ମୋ ଉତ୍ତରାଧିକାରୀ ପାଣ୍ଡିଆନ ନୁହନ୍ତି: ନବୀନ ପଟ୍ଟନାୟକ
ନବୀନ ପଟ୍ଟନାୟକଙ୍କ ଉତ୍ତରାଧିକାରୀ ପାଣ୍ଡିଆନ ନୁହଁନ୍ତି ବୋଲି ନିଜେ କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବିଜେପିର ଘନଘନ ଟାର୍ଗେଟ୍ ପରେ ମୁହଁ ଖୋଲିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଜାତୀୟ ଗଣମାଧ୍ୟମ ସଂସ୍ଥା ଏନଆଇକୁ (ANI) ସାକ୍ଷାତକାର ଦେଇ ଅନେକ କଥାର ଖୁଲାସା କରିଛନ୍ତି ନବୀନ। ନିଜର ସ୍ୱାସ୍ଥ୍ୟାବସ୍ଥା ଠିକ୍ ଥିବା କହିବା ସହ ଉତ୍ତରାଧିକାରୀ ନେଇ ଦେଇଛନ୍ତି ବଡ଼ ବୟାନ। ଭି.କେ.ପାଣ୍ଡିଆନ ତାଙ୍କ ଉତ୍ତରାଧିକାରୀ ନୁହଁନ୍ତି ବୋଲି ସେ ସ୍ପଷ୍ଟ କରିଛନ୍ତି । ମୋ ଉତ୍ତରାଧିକାରୀ ଲୋକ ସ୍ଥିର କରିବେ ବୋଲି କହିଛନ୍ତି ନବୀନ ।
ରାଜ୍ୟରେ ଅନ୍ତିମ ପର୍ଯ୍ୟାୟ ନିର୍ବାଚନ ବାକି ଥିବା ବେଳେ ଏଥିପାଇଁ ଯୋରସୋରରେ ପ୍ରଚାର ଚଳାଇଛନ୍ତି ଉଭୟ ଶାସକ ଓ ବିରୋଧୀ ଦଳ। ଏହାରି ଭିତରେ ବିଜେପିର ହେଭିୱେଟ୍ ଘନଘନ ଓଡ଼ିଶା ଗସ୍ତରେ ଆସି ବିଜେଡି ସୁପ୍ରିମୋଙ୍କୁ ପ୍ରଶ୍ନବାଣରେ ଘାଇଲା କରିଛନ୍ତି। ମୁଖ୍ୟମନ୍ତ୍ରୀ ସୁସ୍ଥ ନଥିବା କହିବା ସହ ଏହା ପଛରେ କାହାର ଷଡଯନ୍ତ୍ର ଅଛି ବୋଲି ପ୍ରଶ୍ନ କରିଥିଲେ ପ୍ରଧାନମନ୍ତ୍ରୀ। ତେବେ ଗତକାଲି ପ୍ରେସ୍ମିଟ୍ କରି ସୁସ୍ଥ ଥିବା କହିଥିଲେ ମୁଖ୍ୟମନ୍ତ୍ରୀ।
ନିର୍ବାଚନ ଜିତିଲେ ପୂରା ୫ବର୍ଷ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ତୁଲାଇବେ କି ପ୍ରଶ୍ନରେ ନବୀନ କହିଲେ ମୁଁ ସେୟା ହିଁ ଆଶା କରୁଛି। ଦରକାର ପଡ଼ିଲେ ଏନଡିଏକୁ ସମର୍ଥନ କରିବେ କି ବୋଲି ପ୍ରଶ୍ନରେ ନବୀନ କହିଥିଲେ, ଯେତେବେଳେ ସମର୍ଥନ ଆବଶ୍ୟକ ପଡ଼ିବ ସେତେବେଳେ ଆମେ ଆମର ପ୍ରକୃତ ସ୍ଥିତି ଦେଖି ନିଷ୍ପତ୍ତି ନେବୁ। କାହା ପ୍ରତି କୌଣସି ଆକ୍ରୋଶ ନ ଥିବା ସେ କହିଥିଲେ।
