ବଦଳୁଛି ରାଜ୍ୟ ବିଜେପି ରଣନୀତି, ବୈଜୟନ୍ତଙ୍କ ପ୍ରୟାସ-ବିଜୟଙ୍କ ନିର୍ଣ୍ଣାୟକ ଲଢେଇର ଅୟଃ ଆରମ୍ଭ…
ଭୁବନେଶ୍ୱର- ରାଜନୀତିରେ କେତେବେଳେ କ’ଣ ଘଟିବ, ତାହା ତାତ୍କାଳିକ ପରିସ୍ଥିତି ଉପରେ ନିର୍ଭର କରେ। ଏହି କ୍ରମରେ ଦୁଇ ଦିନ ପୂର୍ବରୁ ମଧ୍ୟପ୍ରଦେଶ, ଛତିଶଗଡ଼ ଏବଂ ରାଜସ୍ଥାନର ଫଳାଫଳ ପ୍ରକାଶ ପାଇଛି। ଏଥିରେ ବିଜେପି ବହୁତ ଭଲ ପ୍ରଦର୍ଶନ କରିଛି। ସ୍ୱାଭାବିକ ଭାବେ ଏହା ଓଡ଼ିଶା ବିଜେପିର ମନସ୍ତତ୍ତ୍ୱ ଉପରେ ଭଲ ପ୍ରଭାବ ପକାଇଛି। ଏହି କ୍ରମରେ କେନ୍ଦ୍ରାପଡ଼ା ଜିଲ୍ଲାରେ ବିଜେପି ପକ୍ଷରୁ ଗତ ସୋମବାର ବିଜୟ ଶୋଭାଯାତ୍ରା କରାଯାଇଛି। ରାଜଧାନୀରେ ମଧ୍ୟ ଏପରି ଏକ କାର୍ଯ୍ୟକ୍ରମ ଆୟୋଜନ ହେବାର ଥିଲା। ମାତ୍ର ଓଡ଼ିଶାରୁ ଦିଲ୍ଲୀ ଯାଇଥିବା ଏକ ଫୋନ୍ କଲ୍ ଏହା ଉପରୋ ରୋକ୍ ଲଗାଇଲା। ବହୁତ ଦିନ ବ୍ୟବଧାନ ପରେ ବୈଜୟନ୍ତ ପଣ୍ଡା ପୁଣି ଓଡ଼ିଶାରେ ସକ୍ରିୟ ହେବାକୁ ଆରମ୍ଭ କରିବା ସହ କିଛି ପ୍ରକ୍ରିୟାକୁ ଆରମ୍ଭ କରିଛନ୍ତି।
ସୂତ୍ରରୁ ମିଳିଥିବା ଖବର ଅନୁଯାୟୀ, ବୈଜୟନ୍ତ ପଣ୍ଡା ବରିଷ୍ଠ ବିଜେପି ନେତା ବିଜୟ ମହାପାତ୍ର ଏବଂ ବିଜେପି ଛାଡି ସାରିଥିବା ଦିଲ୍ଲୀପ ରାୟଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରୁଛନ୍ତି। ଦିଲ୍ଲୀପ ରାୟ ମଧ୍ୟ ନିଜ ମନ ବଦଳାଇ ସାରିଲେଣି। ବିଜେପିରେ ପୁଣି ଥରେ ମିଶିବାକୁ ତାଙ୍କୁ ଅଡୁଆ ଲାଗୁ ନ ଥିବା ଶ୍ରୀ ରାୟଙ୍କ ନିକଟତମ ମହଲରୁ ପ୍ରକାଶ। ସେହିପରି କଂଗ୍ରେସ ତିନି ରାଜ୍ୟ ଅନୁନ୍ୟ ଦୁଇଟି ରାଜ୍ୟରେ ଜିତିବ ବୋଲି ଏକ ଧାରଣା ସୃଷ୍ଟି କରାଯାଇଥିଲା। ଏହା ପରେ ବିଜୟ ମହାପାତ୍ରଙ୍କୁ କଂଗ୍ରେସ ଆଣି କିମ୍ବା କୌଣସି କଂଗ୍ରେସ ସହଯୋଗୀ ଦଳର ଦାୟିତ୍ୱ ଦିଆଯାଇଥାଆନ୍ତା। ସେ ଓଡ଼ିଶା ଇଣ୍ଡିଆ ମେଣ୍ଟର ଆବାହକ ହୋଇ ଥାଆନ୍ତେ। ଏକଥାକୁ ନେଇ ଶରତ ପଟ୍ଟନାୟକ, ନିରଞ୍ଜନ ପଟ୍ଟନାୟକ, ନରସିଂହ ମିଶ୍ର କୁଆଡେ ଏକମତ ଥିଲେ। ମାତ୍ର ଫଳାଫଳ ବିଜେପି ସପକ୍ଷରେ ଗଲା। ତେଣୁ ବିଜୟଙ୍କୁ ବିଜେପି ରଖିବା ପାଇଁ ବୈଜୟନ୍ତ ପ୍ରୟାସ ଆରମ୍ଭ କରିଛନ୍ତି।
ଜଣେ ବୈଜୟନ୍ତଙ୍କ ସହଯୋଗୀଙ୍କ କହିବାନୁଯାୟୀ, ବିଜୟ ମହାପାତ୍ର ପାଟକୁରା ଏବଂ ପୁଅ ଅରବିନ୍ଦ ମହାପାତ୍ର ମହାକାଳପଡ଼ାରୁ ଲଢିବେ। ଶ୍ରୀ ପଣ୍ଡା ପୁର୍ନବାର ସାଂସଦ ପ୍ରାର୍ଥୀ ହେବେ। କେନ୍ଦ୍ରାପଡ଼ା କଂଗ୍ରେସ ବିଧାୟକ ପ୍ରାର୍ଥୀ ଗତ ନିର୍ବାଚନରେ ବୈଜୟନ୍ତଙ୍କୁ ଖୋଲା ସହଯୋଗ କରିଥିଲେ। ତେଣୁ ତାଙ୍କୁ ସହଯୋଗ କିମ୍ବା ବିଜେପିରେ ମିଶିବା ପାଇଁ ଶ୍ରୀ ପଣ୍ଡା ପ୍ରସ୍ତାବ ଦେବେ। ଏହା ହୋଇ ପାରିଲେ ବିଜେଡି ଗଡ଼ କୁହାଯାଉଥିବା କେନ୍ଦ୍ରାପଡାରେ ଦଳ କଡା ଟକ୍କର ପାଇବ। ଯାହା ବିଜେଡ଼ି ପାଇଁ ମୁଣ୍ଡବିନ୍ଧାର କାରଣ ହେବ। ଅନୁରୂପ ଭାବେ ବିଜୟ ମହାପାତ୍ରଙ୍କ ବ୍ରହ୍ମାସ୍ତ୍ର ୧୯୯୫ ପୁଣି ୨୦୨୪ ଦ୍ୱିତୀୟ କିସ୍ତିରେ ପ୍ରୟୋଗ କରାଯିବ। ସାରା ଦେଶରେ ଜନତା ଦଳ ହାଓ୍ୱା ସତ୍ତ୍ୱେ ବିଜୟ ମହାପାତ୍ର ବିଜୁ ପଟ୍ଟନାୟକଙ୍କ ଆନୁଷ୍ଠାନିକ ଜନତା ପ୍ରାର୍ଥୀଙ୍କ ବିରୋଧରେ ଷାଠିଏଟି ସ୍ୱାଧିନ ପ୍ରାର୍ଥୀ ଦେଇଥିଲେ। ଯାହା ଦ୍ୱାରା ଜନତା ଦଳ ପ୍ରାର୍ଥୀମାନେ ହାରି ଯାଇଥିଲେ। ବର୍ତ୍ତମାନ ବିଜେଡିରେ ବହୁ ଆସନରେ ଆଶାୟୀଙ୍କ ସଂଖ୍ୟା ବୃଦ୍ଧି ପାଇଛି। ତେଣୁ ସେମାନଙ୍କୁ ବିଦ୍ରୋହୀ ଭୂମିକାରେ ଅବତୀର୍ଣ୍ଣ କରାଇ ବିଜୟ ବିଜେଡିକୁ ମାତ୍ ଦେଇ ପାରିବେ। ବିଜୟଙ୍କ କିଛି ପରୁଣା ବନ୍ଧୁ ବିଜେଡିରେ ଥାଇ ତାଙ୍କୁ ଭିତିରିଆ ସହଯୋଗ କରିବେ ବୋଲି ଜଣାପଡିଛି। ବିଜୟ ମହାପାତ୍ର ଶ୍ରୀଜଗନ୍ନାଥଙ୍କ ରତ୍ନ ଭଣ୍ଡାର ପ୍ରସଙ୍ଗ ଉଠାଉଛନ୍ତି। ମାତ୍ର ଖଣି ପ୍ରସଙ୍ଗ ଉଠାଉ ନାହାନ୍ତି। ତେଣୁ ବିଜେଡିକୁ ଭଲ ପାଉ ନ ଥିବା କିଛି କର୍ପୋରେଟ ହାଉସ୍ ତାଙ୍କୁ ଆର୍ଥିକ ସହାୟତା କରିବେ ବୋଲି ଜଣାପଡିଛି। ବୈଜୟନ୍ତ ନୂଆଦିଲ୍ଲୀରେ ଅମିତ ଶାହା-ବିଏଲ୍ ସନ୍ତୋଷ-ସୁନୀଲ ବଂଶଲଙ୍କ ସହ ବିଜୟଙ୍କ ବୈଠକ ପାଇଁ ଖସଡ଼ା ପ୍ରସ୍ତୁତ କରୁଥିବା ଜଣାପଡୁଛି। ସବୁ କିଛି ଠିକ୍ ରହିଲେ ନୂଆବର୍ଷ ସକାଳୁ ବିଜୟ ମହାପାତ୍ର ଏବଂ ନରେନ୍ଦ୍ର ମୋଦିଙ୍କ ଫଟୋ ଦେଖିବାକୁ ମିଳିପାରେ। ବିଜୟ କହିଆସୁଥିବା ନିର୍ଣ୍ଣାୟକ ଯୁଦ୍ଧର ବିଗୁଲ୍ ବାଜି ଗଲାଣି ବୋଲି ରାଜନୈତିକ ସମୀକ୍ଷକମାନେ ମତ ଦେଇଛନ୍ତି।
