ଏହି ନିର୍ବାଚନମଣ୍ଡଳୀରେ ଏଯାଏଁ ଜିତିନି ବିଜେଡି, ହେଲେ ଚାରି ଥର ଜିତିସାରିଲାଣି ବିଜେପି
ଭୁବନେଶ୍ୱର : ୨୦୦୦, ୨୦୦୪,୨୦୦୯,୨୦୧୪ ଏବଂ ୨୦୧୯ ସାଧାରଣ ଓ ବିଧାନସଭା ନିର୍ବାଚନ ଗୁଡ଼ିକରେ ବିଜେଡି ବିପୁଳ ବିଜୟ ହାସଲ କରିଛି। ବର୍ତ୍ତମାନ ବିଜେଡି ରାଜ୍ୟରେ ପ୍ରାୟ ଚାଳିଶି ପ୍ରତିଶତରୁ ଅଧିକ ଭୋଟ ନିଜ ଅକ୍ତିଆରରେ ରଖିଛି। ହେଲେ ରାଜ୍ୟରେ ଏମିତି କିଛି ଆସନ ରହିଛି, ଯେଉଁଠି ବିଜେଡି ଖାତା ଖୋଲିପାରିନି। ଏକଥା ଆଶ୍ଚର୍ଯ୍ୟ ଲାଗୁଥିଲେ ବି ସତ। ଏହି ଆସନଟି ପଶ୍ଚିମ ଓଡ଼ିଶାରେ ରହିଛି। ଏଥିସହ ଆସନଟି ଅନୁସୂଚିତ ଜନଜାତି ପାଇଁ ଆରମ୍ଭରୁ ସଂରକ୍ଷିତ ହୋଇଛି।
ସ୍ୱାଧୀନତା ପରେ ୧୯୫୧ ନିର୍ବାଚନରେ ଏହାର ପ୍ରଥମ ବିଧାୟକ ଭାବେ ନୀଳମଣି ସିଂ ଦଣ୍ଡପାଟ (ଗଣ ପରିଷଦ) ନିର୍ବାଚିତ ହୋଇଥିଲେ। ୧୯୫୧ରୁ ୨୦୧୯ ପର୍ଯ୍ୟନ୍ତ ଏହି ଆସନ ପାଇଁ ୧୬ ଥର ବିଧାନସଭା ଭୋଟ ହୋଇଛି। ଏହା ମଧ୍ୟରୁ ୩ ଥର କଂଗ୍ରେସ, ୪ ଥର ବିଜେପି, ୨ ଥର ଗଣ ପରିଷଦ, ଥରେ ଲେଖାଏଁ ଗଣତନ୍ତ୍ର ପରିଷଦ ଓ ଜନତା ପାର୍ଟି, ୨ ଥର ସ୍ୱାଧୀନ ଓ ୩ ଥର ସିପିଆଇଏମ୍ ପ୍ରାର୍ଥୀ ବିଜୟୀ ହୋଇଛନ୍ତି। ହେଲେ ରାଜ୍ୟର ମୋଟ ପଡୁଥିବା ଭୋଟର ୪୫ ପ୍ରତିଶତ ଯାଉଥିବା ଦଲ ବିଜେଡି ଏଠାରେ ଜିତିପାରିନାହିଁ। ଏହି ନିର୍ବାଚନମଣ୍ଡଳୀ ଏକ ବିଶାଳ ଖଣିଜ ସମ୍ପଦ ଭରା ଅଞ୍ଚଳରେ ଅବସ୍ଥିତ।
ରାଜ୍ୟର ମୁଖ୍ୟ ବିରୋଧି ଦଳ ବିଜେପି ୨୦୦୯ରେ ଏହି ଆସନକୁ ନିଜ ଅକ୍ତିଆରକୁ ଆଣିଥିଲା । ସେତେବେଳେ ଭୀମସେନ ଚୌଧୁରୀ ବିଧାୟକ ହୋଇଥିଲେ। ହେଲେ ୨୦୧୪ ଓ ୨୦୧୯ ସାଧାରଣ ନିର୍ବାଚନରେ ପୁଣି ସିପିଆଇ(ଏମ୍) ନିଜ ଦମ୍ଭ ଦେଖାଇ ବଡ଼ ବ୍ୟବଧାନ ସହ ବିଜୟଲାଭ କରିଥିଲା। ଶ୍ରମିକ ଓ ବାମପନ୍ଥୀ ନେତା ଲକ୍ଷ୍ମଣ ମୁଣ୍ଡା ଏହି ଆସନରୁ ଏବେ ବିଧାନସଭାରେ ପ୍ରତିନିଧିତ୍ୱ କରୁଛନ୍ତି। ଏହି ଆସନଟି ହେଉଛି- ସୁନ୍ଦରଗଡ଼ ଜିଲ୍ଲାର ବଣାଇ। ଯେଉଁଠି ଆଜି ଯାଏଁ ବିଜେଡି ଖାତା ଖୋଲିପାରିନାହିଁ।
