ଓକିଲଙ୍କ ବଦଳରେ ଓକିଲ: ପୁରୀ ଲୋକସଭାରୁ ପ୍ରାର୍ଥୀ ହୋଇପାରନ୍ତି ଏଜି ଅଶୋକ ପରିଜା !

ଭୁବନେଶ୍ୱର : ପୁରୀ ଲୋକସଭାରୁ ବିଜେଡି ପ୍ରାର୍ଥୀ ହୋଇ ପାରନ୍ତି ବର୍ତ୍ତମାନର ଆଡଭୋକେଟ୍ ଜେନେରାଲ ଅଶୋକ ପରିଜା। ପିନାକୀ ମିଶ୍ରଙ୍କ ପରିବର୍ତ୍ତେ ଅଶୋକ ପରିଜାଙ୍କ ପ୍ରାର୍ଥୀତ୍ୱ ନେଇ ଚର୍ଚ୍ଚା ପାଓ୍ୱାର କରିଡ଼ରରେ ଜୋର ଧରିଛି।  ଶାସକ ଦଳରେ ପରିଚିତ ସହ ଓକିଲମାନଙ୍କ ମଧ୍ୟରେ ଶ୍ରୀ ପରିଜାଙ୍କ ଲୋକପ୍ରିୟତା ରହିଛି। ସାଧାରଣ ଲୋକଙ୍କ ସହ ଏତେଟା ସମ୍ପର୍କ ନ ଥିଲେ ବି ଆର୍ଥିକ ଭାବେ ସ୍ୱଚ୍ଛଳ ଥିବାରୁ ତାଙ୍କୁ ପ୍ରାର୍ଥୀ କରାଯିବାର ଯଥେଷ୍ଟ ସମ୍ଭାବନା ରହିଛି। ପୁରୀ ଲୋକସଭା ଅଧିନରେ ଆସୁଥିବା ସାତ ବିଧାନସଭା ନିର୍ବାଚନମଣ୍ଡଳୀ ବହୁ ବିଜେଡି ନେତା ତାଙ୍କ ପାଇଁ ଲବି କରିପାରନ୍ତି ବୋଲି ଜଣାପଡିଛି। ଅଶୋକ ପରିଜାଙ୍କ ପାଇଁ କେବଳ ବିଜେଡି ନୁହେଁ, କଂଗ୍ରେସର ସବୁଠୁ ପ୍ରଭାବଶାଳୀ ପରିବାର ସେ ବନ୍ଧୁ। ତେଣୁ ତାଙ୍କ ପାଇଁ ନିରଞ୍ଜନ ପଟ୍ଟନାୟକଙ୍କ କ୍ୟାମ୍ପ ମଧ୍ୟ ସୁପାରିଶ୍ କରିବ। ସମ୍ବାଦର ପୂର୍ବତନ ସମ୍ପାଦକ ତଥା ବ୍ୟବସାୟୀ ସୌମ୍ୟ ରଞ୍ଜନ ପଟ୍ଟନାୟକ ଏବଂ ଶାସକ ଦଳର ଏକ ଗୋଷ୍ଠୀ ମଧ୍ୟରେ ନିକଟରେ ଦେଖା ଦେଇଥିବା ବିବାଦର ସମାଧାନରେ ଶ୍ରୀ ପରିଜା ଅଗ୍ରଣୀ ଭୂମିକା ଗ୍ରହଣ କରିଥିଲେ। ପୁରୀ ଲୋକସଭାରେ ବିଜେପି ପକ୍ଷରୁ ସମ୍ବିତ ପାତ୍ର ପ୍ରାର୍ଥୀ ହେବାର ଏକ ପ୍ରକାର ନିଶ୍ଚିତ।ସେହିପରି କଂଗ୍ରେସ ନେତୃତ୍ୱାଧିନ ଇଣ୍ଡିଆ ମେଣ୍ଟରୁ ପ୍ରାର୍ଥୀ ହେବା ଦୌଡ଼ରେ ଏକାଧିକ ନେତାଙ୍କ ନାଁ ରହିଛି। ଏମାନଙ୍କ ମଧ୍ୟରେ ରହିଛନ୍ତି-ବ୍ରଜ କିଶୋର ତ୍ରିପାଠୀ(ସମତାକ୍ରାନ୍ତି), ପ୍ରସାଦ ହରିଚନ୍ଦନ,ଅମୀୟ ପଟ୍ଟନାୟକ, ସୁଚରିତା ମହାନ୍ତି, ଦେବେନ୍ଦ୍ରନାଥ ମାନସିଂ(କଂଗ୍ରେସ) ରହିଛନ୍ତି। ଯଦି ବାମଦଳ କଥା ବିଚାର କରାଯାଏ। ତେବେ ଆସନଟି ସିପିଆଇଏମଏଲ ପାଇଁ ମଧ୍ୟ ବିଚାର କରାଯାଇପାରେ।