ରାଜ୍ୟରେ କାମ କରୁନି କି ଡବଲ ଇଞ୍ଜିନ୍,ମାନ୍ଦା ହେଲାଣି ଅର୍ଥନୀତି

ଭୁବନେଶ୍ୱର: (ରଙ୍ଗା ଚରଣ ପ୍ରଧାନ)_ଅକ୍ଟୋବର ଶେଷ ସୁଦ୍ଧା ସରକାର ବଜେଟ ଅନୁସାରେ ପାଇବାକୁ ଥିବା ଆୟର ୫୮% ଆସିଯିବା କଥା। କାରଣ ଚଳିତ ଆର୍ଥିକ ବର୍ଷର ୭ ମାସ ପାରି ହୋଇ ସାରିଛି । କିନ୍ତୁ ଓଡ଼ିଶା ସରକାରଙ୍କ ଆୟ ଏହି ସମୟ ମଧ୍ୟରେ ହୋଇଛି ମାତ୍ର ୪୯% । ଏହା ମଧ୍ୟରେ ଆଗ ଇଞ୍ଜିନ୍ ଠାରୁ ପାଇବାକୁ ଥିବା ଆୟ ମାତ୍ର ୪୪% । ଆଗରୁ ମୁଁ ପରନ୍ତୁ ୟୁଟ୍ୟୁବ୍ ଚ୍ୟାନେଲରେ କହିଥିଲି କେମିତି କେନ୍ଦ୍ର ସରକାରଙ୍କର ଆୟ କମିଛି । ସେଥିପାଇଁ ସେମାନେ ରାଜ୍ୟ ମାନଙ୍କୁ ଦେବାକୁ ଥିବା ଭାଗ କମାଉଛନ୍ତି।କିନ୍ତୁ ଆପଣ ତ ମୋ ୟୁଟ୍ୟୁବ୍ ଚ୍ୟାନେଲ ନ ଦେଖି ଡବା ମିଡ଼ିଆ ଦେଖୁଛନ୍ତି କିମ୍ବା ଝାଲମୁଢି କାଗଜ ପଢ଼ୁଛନ୍ତି। ସେମାନେ  କହିବେ ନାହିଁ ଯେ ଗତ ୭ ମାସ ମଧ୍ୟରେ ପଛ ଇଞ୍ଜିନ୍ ଆଗ ଇଞ୍ଜିନରୁ ପାଇବାକୁ ଥିବା ଅନୁଦାନରୁ ମାତ୍ର ୨୧% ପାଇଛନ୍ତି।

ଏପରି ପରିସ୍ଥିତିରେ ପଛ ଇଞ୍ଜିନ୍ ପାଖରେ ଦୁଇଟି ରାସ୍ତା ଥିଲା। ଋଣ କରିବେ କିମ୍ବା ଖର୍ଚ୍ଚ କମାଇବେ । ପଛ ଇଞ୍ଜିନ୍ ସରକାର ଦ୍ବିତୀୟ ରାସ୍ତା ବାଛିଛନ୍ତି। ବଜେଟରେ ଯେତିକି ଖର୍ଚ୍ଚ କରିବେ ବୋଲି ପ୍ରସ୍ତାବ ରଖିଥିଲେ ତାହାର ୪୩% ଖର୍ଚ୍ଚ କରିଛନ୍ତି । ୫୮% କରିବା କଥା।

ଓଡ଼ିଶା ସରକାରଙ୍କର ଯେଉଁ ଆୟ ୫୮%ର ପାଖାପାଖି ଅଛି ତାହା ହେଲା ରାଜ୍ୟର ନିଜ ଆୟ । ନିଜସ୍ୱ ଟ୍ୟାକ୍ସ – ଯାହା ଭିତରେ ଜିଏସଟି ଏକ ବଡ଼ ଭାଗ – ୫୨% ରହିଛି। ଏହାର ଏକ ବଡ଼ କାରଣ ହେଉଛି ଦରବୃଦ୍ଧି। ଆପଣ ଜାଣନ୍ତି, ଯେତେ ଦରବୃଦ୍ଧି ହେବ ସରକାରଙ୍କର ଜିଏସଟି ଆଦାୟ ସେତେ ବଢ଼ିବ । ଦ୍ବିତୀୟରେ ସରକାରଙ୍କ ର ଅଣଟିକସ ଆଦାୟ ୫୪% ରହିଛି, ଯାହାର ମୂଖ୍ୟ ଭାଗ ହେଲା ଖଣି ଆୟ ।

ସାରକଥା:
(୧) ସରକାରଙ୍କର ନିଜସ୍ବ ଆୟ ବଢ଼ିବାର ମୂଖ୍ୟ କାରଣ ହେଉଛି ଦରବୃଦ୍ଧି ଓ ଖଣି ।
(୨) ଆଗ ଇଞ୍ଜିନରୁ ଯେତିକି ପାଇବା କଥା ପାଉ ନାହାନ୍ତି।
(୩) ଏଥିରୁ ବର୍ତ୍ତିବା ପାଇଁ ସରକାର ଖର୍ଚ୍ଚ କମାଉଛନ୍ତି।

ତେବେ ବଡ଼ ବଡ଼ ସାମ୍ବାଦିକ ମନା କରିଛନ୍ତିି ଛୁଆ ସରକାର ବିରୁଦ୍ଧରେ ଏବେ ଠାରୁ କିଛି କୁହ ନାହିଁ, କାରଣ ସରକାର ଏକା ବେଳକେ ୨୦୩୬ ସୁଦ୍ଧା ଓଡ଼ିଶାକୁ ବିକଶିତ ରାଜ୍ୟ କରିବେ ।