ପ୍ରଥମ ପର୍ଯ୍ୟାୟ ମତଦାନରେ ବାଜିରେ ଲାଗିଛି ଏହି ଟାଣୁଆ ନେତାଙ୍କ ଭାଗ୍ୟ..

ଭୁବନେଶ୍ଵର; ଦେଶରେ ଚତୁର୍ଥ ପର୍ଯ୍ୟାୟ ଭୋଟ ଚାଲିଥିବା ବେଳେ ଆଜି ଓଡ଼ିଶାରେ ଚାଲିଛି ପ୍ରଥମ ପର୍ଯ୍ୟାୟ ଭୋଟ । ଏହି ପ୍ରଥମ ପର୍ଯ୍ୟାୟରେ ଓଡ଼ିଶାର ୪ଟି ଲୋକସଭା କ୍ଷେତ୍ର କଳାହାଣ୍ତି, ନବରଙ୍ଗପୁର, କୋରାପୁଟ ଓ ବ୍ରହ୍ମପୁରର ୨୮ଟି ବିଧାନସଭା ପାଇଁ ଚାଲିଛି ମତଦାନ । ଏହି ୪ଟି ଲୋକସଭା ନିର୍ବାଚନମଣ୍ଡଳୀରେ ୬୨ ଲକ୍ଷ ୮୭ ହଜାର ୨୨୨ ଭୋଟର ମତଦାନ କରିବେ । ଏମାନଙ୍କ ମଧ୍ୟରେ ୩୦ ଲକ୍ଷ ୯୭ ହଜାର ୫୨୭ ପୁରୁଷ ଏବଂ ୩୧ ଲକ୍ଷ ୮୯ ହଜାର ୬୦ ମହିଳା ଏବଂ ୬୩୫ ଜଣ ତୃତୀୟ ଲିଙ୍ଗୀ ଭୋଟର ରହିଛନ୍ତି । ଏହି ପର୍ଯ୍ୟାୟରେ ପୁରୁଷଙ୍କ ଅପେକ୍ଷା ମହିଳା ଭୋଟରଙ୍କ ସଂଖ୍ୟା ଅଧିକ ରହିଛି । ସେହିପରି ୧ ଲକ୍ଷ ୭୫ ହଜାର ଯୁବ ଭୋଟର ରହିଛନ୍ତି । ତେବେ ଏହି ୪ଟି ଲୋକସଭା ନିର୍ବାଚନମଣ୍ଡଳୀରେ ମତଦାନ ଜାରି ରହିଥିବା ସମୟରେ ବାଜିରେ ଲାଗିଛି ଟାଣୁଆ ନେତାଙ୍କ ଭାଗ୍ୟ । ବ୍ରହ୍ମପୁରରୁ ପୁରୁଖା ନେତା ପ୍ରଦୀପ ପାଣିଗ୍ରାହୀ ବିଜେପିରୁ ସାଂସଦ ପ୍ରାର୍ଥୀ ହୋଇଥିବା ବେଳେ ତାଙ୍କ ବିପକ୍ଷରେ ଅଛନ୍ତି ବିଜେପିରୁ ବିଜେଡିକୁ ଆସିଥିବା ଭୃଗୁ ବକ୍ସିପାତ୍ର । ସେପଟେ ଦିଗପହଣ୍ଡିରୁ ବାଜିରେ ଲାଗିଛି ବିଜେପି ପ୍ରାର୍ଥୀ ତଥା ସିନେଷ୍ଟାର ସଦ୍ଧାନ୍ତ ମହାପାତ୍ରଙ୍କ ଭାଗ୍ୟ । ସେହିପରି କୋରାପୁଟରୁ ଆଉ ଥରେ କଂଗ୍ରସରୁ ସପ୍ତଗିରି ଉଲାକା ପ୍ରାର୍ଥୀ ହୋଇଥିବା ବେଳେ ବିଜେଡ଼ି ମଧ୍ୟ କୌଶଲ୍ୟା ହିକକାଙ୍କ ଉପରେ ଭରଷା ଦେଖାଇଛି । ଗତଥର ଏହି ଦୁଇଙ୍କ ମଧ୍ୟରେ କଡା ଟକ୍କର ଦେଖିବାକୁ ମିଳିଥିବା ବେଳେ ଏଥର ଏକ୍ସ ଫ୍ୟାକ୍ଟର ହୋଇପାରନ୍ତି ବିଜେପି ପ୍ରାର୍ଥୀ କାଳୀରାମ ମାଝୀ । ସେହିପରି କୋରାପୁଟ ସଂସଦୀୟ କ୍ଷେତ୍ରର ସବୁଠୁ ଚର୍ଚ୍ଚିତ ଆସନ ଜୟପୁରରୁ ପୁଣି କଂଗ୍ରସର ମଙ୍ଗ ଧରିଛନ୍ତି ତାରା । ତାରାଙ୍କୁ ଟକ୍କର ଦେଉଛନ୍ତି ବିଜେଡ଼ିର ଇନ୍ଦିରା ନନ୍ଦ ଓ ବିଜେପିରୁ ଗୌତମ ସାମନ୍ତରାୟ । ସେହିପରି ବିଷମକଟକରୁ ଭାଗ୍ୟ ପରୀକ୍ଷା କରୁଛନ୍ତି ଆଇନ ମନ୍ତ୍ରୀ ଜଗନ୍ନାଥ ସାରକା ।
କଳାହାଣ୍ଡି ଲୋକସଭା ନିର୍ବାଚନମଣ୍ଡଳୀରେ ମଧ୍ୟ ଟାଣୁଆ ନେତା କରୁଛନ୍ତି ଭାଗ୍ୟ ପରୀକ୍ଷା  । ନୂଆପଡ଼ାରେ ପିସିସି ସଭାପତି ଶରତ ପଟ୍ଟନାୟକଙ୍କ ବିପକ୍ଷରେ ମନ୍ତ୍ରୀ ତଥା ୩ ଥରର ବିଧାୟକ ରାଜେନ୍ଦ୍ର ଢୋଲକିଆ। ଭବାନୀପାଟଣାରେ ବିଜେପି ପ୍ରାର୍ଥୀ ହୋଇଛନ୍ତି ୪ ଥରର ବିଧାୟକ ପ୍ରଦୀପ୍ତ କୁମାର ନାୟକ।