ବିଜେପିଠୁ ବିପଦ ଜାଣି ଆଗୁଆ ସତର୍କ ହୋଇଗଲେ ବୋଧେ ଶରଦ ଚତୁର ପାୱାର
ମୁମ୍ବାଇ : ମଙ୍ଗଳବାର ଏକ ସମ୍ପୂର୍ଣ ଅଣ ରାଜନୈତିକ କାର୍ଯ୍ୟକ୍ରମରେ ଏନସିପି ମୁଖ୍ୟ ଶରଦ ପାୱାର ସଭାପତି ଛାଡ଼ିବା ନେଇ ଘୋଷଣା କରିଥିଲେ l ହେଲେ ଏପରି ନିଷ୍ପତ୍ତି ଅପ୍ରତ୍ୟାଶିତ ଥିବାରୁ ତାଙ୍କ ସମର୍ଥକ ଓ ବରିଷ୍ଠ ନେତାମାନେ ସହଜରେ ଏହାକୁ ଗ୍ରହଣ କରିପାରୁ ନାହାନ୍ତି। ଇସ୍ତଫା ସମ୍ପର୍କରେ ଘୋଷଣା କରିବା ମାତ୍ରେ ପାୱାରଙ୍କ ସମର୍ଥକମାନେ ତାଙ୍କୁ ଘେରି ଯାଇଥିଲେ। ସେମାନେ ତାଙ୍କ ଆଗରେ କାନ୍ଦିବା ସହ ହାତ ଯୋଡ଼ି ନିଷ୍ପତ୍ତି ବଦଳାଇବାକୁ ଅନୁରୋଧ କରିଥିଲେ। ମାତ୍ର ଶରଦ ପାୱାର ସେମାନଙ୍କ କଥା ଶୁଣି ନାହାନ୍ତି। ସେ ତାଙ୍କ ଇସ୍ତଫା ନିଷ୍ପତ୍ତରେ କାଏମ ରହିଛନ୍ତି। ଏବେ ଏନସିପିର କିଛି ବିଧାୟକ ଅଜିତ ପାୱାରଙ୍କ ନେତୃତ୍ୱରେ ମହାରାଷ୍ଟ୍ରରେ କ୍ଷମତାସୀନ ବିଜେପି ଓ ଏକନାଥ ସିନ୍ଦେଙ୍କ ଶିବସେନା ସରକାରରେ ସାମିଲ ହେବାକୁ ଚେଷ୍ଟା କରୁଛନ୍ତି l ତେଣୁ ସୁପ୍ରିମୋ ପଦରୁ ପାୱାର ଙ୍କ ଇସ୍ତଫା ଦେବା ମହାରାଷ୍ଟ୍ର ନୂଆ ରାଜନୀତିକ ସମୀକରଣ ସୃଷ୍ଟି ହୋଇଛି।
ହେଲେ କେତେକ ରାଜନୈତିକ ସମର୍ଥକ ଶରଦଙ୍କ ଏହି ଇସ୍ତଫାକୁ ସୁଚିନ୍ତିତ ରଣନୀତି ବୋଲି ଅଭିହିତ କରିଛନ୍ତି l ସେମାନଂକ ଯୁକ୍ତି ଅନୁଯାୟୀ, ଏବେ ମହାରାଷ୍ଟ୍ରର ଏକନାଥ ସିନ୍ଧେ ସରକାର ସୂତା ଖିଅକରେ ଝୁଲୁଛି । ସୁପ୍ରିମ କୋର୍ଟରେ ମହାରାଷ୍ଟ୍ର ମାମଲାର ଶୁଣାଣୀ ସରିଛି ଓ ଏହାର ରାୟ କୌଣସି ବି ଦିନ ପ୍ରକାଶ ପାଇବ । ସୁପ୍ରିମ କୋର୍ଟ ଯଦି ସିନ୍ଧେ ସରକାରକୁ ବେଆଇନ ଘୋଷଣା କରନ୍ତି ତା ହେଲେ ସେଠାରେ ସାମ୍ବିଧାନିକ ସଙ୍କଟ ସୃଷ୍ଟି ହେବ ଓ ରାଷ୍ଟ୍ରପତି ଶାସନ ଜାରି ହୋଇ ସେଠାରେ ନିର୍ବାଚନ ଅନୁଷ୍ଠିତ ହେବ। ବିଜେପି ଏବେ ମହାରାଷ୍ଟ୍ରରେ ନିର୍ବାଚନ ପାଇଁ ପ୍ରସ୍ତୁତ ନୁହେଁ l ସରକାର ବଞ୍ଚାଇବାକୁ ଏବେ ବିଜେପି ଏନସିପିର ଜୁନିଅର ପାୱାରଙ୍କ ଶରଣାପନ୍ନ ହୋଇଛି । ଗତ କିଛି ଦିନ ହେଲାଣି ଅଜିତ ପାୱାରଙ୍କ ନେତୃତ୍ଵରେ ମହାରାଷ୍ଟ୍ର ସରକାର ଗଢିବାକୁ ବିଜେପି ଉଦ୍ୟମ ଚଳାଇଛି । ଅଜିତ ପାୱାର ଏହା ପୂର୍ବରୁ ଶରଦ ପାୱାରଙ୍କ ବିରୋଧରେ ଯାଇ ବିଜେପି ସହିତ ସରକାରରେ ସାମିଲ ହେବାର ଯେଉଁ ଉଦ୍ୟମ କରିଥିଲେ, ତାହା ଅସଫଳ ହୋଇ ଥିଲା । ଏବେ ପୁଣିଥରେ ସମାନ ସ୍ଥିତିରେ ରହିବାକୁ ଅଜିତ ପାୱାର ଇଛୁକ ନୁହନ୍ତି l
ଶରଦ ପାୱାର ଭଲ ଭାବରେ ଜାଣନ୍ତି ଯେ ବିଜେପି ସହିତ ମିଶିବାର ଅର୍ଥ ହେଉଛି ନିଜ ଦଳକୁ ଆରବ ସାଗରରେ ପକାଇବା । ତେଣୁ ସେ ହାତେ ମାପି ଚାଖଣ୍ଡେ ଚାଲୁଛନ୍ତି l ଅଜିତ ପାୱାର ମୁଖ୍ୟମନ୍ତ୍ରୀ ହେବା ଲାଗି ଏକପ୍ରକାର ମନ ସ୍ଥିର କରି ବସିଛନ୍ତି, ହେଲେ ଶରଦ ପାୱାରଙ୍କୁ ଛାଡି ତାଙ୍କ ସହିତ ଏନସିପିର କେତେ ବିଧାୟକ ଯିବେ, ତାହା ଏବେ ସବୁଠୁ ବଡ ପ୍ରଶ୍ନବାଚୀ ।
ଶରଦ ପାୱାର ହଠାତ ନିଜର ଇସ୍ତଫା ଘୋଷଣା କରି ନିଜ ଦଳ ଭିତରେ ରହିଥିବା କ୍ଷମତା ଲଢେଇକୁ ନିୟନ୍ତ୍ରଣ କରିବାର ଉଦ୍ୟମ କରୁଛନ୍ତି । ନିଜ ଦଳକୁ ବଞ୍ଚାଇବାକୁ ହେଲେ ଦଳ ଭିତରେ ସବୁ ଗୋଷ୍ଠୀଙ୍କୁ ଏକାଠି ରଖିବାକୁ ହେବ- ଏକଥା ଶରଦ ପାୱାରଜାଣନ୍ତି । ତେଣୁ ସେ ଅଜିତଙ୍କୁ ହଠାତ ବିଜେପିରେ ସାମିଲ ହେବାକୁ ପରୋକ୍ଷରେ ଦେଉନାହାନ୍ତି ।
ନାଟକୀୟ ଭାବରେ ନିଜର ଇସ୍ତଫା ଘୋଷଣା କରି ଶରଦ ପାୱାର ନିଜ ପୁତୁରା ଅଜିତ ପାୱାରଙ୍କୁ ଏକ ପ୍ରକାର ଜଣାଇ ଦେବାକୁ ଚାହାନ୍ତି ଯେ, ଦଳର ନେତୃତ୍ଵ ଏବେ ବି ତାଙ୍କ ହାତରେ ରହିଛି ।
