ପ୍ରଧାନମନ୍ତ୍ରୀଙ୍କ ଆକ୍ରମଣର ଜବାବ୍ ରଖିଲେ ପାଣ୍ଡିଆନ ! ଜାଣନ୍ତୁ କ’ଣ କହିଲେ…
ଗୋଟେ ପଟେ ଫୁଲବାଣୀ, ବଲାଙ୍ଗୀର ଏବଂ ବରଗଡ଼ ସଭାରେ ପ୍ରଧାନମନ୍ତ୍ରୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ବୟାନବାଜି କରିଥିବା ବେଳେ ନବୀନ ପଟ୍ଟନାୟକ ବା ବିଜେଡି ସରକାରଙ୍କ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆକ୍ରମଣର ଜବାବ ଦେଇଛନ୍ତି ବରିଷ୍ଠ ବିଜେଡି ନେତା ତଥା ୫-ଟି ଅଧ୍ୟକ୍ଷ କାର୍ତ୍ତିକେୟ ପାଣ୍ଡିଆନ୍ । ପୁଲବାଣୀରେ ପ୍ରଧାନମନ୍ତ୍ରୀ ନବୀନଙ୍କୁ ଆକ୍ରମଣ କରିଥିବା ବେଳେ ସେପଟେ ସୁନ୍ଦରଗଡ଼ ଜିଲ୍ଲାକୁ ପ୍ରଚାରରେ ଯାଇଥିବା ପାଣ୍ଡିଆନ୍ ରଘୁନାଥପାଲ୍ଲୀ ସଭାରେ ପ୍ରଧାନମନ୍ତ୍ରୀଙ୍କ ଆକ୍ରମଣର ଗୋଟି ଗୋଟି କରି ଜବାବ ଦେଇଥିଲେ । ପ୍ରଧାନମନ୍ତ୍ରୀ ଓ ବିଜେପି ସରକାରଙ୍କୁ ପ୍ରଶ୍ନବାଣରେ ଛନ୍ଦିବାକୁ ଚେଷ୍ଟା କରିଥିଲେ । ସେହିଭଳି ଭୁବନେଶ୍ୱର ଶଙ୍ଖ ଭବନରେ ବିଜେଡିର ଜାତୀୟ ମୁଖପାତ୍ର ତଥା ରାଜ୍ୟସଭା ସାଂସଦ ଡ. ସସ୍ମିତ୍ ପାତ୍ର ଏକ ସାମ୍ବାଦିକ ସମ୍ମିଳନୀ କରି ନବୀନ ଗ୍ୟାରେଣ୍ଟିରେ ଓଡ଼ିଶାବାସୀଙ୍କୁ ମାଗଣା ବିଜୁଳି ଯୋଜନା ବିଜେପିକୁ ଶକ୍ତ ଆଘାତ ହୋଇଥିବା କହି ବର୍ଷିଥିଲେ ପାଣ୍ଡିଆନ ।
୨୦୧୪, ୨୦୧୯ରେ ମିଛ କଥା କହି, ମିଛ ପ୍ରତିଶ୍ରୁତି ଦେଇ ବିଜେପି କ୍ଷମତାକୁ ଆସିଲେ, କହିଥିଲେ ତେଲ ଦର କମେଇବା ପାଇଁ, ତେଲଦର କମୁଛି କି ? ଏଲ୍.ପି.ଜି. ଦର କମୁଛି କି ? ବିଜେପି ସରକାର କଥା ସହିତ ଦରଦାମ ବି ବଢ଼ି ଚାଲିଥିବା କଥା କହିଛନ୍ତି ପାଣ୍ଡିଆନ । ପ୍ରଧାନମନ୍ତ୍ରୀଙ୍କ ସମେତ ବହୁ ବଡ଼ ବଡ଼ ନେତା ବର୍ତ୍ତମାନ ଓଡ଼ିଶାକୁ ଆସୁଛନ୍ତି, ଓଡିଶାର ବିଜେପି ନେତା ମାନଙ୍କୁ ବୁଷ୍ଟର ଡୋଜ ଦେବାକୁ ଏବଂ ମୁଖ୍ୟମନ୍ତ୍ରୀଙ୍କ ବିରୁଦ୍ଧରେ ପ୍ରଚାର କରିବା ପାଇଁ, ଆମ ନବୀନ ବାବୁଙ୍କ ଶକ୍ତି ହେଉଛନ୍ତି ସାଢ଼େ ୪ କୋଟି ଓଡ଼ିଶାବାସୀ ବୋଲି ସେ କହିଛନ୍ତି ।
