ମାୟାବତୀ, ଦେବଗୌଡ଼ାଙ୍କ ଦଳ ବିରୋଧିଙ୍କ ଅଙ୍କ ବିଗାଡ଼ିବ !

ନୂଆଦିଲ୍ଲୀ : କର୍ଣ୍ଣାଟକ ନିର୍ବାଚନରେ ବିଜୟୀ ହେବା ପରେ କଂଗ୍ରେସ ଶିବିରରେ ଉତ୍ସାହ ଆସିଛି। ଏହା ମଧ୍ୟରେ ବିରୋଧି ଦଳ ସମୂହ ଦୁଇଟି ବୈଠକ ଯଥାକ୍ରମେ ପାଟନା ଏବଂ ବେଙ୍ଗଲୁରୁରେ ଅନୁଷ୍ଠିତ ହୋଇଗଲାଣି। ହେଲେ ଭାରତ ରାଜନୀତିରେ ଦୁଇଟି ଦଳ ଏପରି ଅଛନ୍ତି, ଯେଉଁମାନେ ବିରୋଧି ଦଳ ରଣନୀତିକୁ ଫେଲ୍ କରିବାର କ୍ଷମତା ରଖିଥାନ୍ତି। ଉତ୍ତର ଭାରତରେ ମାୟାବତୀ ଏବଂ ଦକ୍ଷିଣ ଭାରତରେ ଦେବଗୌଡ଼ା ମେଣ୍ଟକୁ କ୍ଷତି ପହଞ୍ଚାଇପାରନ୍ତି।କର୍ନାଟକରେ ଯଦି ଜେଡିଏସ୍ ସହ ବିଜେପି ମେଣ୍ଟ କରେ ତେବେ ପାଞ୍ଚରୁ ଛଅ ଆସନ ଜେଡିଏସ୍ ଜିତିପାରେ। ସେହିପରି ମେଣ୍ଟ ପ୍ରଭାବରେ ବିଜେପି ପ୍ରାୟ 40 ପ୍ରତିଶତ ଲୋକସଭା ସିଟ୍ ହାତେଇପାରେ। କେରଲ କେତୋଟି ସ୍ଥାନରେ ଜେଡିଏସ୍ ଭୋଟ ଉଭୟ ବାମପନ୍ଥୀ ଏବଂ କଂଗ୍ରେସକୁ କ୍ଷତି ପହଞ୍ଚାଇପାରେ।  ବିରୋଧି ମେଣ୍ଟ ପାଇଁ ୟୁପିରେ ବିଜେପିକୁ ରୋକିବା କାଠିକର ପାଠ ହେବାକୁ ଯାଉଛି। ଗତଥର ମାୟାବୀ ଦଶଟି ଲୋକସଭା ଜିତିବାକୁ ସକ୍ଷମ ହୋଇଥିଲେ। ଏହା ପୂର୍ବଥର ବିଏସପି ଖାତା ଖୋଲି ପାରି  ନ ଥିଲା। ମାତ୍ର ବିଏସପି ୟୁପି ସମେତ, ଉତ୍ତରାଖଣ୍ଡ, ପଞ୍ଜାବ, ହରିୟାଣା, ମଧ୍ୟପ୍ରଦେଶ ଏବଂ ରାଜସ୍ଥାନରେ ମଧ୍ୟ ପ୍ରଭାବଶାଳୀ ରହୁଛି। ବିଏସପି ସିଧାସଳଖ ଭାବେ ୟୁପିରେ କୋଡିଏ ଆସନରେ ବିରୋଧି ଭୋଟ ବିଭାଜନ କରିବାର କ୍ଷମତା ରଖୁଛି। ସେହିପରି ଯାହାର ସିଧାସଳଖ ପ୍ରଭାବ ମେଣ୍ଟ ଉପରେ ପଡିବ। ମଧ୍ୟପ୍ରଦେଶ ଏବଂ ରାଜସ୍ଥାନରେ ପ୍ରାୟ ପାଞ୍ଚଟି ଆସନରେ ବିଏସପି ପ୍ରଭାବ ରହୁଛି। ତେଣୁ ୟୁପିରେ ବିନା ମାୟାବତୀରେ ମେଣ୍ଟ ଦୁଇ ଅଙ୍କ ଛୁଇଁବା ମଧ୍ୟ କଷ୍ଟସାଧ୍ୟ ହୋଇପାରେ। ତେଣୁ ମାୟାବତୀ ଏବଂ ଦେବଗୌଡାଙ୍କୁ ନେଇ ବିରୋଧି ଚିନ୍ତା କରିବାର ସମୟ ଆସିଛି ବୋଲି କେତେକ ରାଜନୈତିକ ସମୀକ୍ଷକ ମତ ରଖିଛନ୍ତି।