ଚାଲନ୍ତୁ, ଆମ ଭାଷାରେ ଉତ୍କୃଷ୍ଟ ସିନେମା କରିବା

ଭୁବନେଶ୍ୱର : ( ରଙ୍ଗା ଚରଣ ପ୍ରଧାନ )- ସତ୍ୟଜିତ ରାୟଙ୍କର ପ୍ରତ୍ୟେକଟି ସିନେମା ବଙ୍ଗଳା ଉପନ୍ୟାସ ଉପରେ ଆଧାରିତ ଥିଲା। ବାଣିଜ୍ୟିକ ସଫଳତା ପାଇଥିଲା। ଗୋଟିଏ ଦିଗରେ ଅନେକ ବଙ୍ଗଳା ସିନେ କଳାକାର ବମ୍ବେ ଯାଇ ହିନ୍ଦି ସିନେମା ପାଇଁ କାମ କରିଥିଲେ ମଧ୍ୟ ସେମାନେ ବଙ୍ଗଳା ସିନେମା ପାଇଁ ମଧ୍ୟ ସମାନ ସମୟରେ କାମ କରୁଥିଲେ। ସତ୍ୟଜିତ ରାୟ ମାତ୍ର ଗୋଟିଏ ହିନ୍ଦି ସିନେମା ବନାଇ ଥିଲେ । କେବଳ ବଙ୍ଗଳା ସିନେମା କରି ମଧ୍ୟ ତାଙ୍କୁ ଆନ୍ତର୍ଜାତିକ ଓସ୍କାର ମିଳିଥିଲା । ଉତ୍ତମ କୁମାର ଓ ସୁଚିତ୍ରା ସେନ ଅତ୍ୟନ୍ତ ଲୋକପ୍ରିୟ ଥିଲେ । ତେଣୁ ସେମାନେ ତାଙ୍କ ଭାଷାକୁ ନେଇ କାହିଁକି ଗର୍ବ କରନ୍ତେ ନାହିଁ ? ସେମାନେ ଯେତେବେଳେ ଦେଖିଲେ ତାଙ୍କ ଭାଷାର ସିନେମାକୁ ତାଙ୍କ ରାଜ୍ୟ ବାହାରେ ଓ ଆନ୍ତର୍ଜାତୀୟ ସ୍ତରରେ ସ୍ବୀକୃତି ଓ ଲୋକପ୍ରିୟତା ମିଳୁଛି, ତେଣୁ ସେମାନେ ସେମାନଙ୍କ ଭାଷାକୁ ନେଇ କାହିଁକି ଗର୍ବ କରନ୍ତେ ନାହିଁ ? ସେମାନଙ୍କ ଯୁବଗୋଷ୍ଠୀ କାହିଁକି ବଙ୍ଗଳା ଛାଡି ହିନ୍ଦୀ କହିବାକୁ ଏକ ଫେସନ ବୋଲି ମାନିଥାନ୍ତେ ? ସେମାନଙ୍କ ସିନେମାରେ ଲୋକପ୍ରିୟ ଚରିତ୍ରଗୁଡିକ ବଙ୍ଗଳା ରୀତିରେ ବିବାହ କରୁଥିଲେ। ତେଣୁ ସେମାନେ କାହିଁକି ବଙ୍ଗଳା ରୀତିରେ ବିବାହ ଆଦି ଅନୁଷ୍ଠାନ କରିବେ ନାହିଁ।

ଦେଖନ୍ତୁ, କେବଳ ସରକାରଙ୍କ ଚିଠିପତ୍ର ଓ ବିଜ୍ଞପ୍ତି ଓଡ଼ିଆ ଭାଷାରେ ହେଲେ କିଛି ହେବ ନାହିଁ। କେବଳ ଦୋକାନ ସାଇନ୍ ବୋର୍ଡରୁ ଅଣଓଡିଆ ଭାଷା ହଟାଇ ଓଡ଼ିଆ ଭାଷା ରଖିବାକୁ ବାଧ୍ୟ କଲେ ହେବ ନାହିଁ। ଏସବୁ ଆପେ ହେବ । ପ୍ରଥମେ ଓଡ଼ିଆ ଭାଷାକୁ ରାଜ୍ୟ ଓ ରାଜ୍ୟ ବାହାରେ ଲୋକପ୍ରିୟ କରିବାକୁ ପଡ଼ିବ।

ସିନେମା ହେଉଛି ମନୋରଞ୍ଜନର ଏକ ଉତ୍କୃଷ୍ଟ ମାଧ୍ୟମ । ସେଥିରେ ଅଭିନୟ ଥାଏ, ଚିତ୍ରକଳା ଥାଏ, ସଙ୍ଗୀତ ଥାଏ, କବିତା ଥାଏ ଓ କାହାଣୀ ଥାଏ । ସବୁପ୍ରକାର କଳାର ସମାବେଶ ସିନେମାରେ ଦେଖିବାକୁ ମିଳିଥାଏ ।

ଓଡ଼ିଆ ଭାଷାର ସିନେମା ଦିନେ ଲୋକପ୍ରିୟ ଥିଲା, ଯାହାକୁ ଲୋକେ ସପରିବାର ଦେଖୁଥିଲେ । ଚିଲିକା ତୀରେ ଓ ସ୍ବପ୍ନ ସାଗର ସିନେମାରେ ଆମେ ଚିଲିକା ଦେଖୁଥିଲୁ। ଓଡ଼ିଆ ଉପନ୍ୟାସ ଉପରେ ଆଧାରିତ ଅନେକ ସଫଳ ଓଡ଼ିଆ ସିନେମା ହୋଇଛି। କିନ୍ତୁ ଏହି ଧାରାର କାହିଁକି ଅବକ୍ଷୟ ହେଲା ମୁଁ କହି ପାରିବି ନାହିଁ। କେବଳ ଆମ ଲୋକେ ଏଇଆ କରୁଛନ୍ତି ସେଇଆ କରୁଛନ୍ତି କହି ଲୋକଙ୍କୁ ଦୋଷ ଦେଲେ ହେବ ନାହିଁ। କେବଳ ଅନ୍ୟ ଭାଷାକୁ ଦୋଷ ଦେଲେ ହେବ ନାହିଁ। ସବୁକିଛି ଆପେ ଆପେ ହୋଇଯାଏ ନାହିଁ। ସବୁ ଘଟଣାର ପଛରେ ଏକ ଆର୍ଥିକ ଦିଗ ରହିଥାଏ।

ମୁଁ ଏ ବିଷୟରେ ଆଉ କିଛି ଲେଖୁନାହିଁ । ଏଥର ଆପଣ ଲେଖନ୍ତୁ।