ବିଦ୍ରୋହର ଦିନକ ପରେ ଦମ୍ ଦେଖାଇଲେ ଶରଦ ପାଓ୍ୱାର, ସତାରାରେ ସମର୍ଥକଙ୍କୁ ଭେଟିଲେ

ମୁମ୍ବାଇ : କେନ୍ଦ୍ରୀୟ ବିଜେପିର ଗୋଟି ଚାଳନାରେ  ଗତକାଲି ମହାରାଷ୍ଟ୍ରର ବିରୋଧି ଦଳ ନେତା ଅଜିତ ପାଓ୍ୱାରରେ ସରକାରରେ ସାମିଲ ହୋଇ ଉପ ମୁଖ୍ୟମନ୍ତ୍ରୀ ହୋଇସାରିଛନ୍ତି। ଏହା ଏନସିପିରେ ଏକ ବଡ ବିଦ୍ରୋହ। ମାତ୍ର ଏହି ବିଦ୍ରୋହ ପରେ ହାର ମାନି ନାହାନ୍ତି ଏନସିପି ପ୍ରତିଷ୍ଠାତା ଶରଦ ପାୱାର । ବିଦ୍ରୋହର ଦିନକ ପରେ ଶରଦ ପାୱାର ଏବେ ପୁଣି ନିଜ ଦଳକୁ ଛିଡା କରିବେ ବୋଲି ଦୃଢୋକ୍ତି ପ୍ରକାଶ କରିଛନ୍ତି।  ସେ ତାଙ୍କ ପାର୍ଟିର ଗ୍ରହଣଯୋଗ୍ୟ ଚେହେରା ବୋଲି କହିଛନ୍ତି। ଗୁରୁ ପୂର୍ଣ୍ଣିମା ଅବସରରେ ମହାରାଷ୍ଟ୍ରର ପ୍ରଥମ ମୁଖ୍ୟମନ୍ତ୍ରୀ ତଥା ନିଜର ମେଣ୍ଟୋର ଯଶବନ୍ତରାଓ ଚୌହାନଙ୍କ ସ୍ମାରକୀକୁ ଯାଇ ଶ୍ରଦ୍ଧାଞ୍ଜଳି ଶ୍ରୀ ପାଓ୍ୱାର ସମ୍ମାନ ଜଣାଇଛନ୍ତି। ସତାରା ଜିଲ୍ଲାର କରାଡରେ ଥିବା ସ୍ମାରକୀରେ ସେ ଗୁରୁପୂର୍ଣ୍ଣିମା ଅବସରରେ ଶ୍ରଦ୍ଧାଞ୍ଜଳୀ ଜ୍ଞାପନ କରି ନିଜର ସମର୍ଥକମାନଙ୍କୁ ଭେଟିବା ସହ ଲୋକଙ୍କ ସାଙ୍ଗରେ ରହିବା ପାଇଁ ନିବେଦନ କରିଛନ୍ତି। ଚୌହାନଙ୍କ ସ୍ମାରକୀରେ ସମ୍ମାନ ଜଣାଇବା ପରେ ଅତ୍ୟନ୍ତ ଭାବବିହ୍ୱଳ ହୋଇ ଶରଦ କହିଛନ୍ତି ଯେ,  “ଭାଜପା ସବୁ ବିରୋଧୀ ଦଳଗୁଡ଼ିକୁ ଧ୍ୱଂସ କରିଦେବାକୁ ଚାହୁଁଛି। ଆଜିକା ଦିନରେ ମହାରାଷ୍ଟ୍ର ଓ ସମଗ୍ର ଦେଶରେ ଜାତି ଏବଂ ଧର୍ମକୁ ନେଇ ସମାଜରେ ଗୋଟିଏ ବିବାଦ ସୃଷ୍ଟି କରାଯାଉଛି। କିଛି ନିର୍ଦ୍ଦିଷ୍ଟ ଗୋଷ୍ଠୀ ଏଥିରେ ସାମିଲ ଅଛନ୍ତି। ସାଂପ୍ରଦାୟିକ ଶକ୍ତି  ବିରୋଧରେ ମୋର ଏବଂ ଏନସିପିର ଲଢ଼େଇ ଜାରି ରହିବ। ପାର୍ଟିକୁ ପୁନର୍ବାର ଛିଡା କରିବାରେ କେହି ବାଧା ହେବେ ନାହିଁ ବୋଲି ପାଓ୍ୱାର ଦୃଢୋକ୍ତି ପ୍ରକାଶ କରିଛନ୍ତି।” ଏହି ଅବସରରେ ଶରଦ ପା୍ୱାର ବଡ଼ ହୃଦୟ ଦେଖାଇଛନ୍ତି।  ସେ ଆହୁରି କହିଛନ୍ତି ଯେ, ଏନସିପିର ବିଦ୍ରୋହୀମାନେ ଚାହିଁଲେ ଦଳକୁ ଫେରିପାରିବେ। କିନ୍ତୁ ଏହାର ଏକ ସୀମିତ ସମୟ ରହିଛି। ଯେଉଁମାନେ ଏନସିପିକୁ ଭାଙ୍ଗିବାକୁ ଚେଷ୍ଟା କରୁଛନ୍ତି, ସେମାନଙ୍କୁ ଆମେ ଉପଯୁକ୍ତ ସ୍ଥାନ ଦେଖାଇବା। ଆଜିଠାରୁ ସାମ୍ପ୍ରଦାୟିକ ଏବଂ ବିଭାଜନକାରୀ ଶକ୍ତି  ବିରୋଧରେ ଲଢ଼େଇ ଆରମ୍ଭ ହୋଇଛି। ଏପରି ବିଦ୍ରୋହ କିଛି ନୂଆ କଥା ନୁହେଁ। ମୁଁ ନିଶ୍ଚିତ ଭାବେ ଦଳକୁ ପୁର୍ନଗଠନ କରିବି ବୋଲି କହି ଶରଦ ଦୃଢୋକ୍ତି ପ୍ରକାଶ କରିଛନ୍ତି।