ଏନଡିଏରେ ସାମିଲ ହେବା ସହ କେନ୍ଦ୍ର ମନ୍ତ୍ରୀ ପଦକୁ ମନା, କାହିଁକି ଏପରି କଲେ ଏହି ତିନି ନେତା… ଜାଣନ୍ତୁ

ନୂଆଦିଲ୍ଲୀ :  ସାଧାରଣ ନିର୍ବାଚନ ପୂର୍ବରୁ କେନ୍ଦ୍ର ମନ୍ତ୍ରିମଣ୍ଡଳ ସମ୍ପ୍ରସାରଣ ହେବାର ସମ୍ଭାବନା ରହିଛି। ହେଲେ ଏହାର ରୂପରେଖ ନେଇ ବିଜେପି ଶୀର୍ଷ ନେତୃତ୍ୱ ଚୂଡାନ୍ତ ନିଷ୍ପତ୍ତିରେ ପହଞ୍ଚିପାରୁନାହିଁ। ନିକଟରେ ଏନଡିଏର ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ୩୮ଟି ଦଳ ଯୋଗ ଦେଇଥିଲେ। ମାତ୍ର ଏମିତି କିଛି ଦଳ ଅଛନ୍ତି, ଯାହାକୁ ନିମନ୍ତ୍ରଣ କରାଯାଇଥିଲା। ଏମିତି କି ସେମାନଙ୍କୁ ନିକଟ ଭବିଷ୍ୟତରେ ମନ୍ତ୍ରୀ ପଦ ଦିଆଯିବ ବୋଲି ସ୍ଥିର କରାଯାଇଥିଲ।। ହେଲେ ଏହି ସବୁ ବ୍ୟକ୍ତି ଓ ରାଜନୈତିକ ଦଳ ଏହାକୁ ପ୍ରତ୍ୟାଖାନ କରିଥିଲେ।

ଏନଡିଏର ପୁରୁଣା ସହଯୋଗୀ ଶିରୋମଣି ଅକାଳୀ ଦଳକୁ ନିମନ୍ତ୍ରଣ କରାଯାଇଥିଲା। ପୁଣି ଥରେ ହରସିମରତ କୌରଙ୍କୁ କେନ୍ଦ୍ର ମନ୍ତ୍ରୀ କରିବାକୁ ପ୍ରସ୍ତାବ ଦିଆଯାଇଥିଲା। ହେଲେ ଚାଷଈ ଆନ୍ଦୋଳନ ଏବଂ ପଞ୍ଜାବର ସାମ୍ପ୍ରତିକ ରାଜନୈତିକ ସ୍ଥିତିକୁ ଦେଖି ବିଜେପି ସହିତ ଯିବାକୁ ଅକାଳି ଦଳ ଚାହିଁଲା ନାହିଁ। ଦ୍ୱିତୀୟରେ ପାଟନା ବୈଠକରେ ଯୋଗ ଦେଇ ନ ଥିବା ଆରଏଲଡିର ଜୟନ୍ତ ଚୌଧୁରୀ ବେଙ୍ଗଲୁରୁ ବୈଠକରେ ଯୋଗ ଦେଇଥିଲେ। ଶ୍ରୀ ଚୌଧୁରୀ ଜାଠ୍ ନେତା ହୋଇଥିବାରୁ ତାଙ୍କୁ ଏନଡିଏରେ ସାମିଲ କରିବା ସହ କେନ୍ଦ୍ର ମନ୍ତ୍ରୀ ପଦ ଲୋଭ ଦେଖାଯାଇଥିଲା। ହେଲେ ଜୟନ୍ତ ଏହାକୁ ପ୍ରତ୍ୟାଖାନ କରିଥିଲେ। ସେହିପରି ଆନ୍ଧ୍ରର ପୂର୍ବତନ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁଙ୍କୁ ମଧ୍ୟ ସମାନ ଅଫର ରହିଥିଲା। ହେଲେ ସେ ଆନ୍ଧ୍ର ବିଧାନସଭା ନେଇ କିଛି ନିଷ୍ପତ୍ତି ନେବାକୁ ପ୍ରଥମେ ପ୍ରସ୍ତାବ ଦେଇଥିଲେ। ବିଜେପି ଜଗନ ରେଡ୍ଡି ସହ ମଧ୍ୟ ଯୋଗାଯୋଗରେ ରହିଥିବାରୁ ଶ୍ରୀ ନାଇଡୁ ପ୍ରସ୍ତାବ ଗ୍ରହଣ ପାରି ନ ଥିଲା। ତେଣୁ ବିଜେପି ଉପରେ ପୂର୍ଣ୍ଣ ବିଶ୍ୱାସ ନ ଥିବା ନାଇଡୁ ମଧ୍ୟ ଏନଡିଏରେ ସାମିଲ ହୋଇ ଚାରି ମାସିଆ କେନ୍ଦ୍ର ମନ୍ତ୍ରୀ ପଦ ନେବାକୁ ମନା କରିଥିବା ବିଭିନ୍ନ ଜାତୀୟ ଗଣମାଧ୍ୟମରୁ ସୂଚନା ମିଳିଛି।