚ୍ଚା ଠାରୁ ଆରମ୍ଭ କରି ସବୁ ଛାମୁଆ ମୋର୍ଚ୍ଚାର ସଭାପତି ବଦଳାଇବା ପାଇଁ ପ୍ରସ୍ତାବ ଦେଇଥିଲେ। ହେଲେ ଏହି କମିଟିକୁ କୁଆଡେ ଶତ ପ୍ରତିଶତ ଜେପି ନଡ୍ଡା ଅନୁମୋଦନ କଲେ ନାହିଁ। ବର୍ତ୍ତମାନ ମିଳିଥିବା ଖବର ଅନୁଯାୟୀ ମନମୋହନ ସାମଲ ନୂଆଦିଲ୍ଲୀରୁ ଫେରି ନାହାନ୍ତି। ଆଜି ସନ୍ଧ୍ୟା କିମ୍ବା କାଲି ଫେରିବେ। ହେଲେ ସଙ୍ଗଠନ ମନ୍ତ୍ରୀ ମାନସ ରଞ୍ଜନ ମହାନ୍ତି ସୋମବାର ଫେରି ଆସିଛନ୍ତି। ଓଡ଼ିଶାରୁ ପ୍ରସ୍ତୁତ ହୋଇଥିବା ତାଲିକାକୁ ପୂର୍ଣ୍ଣାଙ୍ଗ ଅନୁମୋଦନ ମିଳିପାରିନାହିଁ। ଏକଥା ଓଡ଼ିଶା ଫେରି ତାଙ୍କ ହାବଭାବରୁ ସ୍ପଷ୍ଟ ବାରି ହୋଇପଡିଛନ୍ତି।
କେତେକ ସୂତ୍ର ଧର୍ମେନ୍ଦ୍ର ପ୍ରଧାନଙ୍କ ଦଖଲ ଯୋଗୁ ଏପରି ହୋଇଥିବା କହିଛନ୍ତି। ହେଲେ ସୁନୀଲ ବଂଶଲଙ୍କ ନିକଟତମ ବ୍ୟକ୍ତିମାନଙ୍କ କହିବାନୁଯାୟୀ, ତୁ ଗୁହାରୀ କରିବାକୁ ଯାହାକୁ…..ମୁଁ …ନ୍ୟାୟରେ ସଙ୍ଗଠନ ଚାଲିଛି। ସୁନୀଲ ବଂଶଲ ଆସିବା ପୂର୍ବରୁ ଧର୍ମେନ୍ଦ୍ର ପ୍ରଧାନଙ୍କ ପେଟ୍ରୋଲିୟମ୍ ମନ୍ତ୍ରାଳୟ ଅପସାରଣ କରାଯାଇଥିଲା। ତାଙ୍କୁ ଶିକ୍ଷା ବିଭାଗ ଦିଆଯାଇଥିଲା। ଆଗାମୀ ତିନି ପ୍ରମୁଖ ରାଜ୍ୟ ବିଧାନସଭାରେ ତାଙ୍କୁ କୌଣସି ରାଜ୍ୟର ପ୍ରଭାରୀ କରାଯାଇନାହିଁ। ତେଣୁ ତାଙ୍କ ପ୍ରଭାବ ହ୍ରାସ ପାଉଥିବା ଏକ ବାର୍ତ୍ତା ଯାଇଥିଲା। ମାତ୍ର ଆଗାମୀ ଦିନରେ ସଂସଦରେ ବିଜେଡିର ଆବଶ୍ୟକତା ବିଜେପି ଅନୁଭବ କରୁଛି। ନିଜର ପୁରୁଣା ସାଥି ଏନଡିଏକୁ ଫେରନ୍ତୁ ବୋଲି ବିଜେପି ଚାହୁଁଛି। ଟିଡିପି, ଜେଡିୟୁ, ଶିବସେନା, ଅକାଳୀ ଦଳ ପରି ପାର୍ଟି ଏବେ ବି ବିଜେପି ଠାରୁ ଦୂରରେ। ତେଣୁ ବିଜେଡି ମୁଖିଆ ନବୀନ ପଟ୍ଟନାୟକଙ୍କୁ କେନ୍ଦ୍ର ଅପସେଟ୍ କରିବାକୁ ଚାହୁଁନି ବୋଲି ବିଜେପି ନେତା ଜଣଙ୍କ କହିଛନ୍ତି। ତଥା ମନମୋହନଙ୍କ ଟିମ୍ ପ୍ରଭାତୀ ପରିଡ଼ାଙ୍କୁ ପୁନର୍ବାର ମହିଳା ମୋର୍ଟ୍ଟା ସଭାପତି ଏବଂ ଯୁବ ସଭାପତି ଭାବେ ସୁଜିତ ସିଂଙ୍କ ନାମ ଉପରେ ଚର୍ଚ୍ଚା ଜୋର ହେଉଛି।
