ବିଜୟ ମହାପାତ୍ର-ଦିଲ୍ଲୀପ ରାୟଙ୍କୁ ନେଇ ସୁନୀଲ ବଂଶଲଙ୍କ କଣ ରହିଛି ପ୍ଲାନ… ଜାଣନ୍ତୁ…..

ଭୁବନେଶ୍ୱର,୨୭/୪(ବ୍ୟୁରୋ): ୨୦୨୪ ସାଧାରଣ ନିର୍ବାଚନ ପୂର୍ବରୁ ବିଭିନ୍ନ ବରିଷ୍ଠ ନେତାଙ୍କ ଗତିବିଧି ନେଇ ଆଲୋଚନା ଆରମ୍ଭ ହୋଇଯାଇଥାଏ। ଓଡ଼ିଶା ରାଜନୀତିରେ ଏପରି ଦୁଇ ବରିଷ୍ଠ ରାଜନେତା ହେଉଛନ୍ତି- ବିଜୟ ମହାପାତ୍ର ଏବଂ ଶିଳ୍ପପତି ଦିଲ୍ଲୀପ ରାୟ। ତେଣୁ ଏମାନଙ୍କର କଣ ରଣନୀତି ହେବ, ସେ ନେଇ ପ୍ରମୁଖ ଗଣମାଧ୍ୟମ ତଥାକଥିତ ବିତର୍କ ଜାରି ରଖିଥାନ୍ତି। ବିଜୟ ମହାପାତ୍ର ନିଜେ ସକ୍ରିୟ ହେବା ସହ ପୁତ୍ରକୁ ମଧ୍ୟ ସକ୍ରିୟ କରିସାରିଲେଣି। ସେହିପରି ଦିଲ୍ଲୀପ ରାୟ ରାଜନୀତିରୁ ଦୂରତ୍ୱ ରକ୍ଷା କରି ସମ୍ପୂର୍ଣ୍ଣ ବ୍ୟବସାୟରେ ମନୋନିବେଶ କରୁଥିବା ଲକ୍ଷ୍ୟ କରାଯାଇଛି। ରାଜ୍ୟରେ ଥିବା ସକ୍ରିୟ ଦଳ ବିଜେଡି, କଂଗ୍ରେସ ଏବଂ ବିଜେପି ମଧ୍ୟରେ ଏହି ଦୁଇ ନେତାଙ୍କୁ ଗୋଟିଏ ଦଳ ବାଛିବାକୁ ପଡିପାରେ। ଏହା ଛଡା ଅନ ବିକଳ୍ପ ନେଇ କଳ୍ପନା କରାଯାଇପାରୁନାହିଁ।
ବିଶେଷ କରି ବିଜୟ ମହାପାତ୍ରଙ୍କ ଗତିବିଧି ନେଇ କେତେକ ନଜର ରହିଛି। ଉଭୟ ପାଟକୁରା ଏବଂ ମହାକାଳପଡାରେ ନିଜର ସଙ୍ଗଠନ ରଖିଛନ୍ତି। ଏହି 2ଟି ସ୍ଥାନରେ ନିଜେ ଏବଂ ତାଙ୍କ ପୁଅ ପ୍ରାର୍ଥୀ ହୋଇପାରନ୍ତି। କେନ୍ଦ୍ରାପଡ଼ା ଲୋକସଭା ନେଇ ମଧ୍ୟ ଶ୍ରୀ ମହାପାତ୍ରଙ୍କ ନାଁ ଚର୍ଚ୍ଚା ହେଉଛି। ହେଲେ ବିଜୟ ବ୍ୟକ୍ତିଗତ ଭାବେ ଜାତୀୟ ରାଜନୀତିରେ ଏତେଟା ଆଗ୍ରହ ପ୍ରକାଶ କରୁନାହାନ୍ତି। ଧର୍ମେନ୍ଦ୍ର ପ୍ରଧାନଙ୍କୁ ବିଜେପିର ମୁଖଶାଳା ବୋଲି ବର୍ଣ୍ଣନା କରି ସେ ବିଜେପି ଛାଡିଥିଲେ। ପରେ ବୈଜୟନ୍ତ ପଣ୍ଡାଙ୍କହସ୍ତକ୍ଷେପ ଏବଂ ଅନ୍ୟ କେତେକ ବରିଷ୍ଠ ନେତାଙ୍କ ଅନୁରୋଧ ପରେ ବିଜେପି ଫେରିଥିଲେ। ହେଲେ ଭୋଟ ପରେ ଏତେଟା ସକ୍ରିୟ ରହି ନ ଥିଲେ। ବର୍ତ୍ତମାନ ଧର୍ମେନ୍ଦ୍ର ପ୍ରଧାନଙ୍କ କର୍ତ୍ତୃତ୍ୱ ରାଜ୍ୟ ସଂଗଠନରେ ହ୍ରାସ ପାଇଥିବା ଏକ ଧାରଣା ସୃଷ୍ଟି କରାଯାଉଛି। ପ୍ରଭାରୀ ବଂଶଲ ଏବଂ ପୁରେନ୍ଦେଶ୍ୱରୀ କୁଆଡେ ଧର୍ମେନ୍ଦ୍ରକୁ ଏତେଟା ସାଙ୍ଗଠନିକ ଗୁରୁତ୍ୱ ନ ଦେବାକୁ ଜେ.ପି ନଡ୍ଡା ଏବଂ ନରେନ୍ଦ୍ର ମୋଦିଙ୍କୁ ପରାମର୍ଶ ଦେଇଛନ୍ତି। ସେହିପରି ବିଜେପି ଏକ ହିନ୍ଦୁତ୍ୱ ପାର୍ଟି ହୋଇଥିବାରୁ ଧର୍ମେନ୍ଦ୍ରଙ୍କୁଆଗକୁ ବଢାଇବାକୁ ଚାହୁଁନି। ବରଂ ପ୍ରତାପ ଷଡଙ୍ଗୀ, ଅପରାଜିତା ଷଡଙ୍ଗୀ, ସୁରେଶ ପୂଜାରୀ, ସିଂଦେଓ ପରିବାର, ଜୁଏଲ ଓରାମ ପ୍ରମୁଖ ବିନା ଧର୍ମେନ୍ଦ୍ରରେ କାର୍ଯ୍ୟକ୍ରମ କରିବା ନେଇ ସମ୍ମତି ପ୍ରକାଶ କରୁଛନ୍ତି। ସୁନୀଲ ବଂଶଲ ଟିକେ ଧର୍ମେନ୍ଦ୍ର ବିରୋଧୀ ମନେ ହେଉଥିବାରୁ ଉପରୋକ୍ତ ଗୋଷ୍ଠୀ ବିଜୟ ମହାପାତ୍ରଙ୍କୁ ନେଇ ସକ୍ରିୟ ହେବାକୁ ଚାହୁଁଛି। ଏହି ଗୋଷ୍ଠୀ ଅନୁଯାୟୀ, ବିଜେପିର କଳେବର ଯେପରି ବୃଦ୍ଧି ପାଉଛି। ବିଜୟଙ୍କ ଭଳି ଅଭିଜ୍ଞ ନେତା ଦଳକୁ ସହାୟକ ହେବେ। ବିଜୟର ଆଦର୍ଶଗତ ପସନ୍ଦ କିଛି ନାହିଁ। ତେଣୁ ସେ କଂଗ୍ରେସ ଫେରିବେନି। କାରଣ କଂଗ୍ରେସ ନିକଟ ଭବିଷ୍ୟତରେ କ୍ଷମତାରେ ଆସିବାକୁ ନାହିଁ। ସାମ୍ପ୍ରଦାୟିକତା ତଥା ଜାତାୟ ରାଜନୀତିରେ ମଧ୍ୟ ସେ ଧାର ଧରନ୍ତିନି। ଥରେ ବିଜେଡି ଯିବାର ବାଟ ବନ୍ଦ ହୋଇଛି। ତେଣୁ ବିଜେପି ହିଁ ତାଙ୍କ ପାଇଁ ଉପଯୁକ୍ତ ବିକଳ୍ପ ହେବ। ପାଟକୁରାରେ ନିଜେ ଲଢି ବିଜୟ ମହାକାଳପଡାରେ ପୁଅକୁ ଲଢାଇପାରିବେ। କାରଣ ମହାକାଳପଡାରେ ଭଲ ବିଜେପି ପ୍ରାର୍ଥୀ ନାହାନ୍ତି। ତେଣୁ ମେ ମାସ ପରେ ବିଜୟ ରାଜ୍ୟ ବିଜେପି ରାଜନୀତିରେ ସକ୍ରିୟ ହେବ। ଯାହା ଦ୍ୱାରା ଏକ ସାଂସଦ ଗୋଷ୍ଠୀ ବିଜୟଙ୍କୁ ଆଗରେ ରଖି ଧର୍ମେନ୍ଦ୍ରଙ୍କୁ ଚେକ୍ ଦେବେ ବୋଲି ଜଣାପଡିଛି।

ବିଜୟଙ୍କ ରାଜନୀତିକୁ ଅନୁଧ୍ୟାନ କରିଥିବା ଜଣେ ବରିଷ୍ଠ ସାମ୍ବାଦିକ କହିଛନ୍ତି ଯେ, ବିଜେପି ଧ୍ରୁବୀକରଣରେ ବହୁଳ ବିଶ୍ୱାସ କରେ। ଓଡ଼ିଶାରେ ସଂଖ୍ୟାଲଘୁଙ୍କ ଏତେଟା ଉପସ୍ଥିତି ନାହିଁ। ତେଣୁ ଓଡ଼ିଆ-ଅଣ ଓଡ଼ିଆ, ଶ୍ରୀମନ୍ଦିର , ରତ୍ନ ଭଣ୍ଡାର ପରି ପ୍ରସଙ୍ଗ ଆଦିରେ ସେନସନ୍ ଆଣିବାରେ ବିଜୟ ସହାୟକ ହୋଇପାରନ୍ତି। ବିଜୁ ବାବୁଙ୍କ ନିକଟତମ ବୋଲି ବିଜୟଙ୍କୁ ଗଣମାଧ୍ୟମରେ ଅଭିହିତ କରାଯାଇଥାଏ। ହେଲେ ବିଜୁ ପଟ୍ଟନାୟକ କେବେ ବି ନିଜ ଜୀବନଦଶାରେ ବିଜେପି ସହ ହାତ ମିଳାଇ ନ ଥିଲେ। ଏମିତି କି ବଞ୍ଚିଥିବା ଅବସ୍ଥାରେ ମଧ୍ୟ ଏହାକୁ ପ୍ରତ୍ୟାଖାନ କରିଥିଲେ। 2009ରେ କନ୍ଧମାଳ ଦଙ୍ଗାରେ ଯେତେବେଳେ ବିଜେପିକୁ ସାମ୍ପ୍ରଦାୟିକ ଦଳ କହି ନବୀନ ପଟ୍ଟନାୟକ ଗୁଡ ବାଏ କହିଲେ। ଠିକ୍ ସେହି ସମୟରେ ବିଜୟ ବିଜେପିକୁ ଆଉଜି ପଡିଲେ। ଦରବୃଦ୍ଧି, ଦଙ୍ଗା, ସଂଘୀୟ ବ୍ୟବସ୍ଥା, ସାମାଜିକ ନ୍ୟାୟ, ଜାତୀୟସ୍ତରରେ ଗଠନଧର୍ମୀ ବିରୋଧି ଦଳ ନେଇ ଶ୍ରୀ ମହାପାତ୍ର କେବେ ମତ ରଖନ୍ତି ନାହିଁ। ତେଣୁ ବିଜେପି ରାଜ୍ୟରେ ଯେଉଁ ଆଗ୍ରେସିଭ୍ ନେସ୍ ଦେଖାଉଛି, ସେଥିରେ ବିଜୟଙ୍କୁ ଭଲ ବ୍ୟବହାର କରିହେବ ବୋଲି କୁହାଯାଇଛି। ଏହିପରି ଏକ ରିପୋର୍ଟ ଏକ ବେସରକାରୀ ସଂସ୍ଥା ବିଜେପି ଜାତୀୟ ନେତୃତ୍ୱକୁ ପ୍ରଦାନ କରିଛି। ସେହିପରି ଦିଲ୍ଲୀପ ରାୟ ବିଜୟଙ୍କ ବିନା ବିଜେଡି ଏବଂ କଂଗ୍ରେସ ଯିବେ ନାହିଁ। ନିଜ ବ୍ୟବସାୟିକ କଳେବର ବୃଦ୍ଧି କରିବାରେ ସେ ଉଦ୍ୟମରତ। ତେଣୁ ବିଭିନ୍ନ ବିଜେପି ମୁଖ୍ୟମନ୍ତ୍ରୀ ଏବଂ କେନ୍ଦ୍ର ସହ ଭଲ ସମ୍ପର୍କ ରଖିବାକୁ ରାୟ ଚାହିଁବେ। ମାତ୍ର ଆର୍ଥିକ ଭାବେ ବିଜେପିକୁ ଅଧିକ ସାହାଯ୍ୟ କରିବେ ବୋଲି କେତେକ ବେସରକାରୀ ଗୁଇନ୍ଦା ରିପୋର୍ଟ ପ୍ରଦାନ କରିଛନ୍ତି।
ବଦଳିପାରେ ବିଜେପି କୋର କମିଟି
ସୁନୀଲ ବଂଶଲ ରାଜ୍ୟ ବିଜେପି କୋର କମିଟି ସହ ସାମଗ୍ରିକ କାର୍ଯ୍ୟକାରିଣୀର ନବକଳେବର କରିବେ ବୋଲି ଜଣାପଡିଛି। ଏହା ପୂର୍ବରୁ ବିଜୟଙ୍କ ସହ ଚୂଡାନ୍ତ ଆଲୋଚନା ହେବ ବୋଲି ଜଣାପଡିଛି। ପ୍ରଚାର କମିଟି ଅଧ୍ୟକ୍ଷ ନେଇ ଅଙ୍କକଷା ଜାରି ରହିଛି। ଯାହାକୁ ନେଇ ସମ୍ମତି ଆସୁନାହିଁ। ପ୍ରତାପ ଷଡଙ୍ଗୀ, ଅପରାଜିତା ଷଡଙ୍ଗୀ ବିଧାନସଭା ଲଢିବା ନେଇ ଆଗ୍ରହ ଦେଖାଉଛନ୍ତି। ତେଣୁ ଏହି ବାଲେଶ୍ୱର ଓ ଭୁବନେଶ୍ୱର ପାଇଁ ବିଜେପି ନୂଆ ସାଂସଦ ପ୍ରାର୍ଥୀ ଦେଇପାରେ ବୋଲି ଜଣାପଡିଛି।