ଜ୍ୟୋତି ବସୁଙ୍କୁ ପଛରେ ପକାଇ ଚାମଲିଂଙ୍କ ରେକର୍ଡ ଭାଙ୍ଗିବାକୁ ଅଗ୍ରସର ହେଲେ ନବୀନ

ଭୁବନେଶ୍ୱର : ଦିନ ଥିଲା ରାଜନୀତିର ‘ର’ ବୁଝୁ ନ ଥିଲେ। ହେଲେ ଆଜି ରାଜ୍ୟ ରାଜନୀତିର ବର୍ଣ୍ଣମାଳା ତାଙ୍କ ଆଗରେ ଫିକା ପଡ଼ିଯାଉଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲମ୍ବା କ୍ଷମତା ରାଜନୈତିକ କ୍ୟାରିଅରରେ ଆଉ ଏକ ଫର୍ଦ୍ଦ ଯୋଡି ହୋଇଯାଇଛି। ପଡୋଶୀ ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ଜ୍ୟୋତି ବସୁଙ୍କ ରେକର୍ଡ ଭାଙ୍ଗିଛନ୍ତି ନବୀନ ପଟ୍ଟନାୟକ। ଆଜି ଯାଏଁ ଜ୍ୟୋତି ବସୁ ଦେଶର ଦ୍ୱିତୀୟ ସର୍ବାଧିକ  ଅବଧିର ମୁଖ୍ୟମନ୍ତ୍ରୀ ବୋଲାଉ ଥିଲେ। ହେଲେ ସ୍ୱର୍ଗତ ବସୁଙ୍କୁ ପଛରେ ପକାଇ ନବୀନ ଦେଶର ଦ୍ୱିତୀୟ ସର୍ବାଧିକ ଅବଧିର ମୁଖ୍ୟମନ୍ତ୍ରୀ ହୋଇଯାଇଛନ୍ତି। ନବୀନ ପଟ୍ଟନାୟକ ଏଯାଏଁ ୨୩ ବର୍ଷ ୧୩୮ ଦିନ ଶାସନରେ ରହି ସାରିଲେଣି। ନବୀନଙ୍କ ଠାରୁ କେବଳ ସିକିମ୍ ର ପୂର୍ବତନ ମୁଖ୍ୟମନ୍ତ୍ରୀ ପଓ୍ୱନ ଚାମଲିଂ ଆଗରେ ରହିଛନ୍ତି। ଆସନ୍ତା ବିଧାନସଭା ନିର୍ବାଚନରେ ବିଜୟୀ ହୋଇ କିଛି ଦିନ ଶାସନ କରିବା ପରେ ନବୀନ ଏହି ରେକର୍ଡକୁ ମଧ୍ୟ ପଛରେ ପକାଇ ପାରିବେ।

ଉଲ୍ଲେଖଯୋଗ୍ୟ, ୨୦୦୦ ମସିହା ମାର୍ଚ୍ଚ ୫ ତାରିଖରେ ପ୍ରଥମ ଥର ପାଇଁ ଓଡ଼ିଶାର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ।  ଉତ୍ତର-ପୂର୍ବ ରାଜ୍ୟ ସିକିମର ପୂର୍ବତନ ମୁଖ୍ୟମନ୍ତ୍ରୀ ପୱନ କୁମାର ଚାମଲିଙ୍ଗ ବର୍ତ୍ତମାନ ଦୀର୍ଘ  ଅବଧି ଶାସନ କରିଥିବା ଏକ ନମ୍ବର ମୁଖ୍ୟମନ୍ତ୍ରୀ । ସେ ୧୯୯୪ ଡିସେମ୍ବର ୧୨ ରୁ ୨୦୧୯ ମେ ୨୭ ତାରିଖ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ଥିଲେ।