୪୧ଟି ଔଷଧର ମୂଲ୍ୟ ହ୍ରାସ କଲେ ସରକାର …

କେତେକ ରୋଗର ଚିକିତ୍ସାରେ ବ୍ୟବହୃତ ହେଉଥିବା  ଔଷଧର ମୂଲ୍ୟ ହ୍ରାସ କରିବା ନେଇ ଭାରତ ସରକାର ନିଷ୍ପତ୍ତି ନେଇଛନ୍ତି। ୪୧ ଟି ଔଷଧ ଏବଂ ୬ଟି ଫର୍ମୁଲେସନର ମୂଲ୍ୟକୁ କମ କରାଯିବା ନେଇ ସ୍ଥିର କରିଛି କେନ୍ଦ୍ର ସରକାର। ମଧୁମେହ, ହୃଦୟ ଓ ଯକୃତ ରୋଗର ଚିକିତ୍ସା ପାଇଁ ବ୍ୟବହୃତ ୬ଟି ଫର୍ମୁଲେସନର ମୂଲ୍ୟ ମଧ୍ୟ ହ୍ରାସ କରାଯାଇଛି। ଦର ହ୍ରାସ ନିଷ୍ପତ୍ତି ପରେ ଆଣ୍ଟାସିଡ୍, ମଲ୍ଟିଭିଟାମିନ୍ ଓ ଆଣ୍ଟିବାୟୋଟିକ୍ ଭଳି ଔଷଧ ଶସ୍ତା ହେବ।

ନ୍ୟାସନାଲ ଫାର୍ମାସ୍ୟୁଟିକାଲ୍ ପ୍ରାଇସିଂ ଅଥରିଟି ଅଫ୍ ଇଣ୍ଡିଆର ୧୪୩ ତମ ବୈଠକରେ ଏହି ନିଷ୍ପତ୍ତି ନିଆଯାଇଛି ଏବଂ ଏଥିପାଇଁ ଏକ  ବିଜ୍ଞପ୍ତି ଜାରି କରାଯାଇଛି। ଏନପିପିଏ ହେଉଛି ଏକ ସରକାରୀ ନିୟାମକ ଏଜେନ୍ସି ଯାହା ଭାରତରେ ଫାର୍ମାସ୍ୟୁଟିକାଲ୍  ଔଷଧର ମୂଲ୍ୟ ନିୟନ୍ତ୍ରଣ କରେ |

ବିଜ୍ଞପ୍ତି ଅନୁଯାୟୀ, ଶସ୍ତା ହେବାକୁ ଥିବା ଔଷଧ ମଧ୍ୟରେ ଆଣ୍ଟାସିଡ୍, ମଲ୍ଟିଭିଟାମିନ୍ ଏବଂ ଆଣ୍ଟିବାୟୋଟିକ୍ ରହିଛି। ବିଭିନ୍ନ ଔଷଧର ନିମ୍ନ ମୂଲ୍ୟ ସମ୍ପର୍କରେ ଡିଲର ଓ ଷ୍ଟକିଷ୍ଟମାନଙ୍କୁ ତୁରନ୍ତ ଅବଗତ କରିବାକୁ ଏନପିପିଏ ତାଙ୍କ ନିର୍ଦ୍ଦେଶରେ ଫାର୍ମା କଂପାନିଗୁଡ଼ିକୁ ନିର୍ଦ୍ଦେଶ ଦେଇଛି।

ଭାରତରେ ୧୦ କୋଟିରୁ ଅଧିକ ମଧୁମେହ ରୋଗୀ ଅଛନ୍ତି । ଦେଶରେ ଡାଇବେଟିସ୍ ଏକ ସାଧାରଣ ରୋଗ  ହୋଇଗଲାଣି । ଏହି ରୋଗର ଔଷଧ ଏବଂ ଇନସୁଲିନ୍ ଉପରେ ନିର୍ଭରଶୀଳ ଅନେକ ରୋଗୀଙ୍କୁ ନଜରରେ ରଖି ଏହି ନିଷ୍ପତି ନିଆଯାଇଛି ।