ରୋହିତ ପୂଜାରୀଙ୍କୁ କାହିଁକି ବିଦା କଲେ ନବୀନ …ଜାଣନ୍ତୁ…

ଭୁବନେଶ୍ୱର : ସମ୍ବଲପୁର ଜିଲ୍ଲା ରେଢାଖୋଲ ବିଧାନସଭା ନିର୍ବାଚନମଣ୍ଡଳୀର ବିଧାୟକ ତଥା ଉଚ୍ଚ ଶିକ୍ଷା ମନ୍ତ୍ରୀ ରୋହିତ ପୂଜାରୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମନ୍ତ୍ରିମଣ୍ଡଳରୁ ବାଦ୍ ଦେଇଛନ୍ତି। ଏନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ରାଜଭବନ ସଚିବାଳୟକୁ ସୁପାରିସ୍ କରାଯାଇଛି। ସାମୟିକ ଭାବେ ଅତନୁ ସବ୍ୟସାଚୀ ନାୟକଙ୍କୁ ଉଚ୍ଚଶିକ୍ଷା ବିଭାଗର ଅତିରିକ୍ତ ଦାୟିତ୍ୱ ଦିଆଯାଇଛି। ହେଲେ ପୂଜାରୀଙ୍କୁ କାହିଁକି ବାଦ୍ ଦିଆଗଲା, ସେ ନେଇ ଚର୍ଚ୍ଚା ଜୋର ଧରିଛି।

          ନିକଟରେ ମୁଖ୍ୟମନ୍ତ୍ରୀଙ୍କ ଦ୍ୱାରା କରାଯାଇଥିବା ସମୀକ୍ଷାରୁ ଉଚ୍ଚଶିକ୍ଷା ବିଭାଗର ପ୍ରଦର୍ଶନ ଭଲ ରହି ନ ଥିଲା। ତେଣୁ ତାଙ୍କୁ ବାଦ୍ ଦିଆଯାଇଛି ବୋଲି ବିଜେଡି ସୂତ୍ରରୁ ପ୍ରଚାର କରାଯାଉଛି। ହେଲେ ରାଜନୈତିକ ସମୀକ୍ଷକଙ୍କ ମତରେ ରୋହିତ ନିକଟରେ 60 ବର୍ଷରୁ ଅଧିକ ଲୋକ ଏମପି,ଏମଏଲଏ ହେବା କଥା ନୁହେଁ ବୋଲି କହିଥିଲେ। ଯାହାକୁ ନେଇ ଗଣମାଧ୍ୟମରେ ବ୍ୟାପକ ଆଲୋଚନା ହୋଇଥିଲା। ଏହି ପରୋକ୍ଷରେ ନବୀନଙ୍କ ପ୍ରତି  କଟାକ୍ଷ ବୋଲି ଧରାଗଲା। ସେହିପରି କେତେକ ପ୍ରସଙ୍ଗରେ ତୃତୀୟ ମହଲା ରୋହିତଙ୍କ କ୍ୱିକ୍ ରେସପନ୍ସ ପାଇଲେ ନାହିଁ। ତେଣୁ ତାଙ୍କୁ ବାଦ୍ ଦିଆଯାଇ ବାହାରର ରାସ୍ତା ଦେଖାଇ ଦିଆଗଲା ବୋଲି କେତେକ ଓଏଏସ୍ ଅଧକାରୀ ମତ ରଖିଛନ୍ତି।

ସମ୍ବଲପୁର ସୂତ୍ରରୁ ମିଳିଥିବା ଖବର ଅନୁଯାୟୀ, ଧର୍ମେନ୍ଦ୍ର ପ୍ରଧାନ ଢେଙ୍କାନାଳ କିମ୍ବା ସମ୍ବଲପୁର ଲୋକସଭାରେ ଲଢିବାକୁ ଇଚ୍ଛା ପ୍ରକାଶ କରିଛନ୍ତି। ତେଣୁ ତାଙ୍କୁ ବିଜେଡି ଜିତାଇବ ବୋଲି ଅଣ ଆନୁଷ୍ଠାନିକ ଠିକା ନେଇ ସାରିଛି। ତେଣୁ ଅବିଭକ୍ତ ଢେଙ୍କାନାଳ ଏବଂ ନୂତନ ସମ୍ବଲପୁର ଜିଲ୍ଲାର ସାମାନ୍ୟ କର୍ତ୍ତୃତ୍ୱ ଥିବା ନେତାଙ୍କର ପକ୍ଷ ଛେଦନ କରାଯାଉଛି।  ଏହି କ୍ରମରେ ମୁକୁ ମୂଳ ବିଜେପି ଏବଂ ନୂତନ ବିଜେଡି ସଙ୍ଗଠନ ଓ ଅସନ୍ତୁଷ୍ଟ କଂଗ୍ରେସ ସମର୍ଥକଙ୍କ ଗୋଲବନ୍ଦୀ କରି ଜିତିବା ପାଇଁ ବାଟ ପ୍ରଶସ୍ତ କରାଯାଉଛି। ସେହିପରି ସୁଶାନ୍ତ ସିଂଙ୍କୁ ପଶ୍ଚିମ ଓଡ଼ିଶା ସାଙ୍ଗଠନିକ ଦାୟିତ୍ୱ ପ୍ରଦାନ କରାଯାଇଛି। ରୋହିତ ଶ୍ରୀ ସିଂଙ୍କ ପରି ପାରିବାର ନୁହଁନ୍ତି। ଦୀପାଳି ଦାସ ଆର୍ଥିକ ଭାବେ ସ୍ୱଚ୍ଛ, ତେଣୁ ରୋହିତଙ୍କୁ ବାଦ୍ ଦେଇ ଯଦି ସୁଶାନ୍ତ-ଦୀପାଳିଙ୍କ ମଧ୍ୟରେ ସମନ୍ବୟ ଅଣାଯାଇ ପାରୁଛି, ତେବେ ଏହା ଦଳ ପାଇଁ ଫାଇଦା ଦେବ ବୋଲି ବିଜେଡି ନେତୃତ୍ୱ ଆଶା କରିଛି।