କଟକରେ କଂଗ୍ରେସ ନେତା ଉଭାନ
ଭୁବନେଶ୍ୱର,୧୫/୪(ବ୍ୟୁରୋ ): ୨୦୨୪ ସାଧାରଣ ନିର୍ବାଚନ ପାଖେଇ ଆସିଲାଣି l ଦିନ ଥିଲା କଟକ ଜିଲ୍ଲା କଂଗ୍ରେସର ଗଡ଼ ରହିଥିଲା l ହେଲେ ବର୍ତ୍ତମାନ କଂଗ୍ରେସର ସକ୍ରିୟତା ଜଣା ପଡୁନାହିଁ l ବିଜେପି ଓ ବିଜେଡ଼ି ଉପସ୍ଥିତି ବାରିହୋଇ ପଡୁଛି l ହେଲେ କଂଗ୍ରେସ ନେତାଙ୍କ ଚଳଚଞ୍ଚଳତା ହ୍ରାସ ପାଇଛି l
କଟକ ଜିଲ୍ଲାରେ ମୋଟ ୯ଟି ବିଧାନସଭା ନିର୍ବାଚନ ମଣ୍ଡଳୀ ଅଞ୍ଚଳ ମଧ୍ୟରୁ ୩/୪ଟି ଅଞ୍ଚଳକୁ ବାଦ ଦେଲେ ଅନ୍ୟ ଅଞ୍ଚଳରେ ୨୦୧୯ ନିର୍ବାଚନରେ ଦଳର ଟିକେଟରେ ନିର୍ବାଚନ ଲଢିଥିବା ପ୍ରାର୍ଥୀଙ୍କର ଆଉ ଦେଖା ମିଳୁନି। ୨୦୧୯ ନିର୍ବାଚନରେ କଟକର ୯ଟି ବିଧାନସଭା ଆସନ ଓ ଗୋଟିଏ ସଂସଦୀୟ କ୍ଷେତ୍ରରେ ଯେଉଁମାନେ କଂଗ୍ରେସରୁ ପ୍ରାର୍ଥୀ ହୋଇଥିଲେ ସେମାନଙ୍କ ଭିତରୁ ୫ଟି ଆସନରେ କଂଗ୍ରେସ ପ୍ରାର୍ଥୀଙ୍କୁ ନିର୍ବାଚନ ପରଠାରୁ ଲୋକ ଦେଖିବାକୁ ପାଉ ନ ଥିବା ତୃଣମୂଳ କର୍ମୀ ଅଭିଯୋଗ କରିଛନ୍ତି ।
କଟକ ଜିଲ୍ଲାରେ ୨୦୧୯ ନିର୍ବାଚନରେ ଜିଲ୍ଲାର ସଦର ମହକୁମା ବାରବାଟୀ-କଟକ ଆସନ କଂଗ୍ରେସ ହାତକୁ ଯାଇଥିଲା। କଂଗ୍ରେସ ସାରା ରାଜ୍ୟରେ ଅତ୍ୟନ୍ତ ଦୁର୍ବଳ ପ୍ରଦର୍ଶନ କରିଥିବା ବେଳେ ଉପକୂଳ ଜିଲ୍ଲାର ଗୁରୁତ୍ବପୂର୍ଣ୍ଣ ଆସନ ବାରବାଟୀ-କଟକରୁ ଇଂଜିନିୟର ମହମ୍ମଦ ମୋକିମ କଂଗ୍ରେସ ପ୍ରାର୍ଥୀ ଭାବେ ବିଜୟୀ ହୋଇଥିଲେ। ଦୀର୍ଘ ବର୍ଷ ପରେ କଟକ ସହର ଆସନ କଂଗ୍ରେସ ଖାତାକୁ ଯାଇଥିଲା। କିନ୍ତୁ ଏବେ ଶ୍ରୀ ମୋକିମ କଂଗ୍ରେସରେ ବାଗୀ ଭୂମିକାରେ ଅବତୀର୍ଣ୍ଣ l ପିସିସି ନେତୃବୃନ୍ଦଙ୍କ ଦ୍ବାରା ଅଲୋଡ଼ା ହେବା ପରେ ସିଏ ଅଥବା ତାଙ୍କ ସମର୍ଥକ ଆଉ କଂଗ୍ରେସ ବ୍ୟାନରରେ କୌଣସି କାର୍ଯ୍ୟକ୍ରମ କରୁଥିବା ଦେଖା ଯାଉ ନାହିଁ l ନଗର କଂଗ୍ରେସ ସଭାପତି ସୁରେଶ ମହାପାତ୍ର ଓ ଜିଲ୍ଲା କଂଗ୍ରେସ ସଭାପତି ମାନସ ଚୌଧୁରୀ ବିଭିନ୍ନ କାର୍ଯ୍ୟକ୍ରମରେ ସୀମିତ ଅଛନ୍ତି l ବାଙ୍କୀରେ ପୂର୍ବତନ ବିଧାୟକ ଦେବାଶିଷ ପଟ୍ଟନାୟକ ନିଜ ସଂଗଠନ ସମ୍ଭାଳି ରଖିଛନ୍ତି l ହେଲେ ମଝିରେ ମଝିରେ ବିଜେପି ଯିବା କଥା ଭାବୁଛନ୍ତି l ସେହିପରି ମାହାଙ୍ଗାରେ ଦେବେନ୍ଦ୍ର ସାହୁ କଂଗ୍ରେସ କାର୍ଯ୍ୟକ୍ରମ ଜାରି ରଖିଛନ୍ତି। ସାଲେପୁରରେ ଇଂଜିନିୟର ଆକ୍ୟୁବ ଖାଁ କଂଗ୍ରେସ କାର୍ଯ୍ୟକ୍ରମ ଜାରି ରଖିଛନ୍ତି। ତେଣୁ ୨୦୨୪ରେ କେବଳ ବାଙ୍କୀ ଓ ମାହାଙ୍ଗାରେ ୨୦୧୯ର କଂଗ୍ରେସ ପ୍ରାର୍ଥୀ ପ୍ରତିଦ୍ବନ୍ଦ୍ବିତା କରିବା ଆଶା ରହିଛି। ନଚେତ ଅନ୍ୟ ସବୁ ଆସନରେ କଂଗ୍ରେସ ନୂଆ ମୁହଁ ଖୋଜି ପ୍ରାର୍ଥୀ ଦେବାକୁ ଏକରକମ ବାଧ୍ୟ ହେବ ବୋଲି ସମୀକ୍ଷକ ମାନେ ମତ ରଖିଛନ୍ତି l୨୦୧୪ ନିର୍ବାଚନରେ କଂଗ୍ରେସ ସାଲେପୁର ଆସନ ଜିତିଥିଲା। କିନ୍ତୁ କଂଗ୍ରେସ ଟିକେଟରେ ବିଧାୟକ ହୋଇଥିବା ପ୍ରକାଶ ବେହେରା ଦଳ ପରିବର୍ତ୍ତନ କରି ୨୦୧୯ରେ ସେଠି ବିଜେପିରୁ ନିର୍ବାଚନ ଲଢିଥିଲେ। ୨୦୧୯ରେ କଟକ ସଦର ଆସନରେ କଂଗ୍ରେସ ପ୍ରାର୍ଥୀ ଭାବେ ନିର୍ବାଚନ ଲଢିଥିବା ଅଭିଷେକ୍ ମହାନନ୍ଦ, ଚୌଦ୍ବାର-କଟକର ପ୍ରାର୍ଥୀ ଜଗଦୀଶ ମହାନ୍ତି, ବଡମ୍ବାର ପ୍ରାର୍ଥୀ ବବି ମହାନ୍ତି, ସାଲେପୁରର ପ୍ରାର୍ଥୀ ରବୀନ୍ଦ୍ର କର, ନିଆଳିର ପ୍ରାର୍ଥୀ ମମତା ଭୋଇଙ୍କୁ ନିର୍ବାଚନ ପରଠାରୁ ଆଉ କେହି ଦେଖିବାକୁ ପାଉନାହାନ୍ତି। ଏପଟେ ଆଠଗଡ଼ରୁ କଂଗ୍ରେସ ପ୍ରାର୍ଥୀ ହୋଇଥିବା ପୂର୍ବତନ ବିଧାୟକ ଉମାବଲ୍ଲଭ ରଥ ବି ଏବେ ପୁରୀ ମୁହାଁ ହୋଇଥିବା ଲକ୍ଷ୍ୟ କରାଯାଇଛି l ବିଭୂତି ଭୂଷଣ ମିଶ୍ର ଏବେ ଅଞ୍ଚଳରେ ସଂଗଠନ ସଜାଡିବାକୁ ଚେଷ୍ଟା କରୁଛନ୍ତି। ୨୦୧୯ରେ କଟକ ଲୋକସଭା ଆସନରୁ କଂଗ୍ରେସ ପ୍ରାର୍ଥୀ ହୋଇଥିବା ପୂର୍ବତନ ମନ୍ତ୍ରୀ ପଂଚାନନ କାନୁନଗୋ ବି ଆଉ ସେତେଟା ସକ୍ରିୟ ନାହାନ୍ତି। ତେଣୁ ଏଭଳି ସ୍ଥିତିରେ କଟକ ଜିଲ୍ଲାରେ କଂଗ୍ରେସର କର୍ମୀମାନେ ନିଜ ଅଞ୍ଚଳର ନେତା ଓ ସମ୍ଭାବ୍ୟ ପ୍ରାର୍ଥୀଙ୍କୁ ନେଇ ଏକପ୍ରକାର ଦ୍ବନ୍ଦ୍ବରେ ରହୁଥିବା ଆଲୋଚନା ହେଉଛି l
