ବିଜେଡ଼ିକୁ “ବିଦ୍ରୋହ“ ଅଡୁଆ , କାମ୍ପ ଭୋଟରଙ୍କୁ ନେଇ ସବୁ ଶିବିରରେ କମ୍ପନ, ତୃତୀୟ ବିଜୟ ଲକ୍ଷ୍ୟରେ ନାରାୟଣ… ଜମିଲାଣି ପାରଳାଖେମୁଣ୍ଡି ରାଜନୀତି
ପାରଳାଖେମୁଣ୍ଡି: ସାରା ରାଜ୍ୟରେ ବିଜେଡିର ଉତ୍ତମ ସଙ୍ଗଠନ। ହେଲେ ଗଜପତି ଜିଲ୍ଲା କଥା ପଡ଼ିଲେ ଏହି ଉତ୍ତମ ଶବ୍ଦଟି ଉଭାନ ହୋଇଯାଏ। ବିଶେଷ କରି ଏହି ଜିଲ୍ଲାର ପାରଳାଖେମୁଣ୍ଡି ବିଧାନସଭା ନିର୍ବାଚନ ମଣ୍ଡଳୀରେ ବିଜେଡ଼ିର କନ୍ଦଳ ଦିନକୁ ଦିନ ତୀବ୍ର ହେବାରେ ଲାଗିଛି । ଏହା ବୋଧହୁଏ, ରାଜ୍ୟର ଗୋଟିଏ ନିର୍ବାଚନମଣ୍ଡଳୀ ଯେଉଁଠି ବିଜେଡି ଅପେକ୍ଷା ବିଜେପି ଓ କଂଗ୍ରେସ ଅଧିକ ଶକ୍ତିଶାଳୀ ମନେ ହୁଏ। ନିର୍ବାଚନ ଯେତିକି ପାଖେଇ ଆସୁଛି, ଦଳ ଭିତରେ ଟିକେଟ୍ ଆଶାୟୀଙ୍କ ସଂଖ୍ୟା ସେତିକି ବଢ଼ୁଛି । ଯିଏ ପାରିଲା, ସିଏ ନିଜକୁ ବିଧାୟକ ପ୍ରାର୍ଥୀ ବୋଲି ପ୍ରଚାର କରୁଛନ୍ତି । ପାରଖେମୁଣ୍ଡି ରଥଦାଣ୍ଡରେ ସମସ୍ତେ ମନେ ମନେ ଏମଏଲଏ-ଏମଏମଏମ କହି ଗୁଲି ଗପ ଆରମ୍ଭ ହୋଇଯାଇଛି। କିଏ ନିଜ ଜାତି ଓ ବର୍ଗକୁ ଆଗକୁ ଆଣୁଛି ତ ଆଉ କିଏ ଧର୍ମକୁ । ପାରଳାଖେମୁଣ୍ଡିର ବିଜେଡି ଝଗଡ଼ା ନିୟମିତ ଭୁବନେଶ୍ୱର ନବୀନ ନିବାସ ଏବଂ ଶଙ୍ଖ ଭବନ ଯାଏଁ ପହଞ୍ଚୁଛି ।
ଗତ ସୋମବାର ପାରଳାଖେମୁଣ୍ଡିର ଅନେକ ବିଜେଡ଼ି ନେତା ଶଙ୍ଖ ଭବନରେ ଦଳର ସାଧାରଣ ସଂପାଦକ (ସଂଗଠନ) ପ୍ରଣବ ପ୍ରକାଶ ଦାସଙ୍କୁ ସାକ୍ଷାତ କରିଥିଲେ । ଏମାନଙ୍କ ମଧ୍ୟରେ ଥିଲେ ପାରଳାଖେମୁଣ୍ଡି ରାଜ ପରିବାରର ସଦସ୍ୟା ତଥା ଗତ ଥରର ବିଧାୟକ ପ୍ରାର୍ଥିନୀ କଲ୍ୟାଣୀ ଗଜପତି, ରାଜ୍ୟ ସାଧାରଣ ସଂପାଦକ ପ୍ରଦୀପ ନାୟକ, ଜିଲା ଯୁବ ବିଜେଡ଼ି ସଭାପତି ଏଲ୍. ଲିଙ୍ଗରାଜ, ଆର୍. ଜ୍ୟୋତି, ବିମଳ ଦଳେଇଙ୍କ ସମେତ ଅନ୍ୟ କେତେକ ନେତା । ସାକ୍ଷାତ ସମୟରେ ଗଜପତି ଜିଲା, ବିଶେଷକରି ପାରଳାଖେମୁଣ୍ଡି ସଂପର୍କରେ ଆଲୋଚନା ହୋଇଥିଲା । ଏମାନେ ତିରୁପତି ପାଣିଗ୍ରାହୀଙ୍କ ବିରୋଧରେ ଫେରାଦ୍ ହୋଇଥିବା ବିଶ୍ୱସ୍ତ ସୂତ୍ରରୁ ସୂଚନା ମିଳିଛି। ବିଶିଷ୍ଟ ଶିଳ୍ପପତି ଶ୍ରୀ ପାଣିଗ୍ରାହୀ ନିଜେ କିମ୍ବା ପୁଅଙ୍କୁ ବିଜେଡ଼ି ଟିକେଟରୁ ଠିଆ କରିବାକୁ ଉଦ୍ୟମ ଆରମ୍ଭ କରିସାରିଛନ୍ତି। ହେଲେ ବର୍ତ୍ତମାନ ସୁଦ୍ଧା ଶ୍ରୀ ପାଣିଗ୍ରାହୀ ବିଜେଡ଼ିର ପ୍ରାଥମିକ ସଦସ୍ୟ ପଦ ମଧ୍ୟ ଗ୍ରହଣ କରିନାହାନ୍ତି । କଂଗ୍ରେସରେ କିଛି ବର୍ଷ ସକ୍ରିୟ ରହିବା ପରେ ୨୦୧୯ ମସିହାରେ ଟିକେଟ ଆଶାରେ ଥିଲେ । ହେଲେ କଂଗ୍ରେସ ଟିକେଟ୍ ନଦେବାରୁ ସ୍ୱାଧୀନ ପ୍ରାର୍ଥୀ ହୋଇଥିଲେ । ନିର୍ବାଚନ ପରେ ଧିରେ ଧିରେ ବିଜେଡ଼ି କାର୍ଯ୍ୟକ୍ରମରେ ସାମିଲ ହୋଇ ନିଜକୁ ବର୍ତ୍ତମାନ ବିଧାୟକ ପ୍ରାର୍ଥୀ ଭାବେ ପ୍ରଚାର କରୁଥିବା ଯୋଗୁ ଦଳ ଭିତରେ ବିଶୃଙ୍ଖଳା ବଢ଼ୁଛି ବୋଲି ଦଳୀୟ ନେତାମାନେ ବବିଙ୍କ ମାର୍ଫତରେ ସୁପ୍ରିମୋଙ୍କୁ ଅବଗତ କରାଇଥିବା ସୂଚନା ମିଳିଛି । ଏପରିକି ପାରଳାଖେମୁଣ୍ଡି ନିର୍ବାଚନ ମଣ୍ଡଳୀରେ ୩୦ପ୍ରତିଶତ ତେଲୁଗୁ (କାମ୍ପ) ଭୋଟର ରହିଥିବା ଯୋଗୁ ଜଣେ କାମ୍ପ ଜାତିର ନେତାଙ୍କୁ ପ୍ରାର୍ଥୀ କରିବାକୁ ନିବେଦନ କରାଯାଇଥିବା ଶୁଣିବାକୁ ମିଳୁଛି । ତେବେ ସାକ୍ଷାତ ସମୟରେ କଲ୍ୟାଣୀ ଗଜପତି ନିଜେ ଉପସ୍ଥିତ ଥିଲେ ମଧ୍ୟ, ସେ ନିରବ ରହିଥିଲେ । ସେହିଭଳି ରାଜ୍ୟ ସାଧାରଣ ସଂପାଦକ ପ୍ରଦୀପ ନାୟକ ମଧ୍ୟ ଟିକେଟ ଆଶାୟୀ ଥିବା ବେଳେ, ଯଦି ଜଣେ କାମ୍ପଙ୍କୁ ପ୍ରାର୍ଥୀ କରାଯାଏ, ତେବେ ତାଙ୍କ ଆଭିମୁଖ୍ୟ କ’ଣ ରହିବ, ତାହାକୁ ନେଇ ରାଜନୈତିକ ସମୀକ୍ଷକଙ୍କ ମଧ୍ୟରେ ଆଗ୍ରହ ଦେଖିବାକୁ ମିଳୁଛି । ଆସନ୍ତା ୨୧ ତାରିଖରେ ପର୍ଯ୍ୟବେକ୍ଷକ ଏବଂ ୨୩ ଓ ୨୪ ତାରିଖରେ ଦୁଇ ଦିନ ପାଇଁ ପ୍ରଣବ ପ୍ରକାଶ ଦାସ ପାରଳାଖେମୁଣ୍ଡି ଗସ୍ତ କାର୍ଯ୍ୟକ୍ରମ ରହିଛି । ଦଳ ଭିତରେ କୁହୁଳୁଥିବା ଅସନ୍ତୋଷ ଏବଂ ଗୋଷ୍ଠୀ କନ୍ଦଳକୁ ଏହି ଦୁଇ ନେତାଙ୍କ ଗସ୍ତ କେତେଦୂର ପ୍ରଶମିତ କରିପାରିୁଛି, ସେନେଇ ସ୍ଥାନୀୟ ବିଜେଡ଼ି ନେତାଙ୍କ ମଧ୍ୟରେ ଉତ୍କଣ୍ଠା ଲାଗି ରହିଛି ।
ସାରା ରାଜ୍ୟରେ ବିଜେଡ଼ିର ପ୍ରଭାବ ବଢ଼ିଥିବା ବେଳେ ପାରଳାଖେମୁଣ୍ଡିରେ କିନ୍ତୁ ଦଳ ଦୁର୍ବଳ ହେବାରେ ଲାଗିଛି । ବିଜେଡ଼ି ଗଠନ ହେବା ପରଠୁ ଅର୍ଥାତ୍ ୨୦୦୦ ମସିହାରୁ ୫ଥର ନିର୍ବାଚନ ଅନୁଷ୍ଠିତ ହୋଇଥିବା ବେଳେ ଦଳ କେବଳ 2009 ମସିହାରେ ହିଁ ବିଜୟୀ ହୋଇଥିଲା । ମାତ୍ର ଏହାର ପର ନିର୍ବାତନରେ ସେ ପରାଜିତ ହୋଇଥିଲେ। ଦଳକୁ ବିଜୟର ପ୍ରଥମ ସ୍ୱାଦ ଦେଇଥିବା କେ.ନାରାୟଣ ରାଓଙ୍କୁ ୨୦୧୯ରେ ବିଜେଟି ଟିକେଟ ମିଳିଲା ନାହିଁ । ସେ ବିଜେପିରୁ ନିର୍ବାଚନ ଲଢ଼ି ବିଜୟୀ ହୋଇଥିଲେ । ଏଣୁ ବର୍ତ୍ତମାନ ଦଳ ଭିତରେ ଯେଭଳି ଗୋଷ୍ଠୀ କନ୍ଦଳ ଲାଗିଛି ଏବଂ ଟିକେଟ ଆଶାୟୀଙ୍କ ମଧ୍ୟରେ ଟଣାଓଟରା ଚାଲିଛି, ୨୦୨୪ ନିର୍ବାଚନ ବିଜେଡ଼ି ପାଇଁ ସହଜ ହେବ ନାହିଁ ବୋଲି ଆଲୋଚନା ହେଉଛି । କାରଣ କଂଗ୍ରେସରୁ ପୂର୍ବତନ ମୁଖ୍ୟ ଶାସନ ସଚିବ ତଥା ସ୍ଥାନୀୟ ବାସିନ୍ଦା ବିଜୟ ପଟ୍ଟନାୟକ ପ୍ରାର୍ଥୀ ହେବାର ପ୍ରବଳ ସମ୍ଭାବନା ରହିଛି। ସେହିପରି ବିଜେପିରୁ ପୁଣି ଥରେ ପ୍ରାର୍ଥୀ ହୋଇପାରନ୍ତି ବର୍ତ୍ତମାନର ବିଜେପି ବିଧାୟକ କେ. ନାରାୟଣ ରାଓ । ଏଣୁ ବିଜୟ ଏବଂ ନାରାୟଣଙ୍କ ମୁକାବିଲା ପାଇଁ ବିଜେଡ଼ି କାହାକୁ ନିର୍ବାଚନୀ ମଇଦାନକୁ ଛାଡ଼ିବ, ସେନେଇ ଏବେଠୁ କଳ୍ପନାଜଳ୍ପନା ଲାଗି ରହିଛି ।
