ଯାତ୍ରା ଦୁନିଆ କଥା: କମିଟି, ରେକର୍ଡ ଡାନ୍ସ ଓ ଆମେ

ଭୁବନେଶ୍ୱର: (ହର ପ୍ରସାଦ ବାରିକ)- ଯାତ୍ରା ଯେତେବେଳେ ତୀବ୍ର ବ୍ୟବସାୟିକ ପ୍ରତିଯୋଗିତାକୁ ସାମ୍ନା କଲା, ସେତେବେଳେ ଧୀରେ ଧୀରେ କମିଟିର ଅକ୍ତିଆରକୁ ଚାଲିଗଲା | କମିଟି ଖୋଜିଲା କାହା ରେକର୍ଡ ଡ୍ୟାନ୍ସ ଭଲ, ମାଲିକ ତତ୍ପର ହେଲେ | ଟିପିଟିପି ବର୍ଷା ପାଣି ଗୀତ,ମଟର ଲାଗି ପାଣି ପଡିବ ପିଲା ଓଦା ହେବେ | ହିରୋ ବା ହିରୋଇନ ଅସୁସ୍ଥ ନାଟ କେମିତି ହେବ, ଯେତିକି ବ୍ୟସ୍ତ ନୁହେଁ ମଟର ଖରାପ ଟିପି ଟିପି ବର୍ଷା ପାଣି କେମିତି ହେବ ସେଥିପାଇଁ ପରିଚାଳକ ବ୍ୟସ୍ତ ହେବାକୁ ବାଧ୍ୟ, ନହେଲେ କମିଟି ପଇସା କାଟିଦେବେ | ପିଲା ଜରରେ କମ୍ପୁଥିଲେ ବି ତାଙ୍କର ହେଉଛି ଆମର ହେବ | ଏବେର ଡ୍ୟାନ୍ସ !! ନିଆଁ ରେ ଖେଳ , ଉପରୁ ଦଉଡ଼ିରେ ଖସିବା, କାନ୍ଧ ଉପରେ ଠିଆ ହେଇ ମେଢ଼ ବନେଇବା | ରେକର୍ଡ ଡ୍ୟାନ୍ସ ଏବେ ବିପଦ ଜନକ ସର୍କସ | କମିଟି ଗେଟ ଖୋଜିଲା, କାହା ଗେଟ କେତେ ବଡ଼ | ତାଙ୍କର ଆଜ୍ଞା ବିରାଟ ଗେଟ, ଖାଲି ଗେଟ ପାଇଁ ତିନିଟା ଟ୍ରକ | ମାଲିକ ବାଧ୍ୟ | ବଡ଼ପଣ ପଳେଇବ | ଲୋକେ କହିବେ ଏ ମାଲିକର ପଇସା ନାହିଁ | ସେମିତି ଲାଇଟ | ଆଦୌ ଆବଶ୍ୟକ ନଥିବା ତୀବ୍ର ଆଲୋକ, ପୁଣି କ୍ଷତିକାରକ | ସାଉଁଣ୍ଡ କଥା ନକହିଲେ ଭଲ | ଏସବୁ କଥା ନାଟକରେ କିଛି ମାନେ ରଖେନି | ମାନେ ରଖେ – ବିଗ ବଜେଟ, ଡଲ୍ଲବି ସାଉଣ୍ଡ, ମହୀଶୂର ଗେଟ, ଅମୁକ ପେଣ୍ଡାଲ ଇତ୍ୟାଦି ପ୍ରଚାର ପାଇଁ | ଏବେ ଆସିବା ନାଟକ କୁ | ପ୍ରଥମ କଥାଟି ଠେଲି ହେଇ ହେଇ ଶେଷ ରେ ପହଞ୍ଚିଛି | ଭୋଜିରେ ଶେଷ ବ୍ୟାଚର ଖାଇବା ଅବସ୍ଥା ଯାହା ନାଟକ ଅବସ୍ଥା ସେଇଆ | କ୍ଷୀରି ସରିଯାଇଛି, ଖଟା କମ ଅଛି, ତରକାରୀରେ ଗରମ ପାଣି ମିଶେଇଦିଅ | ଛ ଦିନେ ନାଟକ ସାର | ମିନା, କିନା, ବାଇଆକୁ ତନିଶ ନମ୍ବର ଡାଇଲଗ ଦିଅ, ସିଏ କରିଦେବେ ଆପଣ ମୁଣ୍ଡି ମାରିଦିଅନ୍ତୁ | ସିଏ ତା ବାଟରେ କଲା, ଏକ ତ ଭାଇରାଲ , ଦୁଇରେ
ମୋଟା ଦରମା | ମାଷ୍ଟର – ଗୋରୁ ମୁଣ୍ଡ | ଦିଅଁ ମାଙ୍କଡ଼ ଦେଲେ ମାଷ୍ଟର ର ଚଉଦ ପୁରୁଷ ଉଦ୍ଧାର |
ଏଠିବି କମିଟିର ବରାଦ, ତମର କିଏ ଅଛି ? ସୁନା, ହେନା, ମୋଟୁ ପେଟୁ ନାହାନ୍ତି – ନବୁନି |
ଦୁର୍ଭାଗ୍ୟକୁ ଯଦି କିଏ ଭାଇରାଲ ହେଲା, ମାଲିକ ମଲେ | ଦରମା ଦୁଇଗୁଣ | ଅନ୍ୟ ଯାତ୍ରା ପାର୍ଟି ପ୍ରତିଯୋଗିତା ବୈତରଣୀ ପାରିହେବାକୁ ବିକଳ୍ପ ବାଟ ଖୋଜିଲେ | ଆଇଟମ ଡ୍ୟାନ୍ସ ନହେଲେ ସିନେମା ସିରିୟଲ କଳାକାର | ଏଠିବି କମିଟିର ଭୂମିକା ଆଗରେ | କିଏ ଆସି ଖୋଲା ମେଲା ଆଇଟମ କରିବ ଖୋଜ | ମଲିକ ବିରୋଧ କରି ପାରିବେନି କମିଟି ପଇସା କାଟିବ |
ଆଉ ଆଜି ଦିନରେ ସବୁଠୁ ବେଶୀ ନିର୍ଯ୍ୟାତିତ ପରିଚାଳକ | ମାଲିକ, କମିଟି, କଳାକାର, ଦର୍ଶକ ତା ମୁଣ୍ଡରେ ଖଣ୍ଡା ଝୁଲାନ୍ତି |

ଏବେ କମିଟିର ନିଷ୍ପତ୍ତି,ଆମେ ଏତେ ପଇସା ଦେବୁନି | ପଇସା ବଢ଼େଇଛି କିଏ ?? ତଥାପି ଡେରି ହେଉ ପଛେ କମିଟିର ନିଷ୍ପତ୍ତି ଭଲ |

ସତରେ ଏ ମିଛ ପ୍ରତିଯୋଗିତାର ଭରଣପୋଷଣ ବୋଝ ବିଚରା ଦର୍ଶକ ମୁଣ୍ଡରେ | କିନ୍ତୁ କମିଟି କହୁ କି ଆମର ଗେଟ,ଲାଇଟ,
ସାଉଣ୍ଡ,ଗାଡ଼ିମଟର, ଭାଇରାଲ କଳାକାର ବଦଳରେ ଭଲ ନାଟକ ଦରକାର |

ଆମ ଭାଷା, ସଂସ୍କୁତିର ଅସ୍ମିତା ରକ୍ଷା ହେଉ | ଯାତ୍ରା ମନୋରଞ୍ଜନ କରୁ ଲୋକଙ୍କୁ ବାର୍ତ୍ତା ଦେଉ | ଓଡ଼ିଶାର ପରିଚୟ ହେଉ | ଆମେ ପାର୍ଟିର ଟ୍ରକ ଗଣିବୁନି, ଗେଟ ମାପିବୁନି, ଲାଇଟ ସାଉଣ୍ଡ ରେ ପରିବେଶ ଉଜାଡ଼ିବୁନି, ନାଟକ ଆଗରୁ ଆଇଟମ ଖୋଜିବୁନି | ଇଏ ତ ଗଲା ଗୋଟିଏ କଥା l ଏବେ ଯାତ୍ରା ଦୁନିଆର ରେକର୍ଡ ଦ୍ୟାନ୍ସକୁ ନେଇ ବହୁଳ ଆଲୋଚିତ ଏକ ବିଷୟ ଉପରେ ଆଲୋଚନା କରିବା l

କିଛି ଦିନ ତଳେ ଗୋଟେ ଭିଡିଓ ଦେଖିଲି ସାମାଜିକ ଗଣମାଧ୍ୟମରୁ | ଯାତ୍ରା ମଞ୍ଚରେ ଏଇ ନଗଦ ଉଲଗ୍ନ ହେଇ, ପରଦିନ ଭୂଲ ମାଗି – ତଥା କଥିତ “ଭାଇରାଲ ଡ୍ୟାନ୍ସରର ମୁକୁଟ” ପିନ୍ଧିଥିବା ଝିଅ( ଡ୍ୟାନ୍ସ ଘର ଶୂନ ) ମା’ ଙ୍କ ଭାଷାଣୀର ପ୍ରସେସନରେ ନାଚୁଛି | ଦର୍ଶକ ଆମୋଦିତ, ମିଡ଼ିଆ ଘେରିଛି ସେ ଝିଅକୁ |

ସତରେ ଦୋଷ କାହାର ?

ଯାତ୍ରା ମାଲିକ ??
ପରିଚାଳକ ??
କମିଟି ??
ଆୟୋଜକ ??
ଡ୍ୟାନ୍ସର ??
ଉତ୍ତର ହେବ ‘ନା’ |
ସବୁ ଦୋଷ ଦର୍ଶକର |

ମୁଁ ମଦ ନ ପିଇଲେ ଦୋକାନୀ ମୋ ଘରେ ଦେଇଆସିବ କି ?
ନା ଲୋକ ଲଗେଇ ମୋତେ ପିଏଇ ଦବ ! ଦେଖିବା ଲୋକର ଆଖି, ମନ, ହୃଦୟ, ମାନସିକତା, ମାନବିକତା ବଦଳି ସାରିଛି |
ପାରିବାରିକ ଶିକ୍ଷା, ମୂଲ୍ୟବୋଧ ଉଜୁଡିଛି | ସମ୍ମାନ, ସହାନୁଭୂତି, ସାମାଜିକ ଦାୟିତ୍ୱ ବାଟବଣା ହେଇଛି |
ନୀରବ ଯୁଦ୍ଧଟେ ଆବଶ୍ୟକ, ଅସହଯୋଗ |

ଯେଉଁଦିନ ତଥା କଥିତ ଆଇଟମ ଡ୍ୟାନ୍ସର ଆସୁଛି ଯଦି ସେଦିନ ଦର୍ଶକ ଜମା ଆସିବେନି, ତାହେଲେ ଏହି କାରଣ ପାଇଁ ଅପରାଧି ତାଲିକାରେ ଥିବା ମାଲିକଙ୍କ ଠାରୁ ଡ୍ୟାନ୍ସର ଯାଏଁ କେହି ଦ୍ୱିତୀୟ ବାର ସାହସ କରିବେନି ଏମିତି କାର୍ଯ୍ୟକ୍ରମ କରିବାକୁ |
ମାଲିକଙ୍କ ଠୁ କଳାକାର – କଥା କଥାକେ କହୁଛନ୍ତି ଦର୍ଶକ ଭଗବାନ | ଭଗବାନ କଣ ଲଙ୍ଗଳା ନାଚରେ ଏତେ ଖୁସି !!
ଭାଷଣ ନୁହେଁ ଭଗବାନ ମାନେ କାମରେ କରି ଦେଖାନ୍ତୁ | ଯେଉଁ ଦିନ ଲଂଗଳା ନାଚ ସେ ଦିନ ଟେଣ୍ଟ ବର୍ଜନ କରନ୍ତୁ | ଆଉ ପାର୍ଟି ତରଫରୁ ଯଦି କୌଣସି କଳାକାର – ନାଚ, ସଂଳାପ, ଦୃଶ୍ୟରେ ସମାଜର କ୍ଷତି କରୁଛନ୍ତି ତାକୁ ବି ବିରୋଧ କରନ୍ତୁ | ପରିବାର ସହ ଯାତ୍ରା ଦେଖିବାର ପରିବେଶ ତିଆରୀ ହେଉ |