ବିକ୍ରମ ପଣ୍ଡାଙ୍କ ଆସନ ହେବ ପରିବର୍ତ୍ତନ, ଗଞ୍ଜାମ ଏହି ଆସନରୁ ଲଢିପାରନ୍ତି ପାଣ୍ଡିଆନ୍

ଭୁବନେଶ୍ୱର :  ଭି.କେ ପାଣ୍ଡିଆନ ଗଞ୍ଜାମ ଜିଲ୍ଲାର ଜିଲ୍ଲାପାଳ ଭାବେ କାର୍ଯ୍ୟ କରି ସାରିଛନ୍ତି। ସେ ସମୟରେ ଜିଲ୍ଲା ପାଇଁ ସେବହୁତ ଉନ୍ନୟନମୂଳକ କାର୍ଯ୍ୟ କରିଥିଲେ। ତାଙ୍କର ସବୁ ନିର୍ବାଚନମଣ୍ଡଳୀରେ ପ୍ରଶଂସକ ରହିଛନ୍ତି। ଗଞ୍ଜାମ ଜିଲ୍ଲାର ସବୁ ଅଞ୍ଚଳକୁ ସେ ବୁଲି ଦେଖିଛନ୍ତି।  ତେଣୁ ସେ ଗଞ୍ଜାମର ଯେ କୌଣସି ଆସନରୁ ବିଜେଡି ଟିକେଟରୁ ଜିତିଯିବାର ସମ୍ଭାବନା ରହିଛି। ସେ ଆସିବେ କି ନ ଆସିବେ, ତାହା ଭିନ୍ନ କଥା। ମାତ୍ର ଟିକେଟ୍ ଦଳର ହାଇକମାଣ୍ଡ ନବୀନ ପଟ୍ଟନାୟକ ହିଁ ଦେବେ ବୋଲି ବରିଷ୍ଠ ବିଜେଡି ନେତା ରମେଶ ଚ୍ୟାଉଁ ପଟ୍ଟନାୟକ କହିଛନ୍ତି।

ଭି.କେ ପାଣ୍ଡିଆନ୍ ସରକାରୀ ଚାକିରୀରୁ ସ୍ୱେଚ୍ଛାକୃତ ଅବସର ନେବା ପରେ ତାଙ୍କର ପରବର୍ତ୍ତୀ ରଣନୀତି ନେଇ ଜୋରଦାର ଚର୍ଚ୍ଚା ଆଲୋଚନା ଜାରି ରହିଛି। ଗଞ୍ଜାମ ଜିଲ୍ଲାର ଚ୍ୟାଉଁ ପଟ୍ଟନାୟକ ଗଣମାଧ୍ୟମ ସମ୍ମୁଖରେ ପାଣ୍ଡିଆନ୍ ଗଞ୍ଜାମ ଜିଲ୍ଲାରୁ ନିର୍ବାଚନ ଲଢିବା ନେଇ ପ୍ରତିକ୍ରିୟା ଦେବା ପରେ ପରିସ୍ଥିତି ଆହୁରି ରୋଚକ ହୋଇଛି। କିଛିଦିନ ତଳେ ବିକ୍ରମ କେଶରୀ ପଣ୍ଡାଙ୍କୁ ଗୋପାଳପୁର ନିର୍ବାଚନମଣ୍ଡଳୀର ଦାୟିତ୍ୱ ଦିଆଯାଇଥିଲା।  ତେଣୁ ସେ ବ୍ରହ୍ମପୁର ବିଧାନସଭା ଆସନ ଉପରେ ଏତେଟା ଫୋକସ୍ କରିପାରୁନାହାନ୍ତି। ତେଣୁ ଭି.କେ ପାଣ୍ଡିଆନ୍ ବ୍ରହ୍ମପୁର ଆସନରୁ ଲଢିବାର ଯଥେଷ୍ଟ ସମ୍ଭାବନା ରହିଥିବା କୁହାଯାଉଛି। ପୁରୁଣା ବିଜେଡି ଏବଂ ଜନତା ଦଳର କର୍ମୀଙ୍କ ସମେତ ଚ୍ୟାଉଁ ପଟ୍ଟନାୟକଙ୍କ ଗୋଷ୍ଠୀ ପାଣ୍ଡିଆନ୍ ବ୍ରହ୍ମପୁରରୁ ଲଢିବା ନେଇ ବେଶ୍ ଉତ୍ସାହିତ ହୋଇପଡ଼ିଛନ୍ତି।