ଫେଭିକଲ ଭଳି ସୁଦୃଢ ନବୀନ-ନରେନ୍ଦ୍ରଙ୍କ ଅତୁଟ ବନ୍ଧନ, ସମାଲୋଚନା ଭୟରେ ନୀତି ଆୟୋଗ ବୈଠକକୁ ଯାଇ ନ ଥିବା ଚର୍ଚ୍ଚା
ଭୁବନେଶ୍ୱର : କର୍ନାଟକ ପରି ମଧ୍ୟ ପ୍ରଦେଶରେ ସରକାରୀ ବିରୋଧରେ ହାଓ୍ୱା ରହିଛି। ତେଲେଙ୍ଗାନାରେ ଦଳ ତିନି ନମ୍ବରରେ ରହିବ। ଛତିଶଗଡ଼ରେ ଦଳ ଜିତିବାର ସମ୍ଭାବନା ନାହିଁ। ରାଜସ୍ଥାନରେ କଂଗ୍ରେସ କଳି ଯୋଗୁ ବିଜେପି ଫାଇଦାରେ ରହିବ। ଯଦି ପାଇଲଟ ଗେହେଲଟ ଏକାଠି ହେବେ, ତେବେ ବିଜେପିକୁ ଅଧିକ ପରିଶ୍ରମ କରିବାକୁ ପଡିବ। ସାଧାରଣ ନିର୍ବାଚନ ପୂର୍ବରୁ ଏମିତି ଯଦି ହୁଏ, ତେବେ ବିଜେପି 80ରୁ 100 ଲୋକସଭା ହରାଇବାର ସମ୍ଭାବନା ରହିଛି। ତେଣୁ ଏନଡିଏ ସରକାର ହେଲେ ବି ମୋଦିଙ୍କ ପ୍ରଧାନମନ୍ତ୍ରୀତ୍ୱ ଚୌକି ଯୋଗୀ ଆଦିତ୍ୟନାଥ କିମ୍ବା ରାଜନାଥ ସିଂ ଛଡାଇ ନେଇ ପାରନ୍ତି ବୋଲି ଏକ ବେସରକାରୀ ସଂସ୍ଥା ଆକଳନ କରିଛି।
ତେଣୁ ବିଜେପି ବିରୋଧୀ ଏହି ବାତାବରଣକୁ ହ୍ରାସ କରିବା ପାଇଁ 5 ରାଜ୍ୟର ବିଧାନସଭା ସହ ସାଧାରଣ ନିର୍ବାଚନ କରିବା ପାଇଁ ବିଜେପି ଚିନ୍ତା କରୁ ବୋଲି କେତେକ ପ୍ରସ୍ତାବ ଦିଆଯାଇଛି। ଏହାକୁ ସିଧାସଳଖ ବିଜେପି ପକ୍ଷରୁ ନ କୁହାଯାଇ ଏନଡିଏରେ ଆନୁଷ୍ଠାନିକ ସଦସ୍ୟ ନ ଥିବା (ମାତ୍ର ସବୁ ଥିରେ ସହଯୋଗ କରୁଥିବା ବିଜେଡି) ଦ୍ୱାରା କୁହାଯାଉଛି। ନିକଟରେ ଦେବୀ ପ୍ରସାଦ ମିଶ୍ର ମଧ୍ୟ ଏନେଇ ମତ ରଖିସାରିଛନ୍ତି। ଏକ ସଙ୍ଗରେ ନିର୍ବାଚନ ହେବା ଦ୍ୱାରା ବିଧାନସଭା ନିର୍ବାଚନ ଗୌଣ ହୋଇଯିବ, ମୋଦି ନାଁରେ ଏନଡିଏ ସହଜରେ ସଂଖ୍ୟାଗରିଷ୍ଠତା ହାସଲ କରିପାରିବ। ତେଣୁ ନବୀନଙ୍କ ଦ୍ୱାରା ଏହି କଥା ବିଜେପି ପ୍ରଚାର କରୁଛି ବୋଲି ଦିଲ୍ଲୀରେ ଆଲୋଚନା ହେଉଛି। ନୀତିଶ କୁମାର ଓଡ଼ିଶା ଆସି ଯିବା ପରେ ନବୀନ ପଟ୍ଟନାୟକ ମୋଦିଙ୍କ ଦରବାରରେ ଯାଇ ହାଜିରା ପକାଇବା, ଓଡ଼ିଆ ସ୍ୱାଭିମାନକୁ ଜଳାଞ୍ଜଳି ଦେଇ ଦ୍ରୌପଦୀ ମୁର୍ମୁଙ୍କ ସଂସଦ ଭବନ ଉଦଘାଟନ ଘଟଣାରେ ବିଜେପି ସପକ୍ଷରେ ରହିବା ନବୀନ ପଟ୍ଟନାୟକ ଏବଂ ବିଜେଡିକୁ ନିନ୍ଦିତ କରିଛି।
ତେଣୁ ଜାତୀୟସ୍ତରରେ ଏହି ବାତାବରଣକୁ ନବୀନ ପଟ୍ଟନାୟକ ସହଜରେ ଗ୍ରହଣ କରିପାରୁ ନାହାନ୍ତି। ତେଣୁ ବିପକ୍ଷ ଏବଂ ପ୍ରିୟ ମୋଦିଙ୍କ ମଧ୍ୟରେ ବାଲାନ୍ସ କରିବାକୁ ବାଟ ଖୋଜୁଛନ୍ତି। ଏହି କ୍ରମରେ ନୀତି ଆୟୋଗ ବୈଠକରେ ଯୋଗ ଦେବାକୁ ଘୋଷଣା କରି ମଧ୍ୟ ଶନିବାର ଶ୍ରୀ ପଟ୍ଟନାୟକ ଅନୁପସ୍ଥିତ ରହିଛନ୍ତି। ରାଜନୈତିକ ସମୀକ୍ଷକ ଅଶୋକ ଓ୍ୱାଙ୍ଖଡେ ଏବଂ ସୁମିତ ଅବସ୍ତି କହିଛନ୍ତି ଯେ, ମୋଦି 2019 ପୂର୍ବରୁ ଯାହା କରିବାକୁ ଚାହୁଁଥିଲେ ତାହା କେସିଆର , ନବୀନ ଏବଂ ଜଗନଙ୍କ ଜରିଆରେ କରୁଥିଲେ। 2024 ପୂର୍ବରୁ ତାହା ନବୀନ ଏବଂ ଜଗନଙ୍କ ଜରିଆରେ କରୁଛନ୍ତି। ତେଣୁ ଚଳିତ ବର୍ଷ ଡିସେମ୍ବରରେ ସାଧାରଣ ନିର୍ବାଚନ ସହ ଓଡ଼ିଶାର ବିଧାନସଭା ନିର୍ବାଚନ ହେବା କଥାକୁ ଜନତା କିପରି ଗ୍ରହଣ କରୁଛନ୍ତି। ତାହା ଉଭୟ ବିଜେଡି ଓ ବିଜେପି ପରଖୁଛନ୍ତି। ତେଣୁ ବିଜେପି ଠାରୁ ଦୂରତା ଦେଖାଇବା ପାଇଁ ନବୀନ ଶେଷ ମୂହୁର୍ତ୍ତରେ ନୀତି ଆୟୋଗ ବୈଠକକୁ ଯାଇ ନ ଥିବା ଆଲୋଚନା ହେଉଛି।
